فوتو: @realDonaldTrump
اق ءۇي تىلشىلەرىنىڭ ءداستۇرلى كەشكى قابىلداۋىندا اتىس ۇيىمداستىردى دەپ ايىپتالعان 31 جاستاعى كوۋل اللەنگە ءۇش بىردەي ايىپ تاعىلدى. تەرگەۋ دەرەگىنە سايكەس, ول اقش پرەزيدەنتىنە قاستاندىق جاساۋعا ارەكەتتەنۋ, زورلىق سيپاتتاعى قىلمىس كەزىندە اتىس قارۋىن قولدانۋ جانە قارۋدى شتاتتار اراسىندا زاڭسىز تاسىمالداۋ باپتارى بويىنشا كۇدىككە ىلىنگەن. ايىپتالۋشى ءوز كىناسىن مويىندامادى.
اقش پروكۋرورى جانين پيررو بۇل وقيعانى «پرەزيدەنتكە قارسى جاسالعان قاستاندىق ارەكەتى» دەپ باعالاپ, كۇدىكتىنىڭ نيەتى ايقىن بولعانىن مالىمدەدى. سوت شەشىمىمەن اللەن قاماۋدا قالدىرىلدى, الدىن الا تىڭداۋ 11 مامىرعا بەلگىلەندى. ەگەر ول قاستاندىق جاساۋ ارەكەتى بويىنشا كىنالى دەپ تانىلسا, ءومىر بويىنا باس بوستاندىعىنان ايىرىلۋى مۇمكىن, ال وزگە ەكى ايىپ بويىنشا 10 جىلعا دەيىن فەدەرالدىق تۇرمە جازاسى قاراستىرىلعان.
وقيعا 25 ءساۋىر كۇنى Washington Hilton قوناقۇيىندە وتكەن ءباسپاسوز كەشى كەزىندە بولعان. قارۋلانعان كۇدىكتى بانكەت زالىنىڭ كىرەبەرىسىندە وق جاۋدىرىپ, قاۋىپسىزدىك شەبىن بۇزىپ وتكەن. ونىڭ قولىندا مىلتىق, تاپانشا جانە پىشاقتار بولعان. اتىس سالدارىنان قۇپيا قىزمەتتىڭ ءبىر اگەنتى جارالاندى, الايدا ونى وق وتكىزبەيتىن كەۋدەشە امان الىپ قالدى. كۇدىكتى پوليتسيا تاراپىنان وقيعا ورنىندا ۇستالدى.
ترامپ قاتىسقان كەشتە وق جاۋدىرعان كۇدىكتى سوت الدىندا جاۋاپ بەرەدى
سول ساتتە زالداعى شامامەن 2300 ادام ۇستەل استىنا تىعىلىپ, قاۋىپسىزدىك قىزمەتى اقش پرەزيدەنتى دونالد ترامپ پەن ۆيتسە-پرەزيدەنت دجەي دي ۆەنستى شۇعىل تۇردە ەۆاكۋاتسيالادى. ءبىر ساعاتتان كەيىن ترامپ قۇقىق قورعاۋ ورگاندارى قاتىسۋشىلاردى عيماراتتان شىعارۋ جونىندە شەشىم قابىلداعانىن ايتىپ, بۇل ارەكەت قاۋىپسىزدىك حاتتاماسىنا ساي جۇرگىزىلگەنىن جەتكىزدى. سونداي-اق ول ءىس-شارانىڭ 30 كۇنگە شەگەرىلگەنىن مالىمدەدى.
