قىزىلوردادا تاۋ-كەن بايىتۋ كومبيناتىنىڭ جۇمىسى باستالدى

قىزىلوردا. 17 اقپان. جاڭاقورعان اۋدانىنداعى «شالكيا» قورعاسىن-مىرىش كەن ورنىن قالپىنا كەلتىرۋ جۇمىستارى اياقتالىپ, تاۋ-كەن بايىتۋ كومبيناتىن سالۋ جۇمىستارى باستالدى. بۇل تۋرالى egemen.kz ءتىلشىسى حابارلادى. سالتاناتتى شاراعا ايماق تۇرعىندارى قىزىلوردا وبلىسىنىڭ اكىمى قىرىمبەك كوشەرباەۆتىڭ ەسەپ بەرۋ كەزدەسۋىندە تەلەكوپىر ارقىلى كۋا بولدى. «شالقيا» پوليمەتاللدىق كەن ورنىن ونەركاسىپتىك بايىتۋ جانە تاۋ-كەن بايىتۋ كومبيناتىنىڭ قۇرىلىسى  ءۇش جىلعا ەسەپتەلگەن. ياعني, 2019 جىلى اياقتالۋى ءتيىس. بۇل قۇرىلىس اياسىندا قۋاتى 2 ملن. توننا تاۋ-كەن بايىتۋ كومبيناتىنىڭ  ءبىرىنشى  كەزەگى جانە گازوتۋربينالىق ەلەكتروستانتسياسى سالىنادى. قۇرىلىسقا مىڭعا جۋىق ادام تارتىلاتىن بولادى. 2018 جىلدىڭ ءى توقسانىندا – كەن-بايىتۋ كومبيناتىنىڭ العاشقى كەزەگىن ىسكە قوسىلادى. سونىمەن بىرگە كەن ورنىندا گيدرومەتاللۋرگيالىق زاۋىت سالۋ جوباسىنىڭ تەحنيكالىق-ەكونوميكالىق نەگىزدەمەسىن دايىنداۋ جۇمىستارى باستالدى. «كاسىپورىن نارىقتا سۇرانىسقا يە جاڭا ءونىم تۇرلەرىن شىعارىپ, ونى ىشكى جانە سىرتقى نارىققا ساتامىز. بۇل ءوڭىر ەكونوميكاسىن دامىتۋعا ۇلكەن سەپتىگىن تيگىزەدى. وسىنداي جاۋاپتى جۇمىستا ەل سەنىمىن اقتاۋعا بار كۇش-قۋاتىمىزدى سالامىز دەپ سىزدەردى سەندىرگىم كەلەدى», دەيدى «شالقيا تسينك» اكتسيونەرلىك قوعامىنىڭ باسقارما توراعاسى بولات رامازانوۆ. ايتا كەتەيىك, بۇل جوبا يندۋستريالاندىرۋ باعدارلاماسىنىڭ ەكىنشى كەزەڭى اياسىندا جۇزەگە اسىرىلۋدا. «وبلىستاعى مەتاللۋرگيا جوبالارىنا زور ءۇمىت ارتاتىنىمىزدى ايتتىم. جاڭا وزدەرىڭىز كورگەن “شالقيادان” بولەك, وسى باعىتتا جاسالىپ جاتقان فەرروقورىتپا زاۋىتىنىڭ تەحنيكالىق ەكونوميكالىق نەگىزدەمەسىن ازىرلەۋ جۇمىستارى بيىلعى جىلدىڭ العاشقى جارتىسىندا اياقتالىپ, كاسىپورىن قۇرىلىسىنا دايىندىق جۇمىستارىن باستايمىز. سونداي-اق, «بالا-ساۋىسقاندىق» ۆاننادي كەن ورنىن يگەرۋ جۇمىستارى جالعاسىن تابادى. بۇل جوبا بويىنشا وندىرىستىك-ساراپتاۋ جۇمىستارى اياقتالىپ, بيىل كاسىپورىن قۇرىلىسى باستالماق. جىلدىڭ اياعىنا دەيىن ماشينا جاساۋ زاۋىتى جوباسىنىڭ قۇجاتتارىن دايىنداۋدى اياقتايمىز. قارماقشى اۋدانىنداعى مۇناي تەرمينالىنىڭ نەگىزىندە از توننالىق مۇناي وڭدەيتىن كاسىپورىن قۇرۋ جوباسىنىڭ قۇجاتتارىن دايىنداۋعا كىرىستىك. بيىل ايماقتا تسەمەنت, پوليپروپيلەن, سيليكات كىرپىشى, اسفالت بەتون وندىرەتىن جانە سۋ شىعاراتىن زاۋىتتار قۇرىلىسىن باستاۋ جوسپارلانعان», دەدى وبلىس اكىمى قىرىمبەك كوشەرباەۆ. ەرجان بايتىلەس. دەرەك, سۋرەت: egemen.kz