قىزىلوردا. 17 اقپان. قىزىلوردا وبلىسىندا دەنساۋلىق ساقتاۋ سالاسىنا سوڭعى ءۇش جىلدا 92 ميلليارد تەڭگە قارجى ءبولىندى. قازىر ءبىر تۇرعىنعا شاققانداعى شىعىستار كولەمى بويىنشا وبلىس استانا قالاسىنان كەيىنگى ەكىنشى ورىندا. بۇل تۋرالى قىزىلوردا وبلىسىنىڭ اكىمى قىرىمبەك كوشەرباەۆتىڭ حالىق الدىندا ەسەپ بەرگەن كەزدە ايتقان اقپارى بويىنشا egemen.kz ءتىلشىسى حابارلادى.
ايتا كەتەيىك, سىر وڭىرىندە ءۇش جىلدا 35 جاڭا دەنساۋلىق ساقتاۋ مەكەمەسى سالىندى. سونىڭ ناتيجەسىندە, وبلىستا جالپى ءولىم-ءجىتىم 14,7 پايىزعا, ءسابي ءولىمى 5 پايىزعا, جالپى اۋرۋشاڭدىق 5,6 پايىزعا, ال تۋبەركۋلەزدەن بولاتىن ءولىم سانى 21 پايىزعا تومەندەدى.
اسىرەسە, دارىگەر مامانداردىڭ بىلىگى مەن كاسىبي دەڭگەيىن كوتەرۋگە ەرەكشە دەن قويىلادى. وسى ماقساتتا وتكەن جىلى وبلىستىق مەديتسينالىق ورتالىق جانىنان س.اسفەندياروۆ اتىنداعى ۇلتتىق مەديتسينالىق ۋنيۆەرسيتەتتىڭ فيليالى اشىلدى.
وتكەن جىلدىڭ وزىندە جالاعاش كەنتىندە اۋىسىمىنا 250 كەلۋشىگە ارنالعان اۋداندىق ەمحانا جانە ارال اۋدانىنىڭ سەكسەۋىل كەنتىندە اۋىسىمىنا 100 كەلۋشىگە ارنالعان اۋىلدىق ەمحانا پايدالانۋعا بەرىلدى. بۇل اۋىل تۇرعىندارى ءۇشىن مەديتسينالىق كومەكتىڭ ساپاسىن جانە قولجەتىمدىلىگىن ارتتىردى. سونىمەن قاتار, جاڭاقورعان اۋدانىنىڭ تۇگىسكەن اۋىلىندا دارىگەرلىك امبۋلاتوريانىڭ جانە جاڭاقورعان كەنتىندەگى اۋىسىمىنا 250 كەلۋشىگە ارنالعان اۋداندىق ەمحانانىڭ قۇرىلىسى باستالدى. قىزىلوردا قالاسىندا 200 توسەككە شاقتالعان وبلىستىق كوپسالالى بالالار اۋرۋحاناسىنىڭ قۇرىلىسى جالعاسۋدا.
ەرجان بايتىلەس.
دەرەك, سۋرەت: egemen.kz
