اقتاۋدا جول اپاتى سالدارىنان ءبىر كولىك ەكىنشىسىن باسىپ قالدى

اقتاۋ. 17 اقپان. اقتاۋدا Toyota Camry كولىگى Volkswagen Jetta كولىگىن باسىپ قالدى. بۇل تۋرالى lada.kz سايتىنا سىلتەمە جاساعان egemen.kz ءتىلشىسى حابارلادى. جول-كولىك وقيعاسى 16 اقپان كۇنى ءتۇس اۋا اقتاۋ قالاسىنىڭ 12 جانە 13-شاعىن اۋداندارى ارالىعىندا بولعان. كۋاگەرلەردىڭ ايتۋىنشا, Volkswagen Jetta كولىگىنىڭ جۇرگىزۋشىسى جاياۋ جۇرگىنشىلەر جولى ماڭىنا توقتاعان. وسى كەزدە ونىڭ سوڭىنان كەلە جاتقان Toyota Camry كولىگى كۇتپەگەن مانەۆر جاساپ, Volkswagen-ءنىڭ ۇستىنە شىعىپ كەتەدى. ناقتى ايتقاندا, ارتقى كولىكتىڭ جولاۋشىلار جاعىنداعى الدىڭعى دوڭگەلەگى الدىڭعى كولىكتىڭ جۇرگىزۋشى جاق تەرەزەسىنەن سالونعا كىرىپ كەتەدى. وقيعا سالدارىنان جاپا شەككەندەر بولماعان جانە وقيعا ورنىنا ءۇش ارنايى جول-پاترۋلدىك پوليتسياسى كولىكتەرى كەلىپ جەتكەن. جول-پاترۋلدىك پوليتسياسى قىزمەتكەرلەرىنىڭ حابارلاۋىنشا, وقيعانىڭ سحەماسى قۇرىلىپ, Toyota Camry كولىگىنىڭ جۇرگىزۋشىسىنە حاتتاما تولتىرىلعان. گۇلايىم شىنتەمىرقىزى. دەرەك, سۋرەت: lada.kz.