بىلتىر باتىس قازاقستاندا 25 مىڭنان استام زاڭبۇزۋشىلىق انىقتالدى

ورال. 24 قاڭتار. باتىس قازاقستان وبلىسىندا وتكەن جىلى 25 مىڭنان استام زاڭبۇزۋشىلىق انىقتالدى. بۇل تۋرالى وبلىستىق پروكۋراتۋرانىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. ءباسپاسوز قىزمەتىنىڭ مالىمدەۋىنشە, ولاردى جويۋ ماقساتىندا 1,5 مىڭنان استام پروكۋرورلىق قاداعالاۋ اكتىلەرى ەنگىزىلدى. 48 قىلمىستىق قۇقىقبۇزۋشىلىق بويىنشا سوتقا دەيىنگى تەرگەپ-تەكسەرۋ باستالدى. پروكۋرورلىق ىقپال ەتۋ شارالارىمەن 1158 زاڭسىز اكتى, سونىڭ ىشىندە 8 نورماتيۆتىك-قۇقىقتىق اكتى بۇزىلدى نەمەسە وزگەرتىلدى. 44 مىڭنان استام ادامنىڭ كونستيتۋتسيالىق قۇقىعى قورعالدى. 3 مىڭنان استام ادام تارتىپتىك, ماتەريالدىق جانە اكىمشىلىك جاۋاپكەرشىلىككە تارتىلدى. مەملەكەتتىك بيۋدجەتتىڭ 10 ملرد.-تان استام تەڭگەگە تولىقتىرىلۋى قامتاماسىز ەتىلدى. 850 ملن.-نان استام تەڭگەنىڭ مۇلكى مەملەكەتكە قايتارىلدى. سونىمەن قاتار, 2015 جىلى 1183 قىزمەتكەرگە 168 ملن. تەڭگە جانە سوتتالعان 85 ادامعا 814 مىڭنان استام بەرەشەك وتەلدى. تەمىر قۇسايىن. دەرەك: باتىس قازاقستان وبلىستىق پروكۋراتۋرانىڭ ءباسپاسوز قىزمەتى. سۋرەت: mygorod.kz.