تۋنيستە تاۋلىكتە تەڭىز تۋلادى

ساحارا ءشولىنىڭ ورتاسىندا قو­نىس تەپكەن تۋنيس ەلىندە ءبىر تاۋلىكتىڭ ىشىندە كولكىگەن كول پايدا بولىپ, تولقىنى تەڭىزدەي تۋلادى. وسىناۋ عاجايىپ وقيعانىڭ جاي-جاپسارىمەن جاقسى تانىسقان اقباستى وقىمىستىلاردىڭ وزدەرى قازىر مۇنىڭ نەندەي قۇدىرەت ەكەنىن ايتىپ, ءتۇسىندىرىپ بەرە الماي وتىر. ءبىر ءتۇننىڭ ىشىندە قۇرعاقشىلىقتان كەنەزەسى كەۋىپ, تاڭدايى قۇرعاپ جات­قان ءشول دالانىڭ تاپ ورتاسىندا شالقىعان شالقار كولدىڭ ورناي سالعانىن ازىرگە كارى تاريحتىڭ ءوزى بىلە بەرمەيدى. سوندىقتان كەيبىر ماماندار مۇنىڭ سەيسمولوگيالىق ءدۇمپۋدىڭ اسەرىنەن جاسالعان دەگەن بولجامعا جۇگىنۋگە ءماجبۇر. ولار سونداي بولار-بولماس سىلكىنىستىڭ سالدارىنان بەتكى قاباتتاعى سۋ جەردىڭ بەتىنە قاراي لىقسىپ شىققان دەگەن بايلامعا قازىق بايلاعىلارى كەلەدى. وسىلايشا بەرى اتقىپ شىققان سۋدىڭ كەرى قايتۋىنا توپىراق قىرتىسىنىڭ تىعىزدىعى كەدەرگى كەلتىرگەن سياقتى. الايدا, بۇل كولدىڭ شىن مانىندە قالاي پايدا بولعانى تۋرالى ناقتى تۇجىرىم جوق. وسىدان كەلىپ, عالىمدار جەر­گىلىكتى تۇرعىندارعا ونىڭ سۋىن شارۋاشىلىق ماقساتىنا قول­دانۋدان باس تارتا تۇرۋدى ۇسىنىپ وتىر. سەبەبى, ونىڭ قۇرامىندا ادام اعزاسىنا زالال كەلتىرەتىن قوسپالاردىڭ بولۋى دا ابدەن ىق­تيمال. سوعان قاراماستان, جەرگىلىكتى حالىقتىڭ بىرقاتار بولىگى بۇل ەسكەرتپەنى تىڭداپ جاتقان جوق. ولاردىڭ ءبىرازى جاڭا كولدىڭ جاعاسىنان جاعاجاي سالىپ, سوندا دەمالۋدى ادەتكە اينالدىرا باستاعان. الدىن الا مالىمەت بو­يىنشا, سۋ قويماسىنىڭ كەي جەرلەرىنىڭ تەرەڭدىگى 18 مەترگە دەيىن بارادى. ال سۋى تۇششى كو­رىنەدى. ازىرگە وعان تۇسكەندەر مەن سۋىن ىشكەندەر اراسىنان شاعىم ايتىپ, دارىگەرگە كورىنىپ جاتقان دا ەشكىم بايقالمايدى. قۇدايدىڭ بەرە سالعانىنداي بۇل كولگە قۇمارتۋشىلار قاتارى سون­دىقتان بىرتە-بىرتە كوبەيىپ كەلەدى. رۋسلان يگىلىك.