زيالى قاۋىم وكىلدەرىمەن كەزدەستى

الماتى قالاسىنداعى دوستىق ۇيىندە قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەدي ۇلى شىعارماشىلىق جانە زيالى قاۋىم وكىلدەرىمەن كەزدەستى. مينيسترمەن وتكەن كەزدەسۋگە كسرو جانە قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى ءاسانالى ءاشىموۆ, قازاقستاننىڭ ەڭبەك سىڭىرگەن قايراتكەرى, مەملەكەتتىك رەسپۋبليكالىق كورەي كومەديا تەاترىنىڭ ديرەكتورى ليۋبوۆ ني, كورنەكتى جازۋشى سماعۇل ەلۋباي, قازاقستان رەسپۋبليكاسى ۇلتتىق كىتاپحاناسىنىڭ ديرەكتورى الىبەك اسقار, سونداي-اق, تەاتر, ادەبيەت, مۋزىكا جانە كينەماتوگرافيا سالاسىنىڭ, بەينەلەۋ جانە قولونەر, تاريح پەن ارحەولوگيا سالالارىنىڭ تانىمال تۇلعالارى قاتىستى. كەلەلى كەڭەستىڭ باستى تاقىرىپتارىنىڭ ءبىرى ەلباسى بەلگىلەگەن 5 ينستيتۋتتىق رەفورمانى ىسكە اسىرۋدىڭ «100 ناقتى قادام» ۇلت جوسپارىنىڭ ورىندالۋ بارىسى مەن وعان ونەر, مادەنيەت قايراتكەرلەرى قوسار ۇلەس پەن باعىت-باعدار حاقىندا بولدى. بۇل جونىندە رەسپۋبليكالىق ۇلتتىق كىتاپحانا باسشىسى الىبەك اسقار «جوسپاردىڭ نەگىزگى باعىتتارىن ساپالى جانە مەرزىمىندە ورىنداۋ – قازاقستاندىق قوعامنىڭ جارقىن دا جەمىستى بولاشاعى جولىندا جان-جاقتى وركەندەۋدىڭ جاڭا كەزەڭىنە ەسىك اشاتىندىعىن» سيپاتتاي وتىرىپ, ەلىمىزدىڭ بۇگىنگە دەيىنگى قول جەتكىزگەن جەتىستىكتەرى مەن جەڭىستى قادامىن ناقتى مىسالدارمەن بايانداپ ءوتتى. ناۋرىز ايىندا ەلىمىزدە وتەتىن پارلامەنت ماجىلىسىنە كەزەكتەن تىس وتكىزىلگەلى وتىرعان سايلاۋ ناۋقانى تۋرالى اڭگىمە دە بۇل كەزدەسۋدە كۇن تارتىبىنە ساي قوزعالدى. ەل زيا­لىلارى بۇل ماڭىزدى ناۋقانعا ءوز ۇلەستەرىن قوسىپ, سايلاۋالدى جۇمىستار جۇرگىزىلە باستاعان تۇستا كەڭىنەن قولداۋ كورسەتە وتىرىپ, حالىقتى سايلاۋعا جۇمىلا قاتىسۋعا شاقىراتىندىعىن, ەل ەرتەڭى مەن كەمەل كەلەشەك ءۇشىن تاريحي شەشۋشى ساتكە بەلسەنە ارالاسۋعا سايلاۋشىلاردى ۇندەيتىندىگىن تىلگە تيەك ەتتى. مينيستر مەن زيالى قاۋىم وكىلدەرى اراسىندا وتكەن كەزدەسۋ شەڭبەرىندە قوزعالعان تاعى ءبىر ماڭىزدى تاقىرىپ, ياعني ەلىمىزدە تۇڭعىش رەت وتكەلى وتىرعان ايتۋلى مەيرامنىڭ ءبىرى – العىس ايتۋ كۇنىن كەڭ كولەمدە جانە جوعارى دەڭگەيگە ساي مەرەكەلەۋ ماسەلەسى دە بولدى. ارىستانبەك مۇحامەدي ۇلى مينيسترلىك تاراپىنان بۇگىنگى تاڭدا ەلىمىزدەگى بارلىق ەتنوس وكىلدەرىنىڭ ءبىر-بىرىنە العىس سەزىمىن ءبىلدىرۋ مەن قايىرىمدىلىق كورسەتۋگە باستايتىن ۇلىق مەرەكەنى ۇيىمداستىرۋ مەن دايىندىق جۇمىستارى قىزۋ جۇرگىزىلىپ جاتقانىن جەتكىزدى. بۇل كۇنى بۇكىل ەل كولەمىندە كوپتەگەن مادەني-بۇقارالىق ءىس-شارالار, تەا­تر ساحنالارى مەن كينوتەاترلاردا ارنايى قويىلىمدار مەن فيلمدەر كورسەتىلىپ, وتاندىق كىتاپحانالار مەن مۇراجايلاردا كورمەلەر ۇيىمداستىرىلاتىندىعى, ءتۇرلى دەڭگەيدەگى كەزدەسۋلەر مەن كونفەرەنتسيالار وتكىزىلەتىندىگىن اتاپ ءوتتى. – ەلباسى نۇرسۇلتان نازارباەۆتىڭ 2016 جىلعى 14 قاڭ­تارداعى جارلىعىمەن حالقى­مىزدىڭ اۋىزبىرشىلىگى مەن تاتۋ­لىعىنىڭ ۇيىتقىسى بولعان قازاق­ستان حالقى اسسامبلەياسى قۇرىلعان كۇن – 1 ناۋرىز ەلىمىزدە العىس ايتۋ كۇنى بولىپ بەكىتىلگەندى. مەملەكەت باسشىسى قازاقستان ازاماتتارىنا ارناعان سوزىندە: «بۇل كۇن بارشا قازاقستاندىقتاردىڭ ءبىر-بىرىنە دەگەن قايىرىمدىلىق, دوستىق پەن ىستىق سەزىمدەرىنىڭ شىنايى مەرەكەسىنە اينالۋى ءتيىس», – دەگەن جىلى لەبىزى ەلىمىزدەگى بارشا ۇلت وكىلدەرىنىڭ باۋىرلاستىعىن ارتتىرا تۇسەرى انىق. مەرەكەنىڭ بارلىق شارالارى قازاقستان حالقىنىڭ بىرلىگى مەن ىنتىماعىن ارتتىرۋعا, مەملەكەتتىك ءتىلدى ناسيحاتتاۋعا جانە وسكەلەڭ ۇرپاق بويىندا قازاقستاندىق پاتريوتيزم سەزىمىن تاربيەلەۋگە باعىتتالادى, – دەدى مادەنيەت جانە سپورت ءمينيسترى ارىستانبەك مۇحامەدي ۇلى. قانات ەسكەندىر, «ەگەمەن قازاقستان». الماتى. سۋرەتتى تۇسىرگەن بوريس بۋزين.