ەلىمىزدىڭ بىرقاتار وڭىرىندە جەل كۇشەيىپ, بۇرقاسىن بولادى

استانا. 30 قاڭتار. ەلىمىزدىڭ بىرقاتار وڭىرىندە قار جاۋىپ, بۇرقاسىن بولادى دەپ كۇتىلۋدە. بۇل تۋرالى «قازگيدرومەت» مالىمەتتەرىنە سىلتەمە جاساعان egemen.kz ءتىلشىسى حابارلادى. يسلانديادان باستالىپ, اركتيكا تەڭىزدەرىنە قاراي جىلجىعان تسيكلوننىڭ قازاقستانداعى اۋا رايىنا كۇشتى اسەرى بولادى دەپ كۇتىلۋدە. سونىمەن قاتار, وسى تسيكلوننىڭ اتموسفەرالىق اۋماعىندا تۇرعان رەسپۋبليكا ايماقتارىنا اتلانتيكادان جىلى ءارى دىمقىل اۋا بىرگە كەلمەك. دەمالىس كۇندەرى بارلىق وبلىستاردا جىلى اۋانىڭ اسەرىنەن قار جاۋىپ, بۇرقاسىن بولادى جانە باتىستان سوققان جەلدىڭ جىلدامدىعى 15-20, كەي جەرلەردە سەكۋندىنا 25 مەترگە دەيىن جەتەدى, اۋا تەمپەراتۋراسى جوعارىلايدى دەپ كۇتىلۋدە. وڭتۇستىك جانە وڭتۇستىك شىعىستا قار جاۋادى, كەي جەرلەردە جەلدىڭ جىلدامدىعى سەكۋندىنا 15−25 مەترگە جەتەدى, تۇمان ءتۇسىپ, كوكتايعاق بولادى, الايدا بۇل ايماقتاردا تەمپەراتۋرا تومەندەيدى دەگەن بولجام جاسالىپ وتىر. اتىراۋ وبلىسىندا بوران سوعىپ, تۇمان تۇسەدى, كوكتايعاق بولادى, جەلدىڭ جىلدامدىعى سەكۋندىنا 15 – 20 مەترگە دەيىن بارادى. جامبىل, قىزىلوردا وبلىستارىندا تۇمان, كوكتايعاق, جەلدىڭ جىدامدىعى سەكۋندىنا 15−20 مەتر. ماڭعىستاۋ وبلىسىنىڭ كەي جەرلەرىندە دە تۇمان, كوكتايعاق, تۇندە جەل ەكپىنى سەكۋندىنا 15−20 مەترگە دەيىن جەتەدى. اقتوبە وبلىسىندا جەل سەكۋندىنا 15−20 مەترگە دەيىن كۇشەيەدى. اقمولا وبلىسىندا باياۋ جەل سوعادى دەپ كۇتىلۋدە. الماتى وبلىسىندا تۇمان تۇسەدى. قاراعاندى وبلىسىنىڭ كەي جەرلەرىندە تۇندە, تاڭەرتەڭ تۇمان بولادى, كۇندىز جەلدىڭ جىلدامدىعى سەكۋندىنا 15−20 مەتر بولادى دەپ كۇتىلۋدە. وڭتۇستىك قازاقستان وبلىسىنىڭ كەي جەرلەرىندە تۇمان ءتۇسىپ, كوكتايعاق بولادى. قوستاناي مەن باتىس قازاقستان وبلىستارىنىڭ كەي جەرلەرى تۇماندى. شىعىس قازاقستاننىڭ كەيبىر ايماقتارىنا تۇندە, تاڭەرتەڭ تۇمان تۇسەدى. الماتىدا كۇن الا بۇلتتى, تۇمان ءتۇسىپ, اراسىندا ازداعان قار جاۋادى. اۋا تەمپەراتۋراسى تۇندە 5-7 گرادۋس, كۇندىز 1-3 گرادۋس نولدەن تومەن. سول سەكىلدى استانادا كۇن الا بۇلتتى, تۇندە تسەلسي باعامى بويىنشا, اۋا تەمپەراتۋراسى تۇندە −18-20 گرادۋس, كۇندىز -10 گرادۋسقا دەيىن تومەندەيدى دەپ كۇتىلۋدە. ايان ءابدۋالي. دەرەك: قازگيدرومەت. سۋرەت: khabar.kz.