الەمدەگى ءۇشىنشى زاۋىت

تمد-عى العاشقى كاسىپورىننىڭ تۇساۋى قىزىلجار وڭىرىندە كەسىلىپ, زاماناۋي تەحنولوگيالارمەن جابدىقتالدى قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە وبلىس باسشىسى ەرىك سۇلتانوۆ 2015 جىلى ءوڭىر ەكونوميكاسىنا 128,4 پايىزدىق وسىممەن 154,5 ميلليارد تەڭگە ينۆەستيتسيا قۇيىلىپ, جىل قورىتىندىسى بويىنشا ەلىمىزدە ءبىرىنشى ورىن يەلەنگەنىن جەتكىزگەن ەدى. ال, بيىل ايماق رەسپۋبليكادا العاش بولىپ ينۆەستورلار كەڭەسىن قۇرىپ, شەتەلدىك ءىرى قارجىگەرلەردىڭ قاتىسۋىمەن فورۋم وتكىزۋى, بىرنەشە مەموراندۋمعا قول قويۋى جولداۋدا بەلگىلەنگەن جاڭا ينۆەستيتسيالىق ساياساتتى جۇزەگە اسىرۋدىڭ ناقتى دالەلى بولسا كەرەك. وسى وقيعالاردىڭ ءىزى سۋىماي جاتىپ, ەكىنشى بەسجىلدىقتاعى يندۋستريالاندىرۋ كارتاسىنا ەنگەن 16-شى جوبا پايدالانۋعا بەرىلدى. ونى تۇرعىزۋعا «BARTEC-قازاقستان» كومپانياسى قارجىلىق قولداۋ كورسەتىپ, ىسكە اسىردى. الدىمەن الەمدەگى 3-ءشى, تمد-داعى 1-ءشى كاسىپورىندى سالۋعا تەرىسكەي ءوڭىر نە سەبەپتى تاڭداپ الىندى دەگەن ساۋالعا كەلەيىك. ينۆەستورلاردىڭ سوزدەرىنە قاراعاندا, وبلىستىڭ گەوگرافيالىق جاعىنان قولايلى ورنالاسۋى قىزىقتىرعان كورىنەدى. توعىز جولدىڭ تورابىندا تۇرعان پەتروپاۆل قالاسى ارقىلى رەسەي نارىعىنا ءوتۋ قاي جاعىنان دا ءتيىمدى بولماق. ەكىنشىدەن, ءوڭىر ەكولوگيالىق جاعىنان تازا سانالاتىندىقتان, بۇل فاكتور دا جەتە ەسكەرىلگەن ءتارىزدى. ءبىر سوزبەن ايتقاندا, ەكونوميكالىق ارتىقشىلىقتار از ەمەس. گەرمانيانىڭ اتاعى جەر جارعان فيرماسى جايلى بىرەر ءسوز. بۇگىندە تورتكىل دۇنيەنىڭ 60-قا جۋىق ەلىمەن ارىپتەستىك تىعىز قارىم-قاتىناس ورناتۋى, جىلىتۋ كابەلدەرىن شىعارۋدا كوشباسشى سانالاتىنى زور الەۋەتىنەن حابار بەرسە كەرەك. بۇعان «الەمدىك نارىق كوشباسشىلارىنىڭ ەنتسيكلوپەديا­سىنا» ەنگەنىن, يننو­ۆاتسيالىق كاسىپورىن «توپ-نوۆاتور» ءجۇل­دەسىمەن ماراپات­تالعانىن قوسساق, تاڭداۋدىڭ انشەيىن ەمەستىگىن ايعاقتايدى. زاۋىتتىڭ سالتاناتتى اشىلۋ راسىمىندە سويلەگەن سوزىندە وبلىس اكىمى ەرىك سۇلتانوۆ ەلىمىزدە شەتەلدەرلەن ينۆەستيتسيا تارتۋعا وڭتايلى احۋال قالىپتاسقانىن, كاسىپورىننىڭ قازاقستان ءۇشىن ماڭىزدىلىعىن, ونىمدەرى ۇلكەن سۇرانىستى قاناعاتتاندىراتىنىن اتاپ ءوتتى. قۇيىلعان ينۆەستيتسيالاردىڭ ۇشتەن ءبىرى اگروونەركاسىپ كەشەنىنە سالىنىپ كەلسە, بۇدان بىلاي ماشينا جاساۋ سالاسىنىڭ الەۋەتتەرى دە جەتە ەسكەرىلەتىن بولادى. الىس, جاقىن شەتەلدەرمەن بايلانىستى نىعايتۋ ماقساتىمەن 30-دان استام دەلەگاتسيالار كەلىپ, بىرقاتار ماڭىزدى جوبالاردى ىسكە اسىرۋ بەلگىلەنگەن. وسىنداي ماقساتتى شارالاردىڭ ارقاسىندا شەتەلدىك ينۆەستيتسيا مولشەرى 60 پايىزعا كوبەيگەن. الدا ءىرى قارجىگەرلەردىڭ قاتىسۋىمەن كولىكتىك-لوگيستيكالىق ورتالىق, استىق پەن مايلى داقىلدار وڭدەيتىن زاۋىتتار سالۋ ارقىلى 2 مىڭعا جۋىق جاڭا جۇمىس ورىندارىن اشۋ كوزدەلگەن. «BARTEC» كومپانياسىنىڭ اتقارۋشى ديرەكتورى حايك لاۋبحايمەر باق وكىلدەرىنە بەرگەن سۇحباتىندا ەلەكترمەن جىلىتۋ كابەلدەرىن جاسايتىن كاسىپورىن فرانتسيادان, گەرمانيادان, شۆەيتساريادان اكەلىنگەن قۇرال-جابدىقتارمەن, قوندىرعىلارمەن جابدىقتالعانىن, ايىنا 250 مىڭ مەترگە دەيىن ءونىم شىعارۋعا قاۋقارلى ەكەنىن جەتكىزدى. جىلىتۋ كابەلدەرىن تۇرعىن ءۇي-كوممۋنالدىق, حيميا, فارماتسەۆتيكا, مۇناي, گاز سالالارىندا, قىستا سۋمەن جابدىقتاۋ قۇبىرلارىندا كەڭىنەن قولدانۋعا, وسىلايشا وقىس جاعدايلاردىڭ الدىن الۋعا بولادى. جاسالۋ تەحنولوگياسى حالىقارالىق تالاپتارعا ساي كەلەتىندىكتەن, قاۋىپسىز ءارى ەكولوگيالىق جاعىنان تازا. پايدالانۋ مەرزىمى ون جىلدان كەم ەمەس. باعاسى دا قولجەتىمدى. ازىرگە 15 ادام جۇمىسقا تارتىلىپ وتىر. الداعى ۋاقىتتا ءوندىرىس اۋقىمى كەڭەيگەننەن كەيىن قوسىمشا 30 جۇمىس ورنى قۇرىلىپ, كابەلدىڭ بىرنەشە ءتۇرى شىعارىلادى. وعان تولىق مۇمكىندىك بار. ويتكەنى, وسىنداعى ماماندار گەرمانيادا ءۇش ايلىق وندىرىستىك تاجىريبەدەن ءوتىپ, كاسىبي جاعىنا شىڭدالىپ قايتقان. ءومىر ەسقالي, «ەگەمەن قازاقستان». سولتۇستىك قازاقستان وبلىسى.