مامانداردىڭ بولجامىنا سايكەس شەگىرتكە دەرناسىلدەرى ءساۋىر ايىنىڭ العاشقى جارتىسىندا جەر بەتىنە شىعادى. وسى كەزەڭدە حيميالىق وڭدەۋ جۇمىسىن ۋاقتىلى ءارى ساپالى جۇرگىزۋ اسا ماڭىزدى. ياعني «ىرشىپ ءجۇرىپ ءان سالعان شىرىلداۋىق شەگىرتكەنىڭ» ەگىستىك القاپتارىنا زيان كەلتىرۋىنە توسقاۋىل قويىلادى. وبلىس بيۋدجەتىنەن ءتيىستى قارجى ءبولىنىپ, زالالسىزداندىرۋ شارالارى جۇيەلى تۇردە جۇرگىزىلەدى. وبلىستىق اۋىل شارۋاشىلىعى باسقارماسىنىڭ باسشىسى فايزۋللا بايدۋللاەۆتىڭ ايتۋىنشا, وتكەن جىلى بۇل ماقساتقا 535 ملن تەڭگە ءبولىنىپ, 150 مىڭ گا القاپتا حيميالىق وڭدەۋ جۇمىسى اتقارىلعان. بيىل 133 ملن تەڭگە قاراستىرىلىپ, 36 مىڭ گا اۋماقتى وڭدەۋ جوسپارلانىپ وتىر. جۇمىس ارىس قالاسى مەن كەلەس, سارىاعاش, شاردارا اۋداندارىندا جۇرگىزىلەدى. قازىر مەملەكەتتىك ساتىپ الۋ راسىمدەرى باستالعان.
وبلىستىق اۋماقتىق ينسپەكتسيا باسشىسىنىڭ مىندەتىن اتقارۋشى مارات ورىنباەۆتىڭ مالىمەتىنشە, وتكەن جىلى وڭىردە شەگىرتكە زيانكەستەرىنە قارسى 715,3 مىڭ گا القاپتا حيميالىق وڭدەۋ جۇمىسى جۇرگىزىلگەن. بيىل 11 اۋداندا 421,5 مىڭ گا القاپتا حيميالىق وڭدەۋ جوسپارلانعان. بۇگىندە قارجىلاندىرۋ كولەمىنە سايكەس 374,1 مىڭ گەكتاردى قامتۋ كوزدەلىپ وتىر. شەگىرتكەگە قارسى كۇرەس شارالارىنا 2 030 ادامدى جۇمىلدىرۋ جوسپارلانعان.
سونداي-اق اگروتەحنيكالىق شارالار اياسىندا 2,2 مىڭ گا اۋماقتا جەر جىرتۋ جۇمىسى جۇرگىزىلىپ, ونىڭ جارتىسى يگەرىلگەن. بۇل ءادىس زيانكەستەردىڭ كوبەيۋىن 35-50%-عا تومەندەتۋگە مۇمكىندىك بەرگەن. الداعى كەزەڭدە كەلەس اۋدانىندا جالپى كولەمى 143 350 گا جەردى زيانكەستەردەن قورعاۋ ماقساتىندا حيميالىق وڭدەۋ جۇمىسى جۇرگىزىلەدى. سارىاعاش اۋدانىندا حيميالىق وڭدەۋدى 10 اۋىلدىق وكرۋگتە جۇرگىزۋ جوسپارلانعان. 88 600 گەكتاردى قامتۋ كوزدەلىپ وتىر. جالپى, اۋداندا وڭدەلەتىن ايماق 18 سەكتورعا بولىنگەن.
سونىمەن قاتار سىرداريا وزەنى بويىنداعى شىركەي دەرناسىلدەرىنىڭ دامۋى تۇراقتى باقىلاۋعا الىنعان. بۇل جۇمىسپەن «وسىمدىكتەردى قورعاۋ-ك» جشس مەكەمەسىنىڭ عىلىمي سۇيەمەلدەۋ توبى اينالىسىپ جاتىر. بيىل ەنتومولوگيالىق مونيتورينگ ماقساتىندا وزەن بويىندا بىرنەشە كەزەڭدىك باقىلاۋ جۇرگىزىلدى. سىرداريا وزەنىنىڭ تۇركىستان وبلىسى اۋماعىنان وتەتىن بولىگىنىڭ ۇزىندىعى 350 شاقىرىمنان اسادى. وزەن بويىندا زەرتتەۋ, وڭدەۋ جۇرگىزىلەتىن ارنايى ۋچاسكەلەر بەلگىلەنگەن. وتىرار اۋدانى اۋماعىندا دا شىركەيگە قارسى دەزينسەكتسيالاۋ جۇمىسى باستالدى. جالپى, دەزينسەكتسيالاۋ شارالارى سىرداريا وزەنى بويى مەن ەلدى مەكەندەر اۋماعىن قامتيدى.
تۇركىستان وبلىسى
