جاستاردىڭ ءجۇزى جارقىن

استاناداعى ساكەن سەي­فۋللين اتىنداعى قازاق اگرو­تە­حنيكالىق ۋنيۆەرسي­تەتى­نىڭ وقىتۋشىلارى مەن ستۋدەنت­تەرى «ەگەمەن قازاقستان» رەسپۋب­ليكالىق گازەتىنىڭ جۋرناليس­تەرىمەن كەزدەستى. بۇل كەزدەسۋ «قا­زاق ەلىنىڭ ۇلتتىق يدەياسى – ءماڭ­گىلىك ەل» اتتى تاقىرىپپەن ءوتتى. كەزدەسۋگە «ەگەمەن قازاق­ستان» گازەتىنەن اكتسيونەرلىك قوعام­نىڭ پرەزيدەنتى ساۋىت­بەك ابدراحمانوۆ, گازەت باس رەداك­تورلارىنىڭ ورىنباسارلارى قور­عانبەك امانجول مەن سەيفوللا شايىنعازى, وسى جولداردىڭ اۆتورى قاتىستى. وقۋ ورنىنىڭ رەكتورى, پروفەس­سور اقىلبەك كۇرىشباەۆ ۋنيۆەرسيتەت قاۋىمىنا قوناقتاردى تانىس­تىرا كەلە وقۋ ورنىنىڭ قازىرگى جاعدايى تۋرالى اڭگىمە قوزعادى. س.سەيفۋللين اتىنداعى قازاق اگروتەحنيكالىق ۋنيۆەرسيتەتى استانادا قۇرىلعان تۇڭعىش جوعا­رى وقۋ ورنى بولىپ تابىلادى. 2015 جىلعى تاۋەلسىز اككرەديتاتسيالاۋ اگەنتتىگىنىڭ ساراپتاماسى بويىنشا ۋنيۆەرسيتەت رەسپۋبليكامىزداعى ەڭ ۇزدىك بەس جوعارى وقۋ ورنىنىڭ قاتارىنان ورىن الدى. ال ەلىمىزدەگى اۋىل شارۋاشىلىعى سالاسى ماماندارىن دايارلايتىن جوعارى وقۋ ورىندارى اراسىندا ءبىرىنشى ورىنعا يە بولدى. 2015 جىلى ۋنيۆەرسيتەت ءبىلىم بەرۋ باعدارلاماسىنىڭ ساپاسى جونىنەن دە وسىنداي تاماشا تابىستارعا قول جەتكىزدى. وقۋ ورنىنىڭ 19 وقىتۋشىسى قازاقستاننىڭ توپ-50 ۇزدىك وقىتۋشىلار توبىنا ەندى. ۋنيۆەرسيتەتتىڭ وسىنداي تابىس­قا جەتۋىنە نەگىز قالاپ وتىرعان ءبىر فاكتور – ونىڭ باسشىلىعىنىڭ جاساپ وتىرعان ستراتەگيالىق قيمىل-ارەكەتتەرى دەۋگە كەلەدى. ماسەلەن, وقۋ ورنى اگرارلىق-يننوۆاتسيالىق عىلىمدا دۇنيەجۇزىندە ءبىرىنشى ورىندا تۇرعان اقش-تىڭ دەۆيس قالاسىنداعى كاليفورنيا ۋني­ۆەر­سيتەتىمەن تىعىز قارىم-قاتىناس ورناتقان. «ەگەمەن قازاقستان» گازەتىنىڭ باسشىسى ساۋىتبەك ابدراحمانوۆ ءوز ءسوزىن ماڭگىلىك ەل يدەياسىنان باس­تادى. ۇلتتىق يدەيا دەگەنىمىز – ۇلتتىق سانا-سەزىمنىڭ جۇيەلى جيناقتالۋى ەكەن­دىگىن, سوندىقتان, ۇلتتىق يدەيانىڭ حا­لىقتى تولعاندىراتىن نەگىزگى ماسە­لەلەرگە جاۋاپ بەرەتىندىگىن ايتتى. گازەت رەداكتورىنىڭ ورىنباسارى, اقىن قورعانبەك امانجول ۋني­ۆەرسيتەت اتىن يەلەنىپ وتىرعان ساكەن سەيفۋللين تۋرالى ولەڭىن وقىپ بەردى. كەزدەسۋ بارىسىندا ۋنيۆەرسيتەت شاكىرتتەرى ءجۇزىنىڭ جارقىن ەكەندىگىن بايقادىق. شاكىرتتەر اتىنان ءسوز العان مەيرامبەك بەكتۇرعانوۆ استاناداعى ەڭ ارزان اسحانا, ەڭ ارزان ءدارىحانا, ەڭ ارزان دۇكەن وسى ۋنيۆەرسيتەتتە ەكەندىگىن, ستۋدەنتتەر ءۇشىن ەمحانا جۇمىس ىستەيتىندىگىن, 1000 ورىندىق جاتاقحانا, ۇستازدارعا ارنالىپ كوپپاتەرلى ءۇي سالىنىپ جاتقاندىعىن ايتىپ بەردى. ۋنيۆەرسيتەت پەن گازەت اراسىن­داعى بايلانىس بەكي تۇسپەك. سۇڭعات ءالىپباي, «ەگەمەن قازاقستان». سۋرەتتى تۇسىرگەن ەرلان وماروۆ.