اعايىندى ءابدىراحمانوۆتار

مەملەكەتتىڭ قولداۋى ارقاسىندا اتاكاسىپتى جانداندىرىپ, وزگەلەرگە ۇلگى بولىپ وتىر جارقىن – كۇرە جولدان 20 شا­قىرىمداي قاشىقتىقتا ورنالاسقان قازاق اۋىلدارىنىڭ ءبىرى. وسىنداعى جۇزگە جۋىق وتباسىنىڭ قايسىسى بولسىن قوسالقى شارۋاشىلىقپەن اينالىسادى. سولاردىڭ قاتارىندا اعايىندى ءابدىراحمانوۆتاردى ۇلگى ەتۋگە بولادى. تەپسە تەمىر ۇزەتىن ءۇش اعايىندى جىگىتتىڭ بۇگىنگى تىرلىگى جۇرت قىزىعارلىقتاي. دميتريەۆ اۋىلدىق وكرۋگىنە قارايتىن ەلدى مەكەن ورماندى القاپتارعا, قۇنارلى جايىلىمعا باي. ءتورت ت ۇلىك وسىرۋمەن اينالىسۋشىلارعا تاپتىرمايتىن قونىس. اعايىندى باقىت, مۇرات جانە باۋىرجان ءابدىراحمانوۆتار كەيبىر قاتارلاستارى سياقتى قالاعا ۇمتىلماي, كەرىسىنشە, ون جىلدان بەرى ەدىلباي قويىن, ءىرى قارا مالى مەن جىلقى ءوسىرىپ, مال اسىلداندىرۋ ىسىنە دە جەتە كوڭىل ءبولىپ كەلەدى. شارۋا قوجالىعىنا وتباسىنىڭ كەنجەسى باۋىرجان جەتەكشىلىك ەتەدى. تاياۋدا «مامبەتوۆ جانە ك» كومان­ديتتىك سەرىكتەستىگىنەن 2 باس اسىل تۇقىمدى انگۋس بۇقاسىن ساتىپ الىپتى. ونداعى ويلارى – ەتتى باعىتتاعى مال سانىن كوبەيتۋ. اعايىندى جىگىتتەر اۋىل شا­رۋا­شىلىعىن قارجىلاي قولداۋ قورى ارقىلى 3,3 ميللليون تەڭگە جەڭىلدىكتى نەسيەگە قول جەتكىزىپ, 22 باس قازاقتىڭ اقباس سيىرىن, ەدىلباي قويلارىن, 5 ميلليون تەڭگە ەكىنشى نەسيەگە 35 باس جەرگىلىكتى قارا مالىن اكەلگەن. اۋىل ىرگەسىنەن 10 گەكتار جەر جايىلىم رەتىن جالعا بەرىلگەن. ول ماڭايعا 70 باسقا ارنالعان مال قوراسى سالىنعان. – جاڭا مال قوراسىن كەپىلدىككە قويىپ, 7 جىل مەرزىمگە 4,8 ميلليون تەڭگە نەسيە رەسىمدەدىك. وسى قارجىنىڭ ارقاسىندا   تابىنعا 37 باس ءىرى قارا مالى مەن 1 انگۋس بۇقاسى قوسىلدى. بۇگىنگى كۇنى فەرمامىزدا ءىرى قارا مالىنان باسقا 400 ەدىلباي قويى, 30-دان استام جىلقى وسىرىلەدى. «سىباعا» باعدارلاماسى ارقىلى جاعدايىمىزدى جاقسارتىپ الدىق. ەندى ءسۇتتى سيىر وسىرۋگە قامدانىپ جاتىرمىز. ول ءۇشىن «پەتەرفەلد-اگرو» جشس-ءنىڭ ءسۇت فەرماسىمەن كەلىسىمشارت جاساسىپ قويدىق, – دەيدى باۋىرجان سوتسيال ۇلى. قازىر شارۋا قوجالىعىندا 114 گەكتار ەگىستىك القاپ, 269 گەكتار جايى­لىمدىق جەر, «ك-700», «متز-1221», «كۋن» قوندىرعىسى ورنا­تىلعان «متز-80» تراكتورلارى, «ەنيسەي» كومباينى, التى توننالىق تىركەمە قوراپ بار. ءىس تەتىگىن بىلەتىن كاسىپكەرلەر مال ازىعىن دايىندايتىن تەحنيكانى ساقاداي-ساي ەتىپ العان. پولشالىق روتورلى ءشوپ ماشيناسى مەن وراما ءشوپ تايلايتىن پرەسسجيناعىش ومبى قالاسىنان قولجەتىمدى باعاعا ساتىپ الىنعان. قىسقا 200 تونناداي وراما جەمازىق ازىرلەنىپ, قىستاققا جەتكىزىلگەن. «مال باققانعا بىتەدى» دەگەن راس. – اۋىلدىقتاردىڭ نەگىزگى كۇن­­­كو­رىسى – مال. بالا-شاعانىڭ ءناپ­اقاسىن وسىلايشا ماڭداي تەرمەن ايىرىپ وتىرعان جايىمىز بار. تاڭ اتقاننان كۇن باتقانعا دەيىن مالدىڭ سوڭىندا جۇرەمىز. اۋىلدان ەكى باقتاشى جالداپ, اي سايىن ەڭبەكاقى تولەيمىز. بيىل جۇزشاقتى قويدى سويىپ, بازارعا وتكىزۋ نيەتىندەمىز. تەك قوي­لار­دىڭ تەرىسى مەن ءجۇنىن ىسكە اسىرا الماي, قينالىپ وتىر­عان جايىمىز بار. ەشكىم المايدى. سوندىقتان دالاعا شىعارىپ تاستاۋعا ءماجبۇرمىز. ەڭ باستىسى, مەملەكەتتىك ساتىپ الۋ باعدارلاماسى بويىنشا ءار ءىرى مالىنا 24 مىڭ تەڭگە كولەمىندە دەمەۋقارجى بەرىلەدى. بۇل – زور قولداۋ. سوعان وراي, ءتيىستى قۇجات­تارى­مىزدى رەسىمدەپ, 30-35 باس قاشار مەن بۇقاشىق وتكىزۋدى ويلاس­تىرىپ قويدىق, – دەيدى اعايىندى ءابدىراحمانوۆتار. نۇرسايىن ءشارىپ.  سولتۇستىك قازاقستان وبلىسى, تيميريازەۆ اۋدانى. سۋرەتتە: ب.ءابدىر­احمانوۆ. سۋرەتتى تۇسىرگەن تالعات ءتانى­باەۆ.