«جان-ارايدىڭ» جۇمىسى جايناپ تۇر

بىلتىر ەلباسى قىزىلوردا وبلىسىنا ارنايى ساپار جاسادى. سول كەزدە مەملەكەت باسشىسىنىڭ قاتىسۋىمەن «جان-اراي» قۇراماجەم زاۋىتى اشىلدى. اتالمىش ءون­دىرىستىڭ ومىرگە تىكەلەي جولداما الۋىنا مەملەكەتتىڭ تاراپىنان زور قولداۋ بولدى دەسەك, ارتىق ايتقاندىق ەمەس. سەبەبى, «جان-اراي» قۇراماجەم زاۋىتى «بيزنەستىڭ جول كارتاسى-2020» باعدارلاماسى اياسىندا جۇزەگە اسىرىلعان جوبالاردىڭ ءبىرى. بىلتىر ىسكە قوسىلعان ءوندىرىس ورنىندا بۇگىندە قىزۋ تىرلىك ءجۇرىپ جاتىر. شارۋاشىلىقتاردىڭ سۇرانىسىن قاناعاتتاندىرۋعا بەل شەشە كىرىسكەن زاۋىت كۇنى-ءتۇنى جۇمىس ىستەپ تۇر. «ءوندىرىس ورنى اشىلعالى 175 توننا جەم وندىرىلگەن. ونىڭ 100 تونناسى نارىققا جونەلتىلدى», دەيدى قۇراما جەم زاۋىتىنىڭ باس تەحنولوگى. كاسىپورىنعا قاجەتتى شيكىزات, ياعني كۇرىش, بيداي, كۇنباعىس سەكىلدى ونىمدەر جەرگىلىكتى شارۋاشىلىقتاردان الىنۋدا. ال شىمكەنت, تۇركىستاننان جۇگەرى مەن كۇن­جارا تاسىمالدانىپ تۇرادى ەكەن. ايماق شارۋالارى جىلىنا 60 مىڭ توننا مال ازىعىن تۇتىناتىنىن ەسكەرسەك, زاۋىت سول سۇرانىستى قاناعاتتاندىرۋعا جۇمىس جاساۋدا. زاۋىتتىڭ باس تەحنولوگى قۋات شاكيزاداەۆتىڭ ايتۋىنشا, ءوندىرىس ورنى وندىرگەن جەمگە شارۋاشىلىقتاردان سۇرانىس جوعارى. ءونىمنىڭ 60-70 پايىزى ايماقتاعى شارۋاشىلىقتارعا تاراتىلسا, 30-40 پايىزى كورشى وقو, جام­بىل, اقتوبە وبلىستارىنا شىعارىلىپ جاتىر. كوبىنەسە شارۋا قوجالىقتارى جەمدى بورداقىلانعان مال, ساۋىن سيىرلار مەن ۇساق مالدارعا تۇتىنادى. قازاقستاندىق 5 ستاندارت بويىنشا وندىرىلەتىن مال ازىعى جيىنتىعىن الداعى ۋاقىتتا ەلىمىزدىڭ باسقا وڭىرلەرىنە دە ەكسپورتتاۋ جوسپاردا بار. زاۋىتتا جەمنەن بولەك سىر مارجانىن دا اقتايدى. كۇرىش تسەحى تاۋلىگىنە 120-130 توننا كۇرىش وڭدەپ شىعادى. ءوندىرىس ورنىندا قارا كۇرىشتى تازالاۋ, اقتاۋ, قاپقا سالۋ جۇمىستارىنىڭ بارلىعى زاماناۋي تەحنولوگيالارمەن اتقارىلادى. سىر سالىسىنىڭ مارجان, يانتار, ليدەر, دياموند اتتى سۇرىپتارى 5 كەلىدەن باستاپ 10, 25, كەيدە تاپسىرىسقا وراي 50 كەلىلىك قاپقا دەيىن ولشەنىپ, نارىققا جىبەرىلەدى. سىردىڭ برەند داقىلى بۇگىندە الىس-جاقىن شەتەلدىكتەردىڭ قازانىندا قايناپ جاتىر. كۇرىش اقتاۋ تسەحىنىڭ مەحانيگى باقىتجان تۋمىرزاەۆ, «اپتاسىنا 5-6 ۆاگون اقتالعان كۇرىشتى كورشى مەملەكەتتەرگە جىبەرىپ جاتىرمىز. ولاردىڭ قاتارىندا وزبەكستان, قىرعىزستان, رەسەي بار. بولاشاقتا تمد اۋماعىنداعى مەملەكەتتەر مەن شەتەلدەرگە شىعارۋدى كوزدەپ وتىرمىز. ەندى ەكسپورتتىڭ كولەمىن ءبىر ساتكە دە تۇسىرمەيمىز», دەيدى. قانشالىقتى قارجىلىق ەكونوميكالىق قيىنشىلىق بولسا دا, ءوندىرىس نىسانىندا تىرلىكتىڭ قىزۋ قارقىنى بايقالادى. اۋىسىممەن ەڭبەك ەتەتىن 30 جۇمىسشىعا جالا­قى ۋاقىتىلى بەرىلىپ تۇر. داعدارىسقا دەس بەرمەيتىن كاسىپورىندا, جۇمىستان قىسقارتۋ دەگەن ۇعىم جوق. زاۋىت اۋماعىندا كۇندەلىكتى 150 توننا كۇرىش وڭدەيتىن قۇرال-جابدىق, دايىن ءونىم مەن شيكىزات ساقتايتىن قويمالار, اۆتوتارازى, زەرتحانا, قاپتاما تسەحى, ۇن تارتاتىن ديىرمەن مەن ماكارون ونىمدەرىن شىعاراتىن قۇرىلعى بار. زاۋىتتاعى بارلىق قۇرال-جابدىق PETKUS Technologie GmbH نەمىس كومپانياسىنىڭ ونىمدەرى. گەرمانيادان جەتكىزىلگەن قۇرىلعىلاردا ارنايى ماشىقتانعان ماماندار جۇمىس ىستەيدى. ايماقتا كاسىپكەرلىكتىڭ دامۋى ارتىپ, شاعىن جانە ورتا بيزنەس سۋبەكتىلەرىنىڭ كوپتەپ اشىلۋى – مەملەكەتتىك قولداۋدىڭ جەمىسى. الەۋەتى وراسان «جان اراي» جەم زاۋىتى بولاشاعى تۇراقتى كاسىپورىننىڭ ءبىرى سانالادى. ەرجان بايتىلەس, «ەگەمەن قازاقستان». قىزىلوردا وبلىسى.