قىزىلوردا وبلىسىندا باسپانا كەزەگىندەگىلەردىڭ سانى 17 پايىزعا ازايدى

قىزىلوردا. 17 اقپان. وتكەن جىلى وبلىستا 460 مىڭ شارشى مەتر تۇرعىن ءۇي بەرىلدى. بۇل تۋرالى قىزىلوردا وبلىسىنىڭ اكىمى قىرىمبەك كوشەرباەۆتىڭ حالىق الدىندا ەسەپ بەرگەن كەزدە ايتقان اقپارى بويىنششا egemen.kz ءتىلشىسى حابارلادى. بۇل 2014 جىلمەن سالىستىرعاندا 1,5 ەسەگە ارتىق. مەملەكەت قارجىسى ەسەبىنەن سالىنعان تۇرعىن ءۇي كولەمى 3,5 ەسەگە, ال قىزىلوردا قالاسىنداعى تۇرعىن ءۇي قۇرىلىسى – 8 ەسەگە ءوستى, پاتەرگە كەزەككە تۇرعاندار سانى 17 پايىزعا ازايدى.  2015 جىلى وبلىستا جالپى سانى 4 مىڭ 227 پاتەر سالىندى.  جالپى, وڭىرلەردى دامىتۋ باعدارلاماسى شەڭبەرىندە 2015 جىلى تەك مەملەكەت قاراجاتى ەسەبىنەن 138,8 مىڭ شارشى مەتر تۇرعىن ءۇي, اتاپ ايتساق 1740 پاتەرلى 42 ءۇي پايدالانۋعا بەرىلدى. وعان قوسا, ءتۇرلى قارجى كوزدەرىنەن ءزاۋلىم ۇيلەر تۇرعىزىلسا, جالپى اۋماعى 357 مىڭ شارشى مەتر 2345 جەكە تۇرعىن ءۇي سالىندى. «سوڭعى ءۇش جىلدا قىزىلوردا وبلىسىندا 8901 پاتەر سالىنىپ, تاپسىرىلدى. بۇل – جىلدار بويى جەكە باسپانا كۇتكەن, اسىل ارماندارىنا جەتىپ, قونىس تويىن تويلاعان وتباسىنىڭ سانى. ءبىز وسى قارقىندى بيىل دا ساقتاپ قالۋ ءۇشىن «قازاقستان يپوتەكالىق كومپانياسى», «سامرۇق-قازىنا» جىلجىمايتىن م ۇلىك قورى» جانە «تۇرعىن ءۇي قۇرىلىسى جيناق بانكىمەن» قويان-قولتىق جۇمىس ىستەيمىز. بۇيىرتسا, بيىل دا بىلتىرعىدان كەم ەمەس كولەمدە قۇرىلىس جۇرەدى», دەدى وبلىس اكىمى قىرىمبەك كوشەرباەۆ. «قازاقستان يپوتەكالىق كومپانياسى» يپوتەكالىق ۇيىمى» ارقىلى «سپمك-70» مولتەك اۋدانىندا 270 پاتەرلىك 5 تۇرعىن ءۇيدىڭ, «سامۇرىق قازىنا» جىلجىمايتىن م ۇلىك قورىنىڭ باعدارلاماسى شەڭبەرىندە شۇكىروۆ كوشەسىندە 210 پاتەرلىك 6 تۇرعىن ءۇي جانە قىزىلوردا قالاسى تيتوۆ كەنتىندە جاس وتباسىلارعا 180 پاتەرلىك 3 تۇرعىن ءۇي قۇرىلىسى باستالدى. وسى 14 ءۇيدىڭ قۇرىلىسى بيىل اياقتالادى. ەرجان بايتىلەس. دەرەك, سۋرەت: egemen.kz