قىزىلوردا. 17 اقپان. قىزىلوردا وبلىسى اكىمى قىرىمبەك كوشەرباەۆتىڭ حالىق الدىندا ەسەپ بەرۋ كەزدەسۋىندە تەلەكوپىر ارقىلى ارال اۋدانىندا پوليمەر تسەحى ىسكە قوسىلدى. تسەح تەحنيكالىق تۇز ءوندىرىسىن ۇلعايتۋ جوباسىنىڭ ءبىر بولىگى. بۇل تۋرالى egemen.kz ءتىلشىسى حابارلادى.
«ءبىزدىڭ باستى ماقساتىمىز – ەگەمەن ەلىمىزدى, سىر ەلىن دامىتۋعا, حالقىمىزدىڭ الەۋمەتتىك جاعدايىن جاقسارتۋعا اتسالىسۋ. ءوندىرىستى ءوسىرىپ, جاڭا جۇمىس ورىندارىن قۇرعان وسى پوليمەر تسەحىنىڭ قوسىلۋى سول باعىتتاعى ۇلكەن ءبىر قادام. بۇگىن ءبىز وسى قۋانىشتى اۋدان حالقىمەن جانە وزدەرىڭىزبەن بولىسكەنىمىزگە قۋانىشتىمىز», دەدى تەلەكوپىر ارقىلى بايلانىسقا شىققان «ارالتۇز» اق پرەزيدەنتى ايدىنبەك تاۋاساروۆ.
يندۋستريالىق-يننوۆاتسيالىق دامۋدىڭ مەملەكەتتىك باعدارلاماسى اياسىندا ارال اۋدانىندا «تەحنيكالىق تۇز ءوندىرىسىن ۇلعايتۋ» جوباسى ىسكە اسىپ وتىر. جوباعا ەكى جارىم ميلليارد تەڭگەنىڭ ۇستىندە ينۆەستيتسيا سالىندى جانە دۇنيەجۇزى بويىنشا تۇز وندىرۋگە ارنالعان ەڭ جاقسى, يسپانيالىق («Construcciones Mecanicas J.SERRA, S.A.») قۇرال-جابدىق الىندى.
بۇعان دەيىن زاۋىت ونىمدىلىگى جىلىنا 120,0 مىڭ. توننا بولسا, جاڭا زاۋىتتى ىسكە قوسۋ ارقىلى ونىمدىلىكتى 1,7 ەسەگە ۇلعايتۋعا مۇمكىندىك الدى. بۇرىن «ارال تۇز» ىشكى نارىقتا اس تۇزىنىڭ 70 پايىزىن قامتىسا, جاڭا زاۋىتتى ىسكە قوسۋ ارقىلى ول ۇلەس 90 پايىزعا دەيىن جەتتى. سايكەسىنشە, سىرتقى نارىقتاعى ۇلەس تە ۇلعايۋدا. جاڭادان 300-دەن استام جۇمىس ورنىن قۇرۋ كوزدەلگەن, قازىر سونىڭ 150-ءۋى قۇرىلىپ, زاۋىتتا بارلىعى 800-دەن اسا جۇمىسشى قىزمەت اتقارۋدا.
سونىمەن بىرگە, كاسىپورىن حيميا ونەركاسىبىن دامىتۋ ماقساتىندا قۇنى 220 ملن. دوللار قۇرايتىن كالتسيلەندىرىلگەن سودا جانە كىر جۋعىش ۇنتاق شىعارۋ جوبالارىن جوسپارلاۋدا.
ەرجان بايتىلەس.
دەرەك, سۋرەت: egemen.kz
