الماتى. 31 قاڭتار. الماتىداعى جاستار تەاترىندا «ءبىر ءتۇپ الما اعاشى» دراماسى انشلاگپەن ءوتىپ جاتىر. عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ جاڭا قويىلىمى كورەرمەندەر كوپتەپ باراتىن سپەكتاكالدەردىڭ قاتارىنا قوسىلدى. بۇل تۋرالى egemen.kz ءتىلشىسى حابارلادى.
قازاقستان رەسپۋبليكاسىنىڭ ەڭبەك سىڭىرگەن ءارتيسى, تالانتتى رەجيسسەر مۇرات احمانوۆتىڭ كەزەكتى جۇمىسى تەاتر قاۋىمداستىعىنىڭ كوڭىلىنەن شىقتى. مۇرات احمانوۆ بۇعان دەيىن بىرنەشە سپەكتاكلدى وسى تەاتردىڭ تورىندە ساحنالاپ, ءساتتى پەسالاردىڭ رەجيسسەرى اتانعان بولاتىن.
الىمبەك ورازبەكوۆتىڭ دراماتۋرگيالىق شىعارماسىنا قويىلىپ جاتقان سپەكتاكل تەاتردىڭ جاس اكتەرلەرىن عانا ەمەس, قازاقستان رەسپۋبليكاسىنىڭ ەڭبەك سىڭىرگەن ءارتيسى گۇلجامال قازاقباەۆا, قازاقستاننىڭ حالىق ءارتيسى روزا اشىربەكوۆا, قازاقستاننىڭ ەڭبەك سىڭىرگەن قايراتكەرى ءسا راقىشەۆ, قازاقستاننىڭ ەڭبەك سىڭىرگەن قايراتكەرى رايحان قاليولدينا سياقتى ساحنا ساڭلاقتارىن كورەرمەندەرىمەن قايتا قاۋىشتىردى.
پرەمەراسى ءجۇرىپ جاتقان ساحنالىق قويىلىمدا قازاقستان جاستار وداعى «سەرپەر» سىيلىعىنىڭ لاۋرەاتى اسەت يمانعاليەۆ, قۋانىش تۇردالين, «دارىن» مەملەكەتتىك سىيلىعىنىڭ لاۋرەاتى راحمان وماروۆ, ەربول سادىربەكوۆ سىندى ونەردىڭ بەل بالاسىنا اينالىپ ۇلگەرگەن جانداردىڭ ويىنى كورەرمەندەر كوڭىلىنەن شىعۋدا.
قول ارباعا تاڭىلىپ, مۇگەدەكتىكتىڭ تاقسىرەتىن تارتقان ماقسات ءرولىن دارحان سۇلەيمەنوۆ, اسەت ۇمبەتباەۆ سياقتى جۇلدىزى جانىپ كەلە جاتقان جاستار ءساتتى سومداۋدا.
ايناش ەسالي.
دەرەك, سۋرەت: egemen.kz.
