ۇلتتىق مۋزەيدە عارىش زالى اشىلماق

بۇل تۋرالى قازاقتىڭ تۇڭعىش عارىشكەرى توقتار اۋباكىروۆپەن بولعان كەزدەسۋدە ايتىلدى قازاقستان رەسپۋبليكاسىنىڭ ۇلتتىق مۋزەيىندە قازاقتان شىققان تۇڭعىش عارىشكەر, كەڭەس وداعىنىڭ باتىرى, حالىق قاھارمانى, تەحنيكا عىلىمدارىنىڭ دوكتورى, پروفەسسور توقتار اۋباكىروۆپەن كەزدەسۋ بولىپ ءوتتى. ۇلتتىق مۋزەي ديرەكتورى دارحان مىڭباي ۋاقىت تاۋىپ كەلگەنى ءۇشىن عارىشكەرگە العىس ايتا وتىرىپ, بۇل كەزدە­سۋدىڭ ماڭىزىن تاراتىڭقىراپ ايتتى. «بۇگىنگى كەزدەسۋدىڭ باستى ماق­ساتى قازاقتان شىققان تۇڭعىش عارىشكەرمەن سىرلاسىپ, وتاندىق عارىش سالاسىنىڭ وتكەنى مەن بولاشاعى جايلى اڭگىمەلەسۋ بولىپ وتىر. ءبىز پاتريوتيزم دەگەندى ءجيى ايتامىز. ال شىن مانىندە سوزىمەن جانە ىسىمەن, بۇكىل جان-دۇنيەسىمەن پاتريوتتىقتىڭ ۇلگىسى دەپ وسى توقتار اۋباكىروۆتى اتاۋعا بولادى. ءبىز بولاشاقتا عارىش الەمىنە بايلانىستى ۇلتتىق مۋزەيدەن ارنايى زال اشساق دەپ وتىرمىز. سول زالدىڭ قۇرىلىمى جانە بولاشاق جۇمىسى جايىندا دا عارىشكەرمەن اقىلداسىپ وتىرماقپىز», – دەدى د.مىڭباي. ودان ءارى توقتار وڭعارباي ۇلى وزىنە ءتان اقجارقىندىقپەن رياسىز اڭگىمە تولعادى. «بيىل عارىشقا كوتەرىلگەنىمە 25 جىل تولادى. وسىناۋ جاۋاپتى ميسسيادان سۇرىنبەي وتۋىمە ەڭ باستى سەبەپ – قازاق حالقىنىڭ ماعان دەگەن كىرشىكسىز قۇرمەتى مەن سەلكەۋسىز سەنىمى. مەن حالقىم ءۇشىن ۇشتىم جانە سول ءۇشىن دە ۇلكەن قۇرمەتكە بولەندىم. قاي جەرگە بارسام دا «ءبىزدىڭ باتىرىمىز كەلدى», «تۇڭعىش عارىشكەرىمىز كەلدى» دەپ قارسى الادى. سول جۇرتتىڭ ريا­سىز كوڭىلىنە ءدان ريزامىن. مەن قازاقتىڭ ۇلان-عايىر دالاسىن عارىشتان كورىپ, قادىرىن ابدەن ۇعىنعان ادامنىڭ ءبىرىمىن. سوندىقتان, جاستارمەن كەزدەسە قالعان جەردە وتانىمىزعا دەگەن قۇرمەت, ادالدىق تاقىرىپتارىندا كوبىرەك ايتقاندى ۇناتامىن. ال­دىمدا ەكى بالا وتىرسا دا سويلەي بەرۋگە دايىنمىن. باستىسى, ول ەكەۋىنىڭ قازاقستانعا دەگەن ماحابباتىن, اتا-بابالارىمىزدان قالعان جەرگە دەگەن قۇرمەتىن ارتتىرا بىلسەم, ۋاقىتىمنىڭ بوس كەتپەگەنى. جاس كەزىمدە مەكتەپتەگى كىتاپحانادان شىقپايتىنمىن. سونداعى بار كىتاپتى وقىپ تاۋىستىم. دەسە دە, كوپ دۇنيەگە قول جەتە بەرمەيدى. ال قازىر ءبارى بار, كىم قانداي كىتاپ وقيمىن دەسە, قايدا وقيمىن دەسە, كوپ مۇمكىندىكتەردى پايدالانۋعا بولادى. جالپى, ادام بالاسى ءبىلىم الۋعا ەشقاشان شارشاماۋ­ى كەرەك. ول كىشىگە دە كەرەك, ۇلكەنگە دە كەرەك», – دەدى ت.اۋباكىروۆ. حالقىنىڭ سۇيىكتىسىنە اينالعان حالىق قاھار­مانىمەن بولعان كەزدەسۋ وتە اسەرلى ءوتتى. عىلىمي قىز­مەتكەرلەر مەن ۋنيۆەرسيتەت ستۋ­دەنتتەرى عارىشكەر عيبراتىنا ءدان ريزا بولىپ تارقاستى. نازار قاسىم.