قىزىلوردا. 17 اقپان. وتكەن جىلى قىزىلوردا وبلىسىندا «بيزنەستىڭ جول كارتاسى-2020» باعدارلاماسى شەڭبەرىندە وندىرىستىك ينفراقۇرىلىمدى دامىتۋعا جانە كاسىپكەرلىكتى قولداۋعا 2,6 ملرد. تەڭگە ءبولىندى. الدىڭعى جىلمەن سالىستىرعاندا 77 پايىزعا كوپ. بۇل تۋرالى قىزىلوردا وبلىسىنىڭ اكىمى قىرىمبەك كوشەرباەۆتىڭ حالىق الدىنداعى ەسەپتى كەزدەسۋىندە ايتقان اقپارى بويىنشا egemen.kz ءتىلشىسى حابارلادى.
باعدارلاما اياسىندا قولعا الىنعان يندۋستريالىق ايماقتاردى قۇرۋ جانە دامىتۋ باستاماسى جالعاسىن تاپتى. ارال, قازالى, جالاعاش جانە شيەلى اۋداندارى مەن قىزىلوردا قالاسىندا قۇرىلعان يندۋستريالىق ايماقتارعا ينجەنەرلىك ينفراقۇرىلىم تارتىلىپ, ينۆەستيتسيالىق جوبالاردى ىسكە اسىرۋعا قولايلى جاعداي جاسالدى. سونىڭ ناتيجەسىندە 2015 جىلى اتالعان ايماقتاردا جالپى قۇنى 2 جارىم ميلليارد تەڭگەدەن اساتىن 16 جوبا ىسكە استى.
سىرداريا جانە جاڭاقورعان اۋداندارىندا يندۋستريالىق ايماقتى قۇرۋدىڭ جوبالىق-سمەتالىق قۇجاتتارى ازىرلەنىپ, ءتيىستى جەر تەلىمدەرى ءبولىندى. تۋريستىك ينفراقۇرىلىمدى, ونىڭ ىشىندە قارماقشى اۋدانى تورەتام كەنتىندە يندۋستريالدى-تۋريستىك ايماقتى دايىنداۋ جۇمىستارى باستالدى. 2014 جىلدىڭ اياعىندا اۋىلدىق جەرلەردە بيزنەسىن جاڭادان باستاۋشى كاسىپكەرلەرگە قولداۋ كورسەتۋ تەتىگى رەتىندە «وڭىرلىك ينۆەستيتسيالىق ورتالىق» قۇرىلدى. وتكەن جىلى وڭىرلىك ينۆەستيتسيالىق ورتالىق بارلىق اۋدانداردا بەلسەندى جۇمىس ىستەپ, جالپى قۇنى 342,1 ملن. تەڭگە 56 جوبانى قارجىلاندىردى, جاڭادان 223 جۇمىس ورنى اشىلدى.
«بۇل نەگىزىنەن شاعىن, 3-5 ادام جۇمىس ىستەيتىن ناۋبايحانا مەن كونديتەرلىك تسەحتار, تەحنيكالىق قىزمەت كورسەتۋ بەكەتتەرى مەن تىگىن شەبەرحاناسى سەكىلدى قاراپايىم باستامالار. بىراق وزدەرى شاعىن بولعانىمەن, تاپ وسى ورتا بولاشاقتا ەكونوميكانىڭ نەگىزگى تىرەگىنە اينالادى. سوندىقتان مەملەكەت بۇل جۇمىستى جالعاستىرادى. ال قوعام ونى جان-جاقتى قولداپ, ناسيحاتتاۋ ارقىلى جاڭا, جاس كاسىپكەرلەردىڭ كوپتەپ پايدا بولۋىنا كومەكتەسۋى قاجەت», دەدى وبلىس اكىمى قىرىمبەك كوشەرباەۆ.
جوعارىدا اتالعان شارالاردىڭ ناتيجەسىندە وتكەن جىلى ايماقتا تىركەلگەن كاسىپكەرلەر سانى 7,8 پايىزعا ارتتى. بۇل ەلىمىزدەگى ەڭ جوعارى كورسەتكىشتەردىڭ ءبىرى.
ەرجان بايتىلەس.
دەرەك, سۋرەت: egemen.kz
