دالادا اداسقان ەكەۋدى قۇتقارۋشىلار تاۋىپ الدى

كوكشەتاۋ. 26 قاڭتار. اقمولا وبلىسى, ەسىل اۋدانىنىڭ اۋماعىندا دالادا اداسىپ كەتكەن ەكى ادامدى بۇرناعى كۇنى تۇندە قۇتقارۋشىلار تاۋىپ, امان ساقتاپ قالدى. بۇل تۋرالى «اقمولا مەديا ورتالىعى» ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. مەديا-ورتالىقتىڭ مالىمەتى بويىنشا, سونىڭ الدىندا ەسىل اۋداندىق توتەنشە جاعدايلار بولىمىنە رازدولنوە سەلوسىندا تۇراتىن ءبىر ايەل حابارلاسىپ, قاڭتاردىڭ 22-سىندە تۋىسىنىڭ كورشى اۋىلعا جاياۋ قوناققا كەتكەنىن, جانىندا تاعى ءبىر ادامنىڭ بولعانىن, ەكى ارالىقتىڭ 25 شاقىرىم ەكەنىن, سودان بەرى ءبىر تاۋلىكتەن اسا ۋاقىت وتكەنىمەن, ودان حابار جوق ەكەنىن ايتادى. اۋداندىق توتەنشە جاعدايلار ءبولىمىنىڭ قىزمەتكەرلەرى وسىدان كەيىن حابارسىز كەتكەن كىسىلەردى امان ساقتاپ قالۋ ماقساتىندا كىدىرمەستەن قۇتقارۋ-ىزدەستىرۋ توبىن جاساقتايدى. وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنشە, ىزدەستىرۋ جۇمىستارىنا جوعارى وتىمدىلىكتى ءۇش اۆتوماشينا, «ك-700» تراكتورى, «تايگا-ۆارياگ-550» قاردا ءجۇرۋ كولىگى جۇمىلدىرىلادى. كومەككە سونداي-اق جاقسى اۋدانىنىڭ قۇتقارۋشىلارى دا كەلەدى. قۇتقارۋشىلار وسىدان كەيىن ءبىر ساعاتتىڭ شاماسىندا اداسقان ادامداردى تاۋىپ الادى. ولار تەز ۇيلەرىنە جەتكىزىلەدى. سونىمەن قاتار, دارىگەرلىك كومەك كورسەتىلەدى. قۇتقارۋ وپەراتسياسىنا بارلىعى 10 ادام جانە 6 تەحنيكا بىرلىگى قاتىستى. باقبەرگەن امالبەك. دەرەك: اقمولا مەديا ورتالىعى.