قاناتتى قىز

شاڭعى سپورتىنىڭ سيرەك ءتۇرى – فريستايل-اكروباتيكادان الەم كۋبوگىنىڭ كۇمىس جۇلدەسىن العان  جانبوتا الدابەرگەنوۆا تۋرالى مولتەك سىر جاقىندا ماسكەۋدە وتكەن فريستايلدان الەم كۋبوگىندا جانبوتا الدابەرگەنوۆا كۇمىس جۇلدەگە قول جەتكىزدى. ول اقتىق سىن قورىتىندىسىندا 75,91 ۇپاي السا, الاڭ يەسى ماسكەۋلىك الينا گريدنەۆا 77,43 ۇپاي جيناعان. قولا جۇلدە 75,69 ۇپايى بار امەريكانىڭ ءۇمىتى مەديسون ولسەنگە بۇيىردى. شاڭعىمەن فريستايل-اكروباتيكا تاريحىندا تۇڭعىش رەت وسىنداي ءىرى جەڭىسكە جەتىپ, سپورت جىلناماسىنا ەسىمى قۇرمەتپەن جازىلعان جانبوتا الدابەرگەنوۆانىڭ جەڭىستى جورىعى كەزدەيسوقتىق ەمەس. ول بۇعان دەيىن سوچي وليمپياداسىندا ۇزدىك التىلىقتىڭ ىشىندە بولدى. مينسكىدە وتكەن ەۋروپا كۋبوگى ءۇشىن جارىستىڭ ەكى كەزەڭىندە كوش باس­تادى. وسى قۋانىشقا وراي ءبىز جانبوتا الدابەرگەنوۆا جاتتىعاتىن شىمكەنتتەگى №8 قىسقى سپورت تۇرلەرى ورمبجم ديرەكتورى باقىتجان زيابەكوۆكە ارنايى جولىققانبىز. – جانبوتا ماسكەۋدە ءالى ءبىراز ۋاقىتقا دەيىن بولادى, – دەدى باقىتجان وردابەك ۇلى. – بۇل جەڭىس وڭتۇستىكقازاقستاندىقتاردىڭ عانا ەمەس, بۇكىل قازاق جۇرتىنىڭ جەڭىسى. جانبوتا – سىرت كوزگە قاراپايىم كورىنگەنىمەن, العان ماقساتىنان قايتپايتىن قايسار قىز. «شىعىستىڭ قوس شىنارى» اتانعان ءاليا مەن مانشۇكتەي ارداقتى اپالارىمىزدىڭ رۋح نامىسى وسى قىزدا بار-اۋ دەپ ويلايمىن. شاڭعىلى فريستايل-اكروباتيكا ونەرى – قىسقى سپورت تۇرلەرىنىڭ ىشىندە ەڭ قيىنى. وزدەرىڭىز دە كورىپ جۇرسىزدەر عوي, جوعارىدان قۇلديلاپ كەلىپ قايقاڭنان سەكىرگەندە سپورتشى بەس مەتر بيىكتىككە دەيىن اسپانعا ۇشىپ كەتەدى. سونشاما بيىكتىكتەن اۋادا اينالىپ, جەرگە نىق ءتۇسۋ ساڭلاق سپورتشىلاردىڭ وزىنە جەڭىلدىكپەن كەلمەيدى. بۇعان دەيىن سپورتتىق گيمناستيكامەن اينالىسقان جانبوتانىڭ فريستايل-اكروباتيكا تۇرىنە وتكەنىنە ءتورت-بەس جىل عانا. ال ونىڭ قارسىلاستارىنىڭ ءومىربايانىنا ۇڭىلسەڭ, سپورتتىق ءوتىلى ون, ون بەس جىل. جالپى, سپورتتىڭ بۇل تۇرىندە جانبوتا جالعىز ەمەس. م.اقجىگىت, ب.ىنكاربەك دەگەن سپورتشىلارىمىز مينسكىدە وتكەن ەۋروپا كۋبوگى كەزەڭىندە تورتتىككە كىردى. كونكيمەن مانەرلەپ سىرعاناۋ, شورت-ترەك, شايبالى حوككەي جانە امبەباپ جەكپە-جەك ءبولىمى سپورتشىلارى رەسپۋبليكالىق, حالىقارالىق جارىستاردا لايىقتى جۇلدە الىپ ءجۇر. ءبىر قىزىعى, جانبوتانىڭ اعايىندارى قىزىنىڭ قانداي سپورت تۇرىمەن اينالىساتىنىن سوچيداعى قىسقى وليمپيادا ويىنى كەزىندە ءبىر-اق بىلگەن ەكەن. بىربەتكەي قىز ايتپاي كەلگەن. شاڭعى ارقالاعانعا شاڭعىمەن سىرعاناپ ءجۇر دەپ تۇسىنگەن عوي. قازاقتىڭ قايسار قىزىنىڭ قازىر ءبىر عانا ارمانى بار. ول – وليمپ بيىگىنىڭ شىڭىنا شىعۋ. باقتيار تايجان, «ەگەمەن قازاقستان». وڭتۇستىك قازاقستان وبلىسى.