قىزىلوردا. 17 اقپان. قىزىلوردا وبلىسى حالىقارالىق قارجى ۇيىمدارى جانە «مەملەكەتتىك-جەكەمەنشىك ارىپتەستىك» نەگىزىندە 333 ملرد. تەڭگە بولاتىن 31 جوبانى ىسكە اسىرماق. بۇل تۋرالى قىزىلوردا وبلىسىنىڭ اكىمى قىرىمبەك كوشەرباەۆتىڭ حالىق الدىندا ەسەپ بەرۋ كەزدەسۋىندە ايتقان اقپار بويىنشا egemen.kz ءتىلشىسى حابارلادى.
«اشىعىن ايتقاندا, حالىقارالىق قارجى نارىقتارى مەن ۆاليۋتالىق جۇيەنىڭ اسا تۇراقسىز كەزەڭىندە سىرتتان قاراجات تارتۋ دا قيىنداپ بارادى. دەگەنمەن, بارىمىزدى سالىپ, اتالعان جوبالاردى ىسكە اسىرۋعا بەكىندىك. وعان مۇمكىندىك بار, ينۆەستورلاردىڭ ءبىزدىڭ جوبالارعا دەگەن قىزىعۋشىلىعى ءالى دە جوعارى», دەدى قىزىلوردا وبلىسىنىڭ اكىمى قىرىمبەك كوشەرباەۆ.
سوڭعى ءۇش جىلدا وتكىزىلگەن التى “بايقوڭىر” ينۆەستيتسيالىق فورۋم اياسىندا بارلىعى 70-تەي ارىپتەستىك تۋرالى شارتتار مەن مەموراندۋمدارعا قول قويىلدى. سونىڭ ارقاسىندا وبلىس ەكونوميكاسىنا 100 ملرد. تەڭگەدەن استام تىكەلەي ينۆەستيتسيا تارتىلدى.
ايماقپەن بىرىگىپ جۇمىس ىستەپ جاتقان ۇيىمدار قاتارىندا ەۋروپالىق قايتا قۇرۋ جانە دامۋ بانكى, ازيالىق دامۋ بانكى, يسلام دامۋ بانكى, حالىقارالىق قايتا قۇرۋ جانە دامۋ بانكى, حالىقارالىق قارجى كورپوراتسياسى (“IFC”) بار.
ەۋروپالىق قايتا قۇرۋ جانە دامۋ بانكىمەن بىرلەسكەن 8 جوبا بار, ونىڭ جەتەۋى وبلىس ورتالىعى - قىزىلوردا قالاسىنىڭ ينفراقۇرىلىمىن دامىتۋعا ارنالعان. ولاردىڭ قاتارىندا قىزىلوردا قالاسىنىڭ جىلۋ جۇيەسىن جاڭارتۋ; شيەلى, جاڭاقورعان اۋداندارى مەن قىزىلوردا قالاسىنداعى تەمىر جولدىڭ ارعى بولىگىنىڭ ەلەكتر جۇيەلەرىن جاڭارتۋ; قىزىلوردا قالاسىن سۋمەن قامتۋ جانە سۋ بۇرۋ جۇيەسىن قايتا قۇرۋ; جانە قالاداعى اۆتوبۋس پاركىن سالۋ سياقتى جوبالار بار.
حالىقارالىق يسلام قارجى ۇيىمدارى جانە ازيا دامۋ بانكىمەن ينفراقۇرىلىمدىق, يندۋستريالىق, اۋىل شارۋاشىلىعى, سونداي-اق تۇرعىن ءۇي جوبالارىن ىسكە اسىرۋ توڭىرەگىندە كەلىسسوزدەر جۇرگىزىلۋدە.
اتاپ ايتقاندا, ازيا دامۋ بانكىمەن قىزىلوردا قالاسىنىڭ سول جاعالاۋىن دامىتۋعا قاجەتتى ينجەنەرلىك ينفراقۇرىلىم, تۇرعىن ءۇي جانە الەۋمەتتىك-تۇرمىستىق نىسانداردى سالۋ جوبالارىن كەزەڭ-كەزەڭمەن ىسكە اسىرۋ مۇكىندىكتەرى قاراستىرىلۋدا.
ازيا دامۋ بانكى بۇل جوبانى “اقىلدى” قالانى («SMART CITY») دامىتۋعا باعىتتالعان ينفراقۇرىلىمدىق كەشەندى باعدارلاما رەتىندە ىسكە اسىرۋ تۋرالى ۇسىنىس ەنگىزدى.
«قازاقستاندىق مەملەكەتتىك-جەكەشەلىك ارىپتەستىك ورتالىعى» اكتسيونەرلىك قوعامى قىزىلوردا وبلىسىن مەملەكەتتىك-جەكەمەنشىك ارىپتەستىكتى دامىتۋداعى پيلوتتىق ءوڭىر رەتىندە بەلگىلەدى. سونىڭ اياسىندا «مەملەكەتتىك-جەكەمەنشىك ارىپتەستىك جوبالارىن سۇيمەلدەۋ ورتالىعىمەن» بىرلەسىپ 5 جوباعا ينۆەستورلار تارتۋ جۇمىستارى جۇرگىزىلۋدە. اتاپ ايتقاندا, اۋىسىمىنا 500 ادام قابىلدايتىن ەمحانا, قىزىلوردا قالاسىندا سالىناتىن كاسىپتىك-تەحنيكالىق ليتسەي, وبلىس ورتالىعى اۋەجايىنىڭ جولاۋشىلار تەرمينالىنىڭ قۇرىلىسى, اپاتتىق جاعدايداعى مەكتەپتەردىڭ ورنىنا 11 مەكتەپ سالۋ, سونىمەن بىرگە سىرداريا اۋدانىنىڭ تۇرعىندارىن ساپالى اۋىز سۋمەن قامتۋ جوبالارى.
ەرجان بايتىلەس.
دەرەك, سۋرەت: egemen.kz
