پرەزيدەنت رەفورمالارى – دامۋ كەپىلى

كەشە پرەزيدەنت جانىنداعى ورتالىق كوممۋنيكاتسيالار قىزمەتىندە ءبىلىم جانە عىلىم مينيسترلىگى «حالىقارالىق باعدارلامالار ورتالىعى» اق پرەزيدەنتى عاني نىعمەتوۆتىڭ قاتىسۋىمەن بريفينگ ءوتتى. باسقوسۋدا ەلباسىنىڭ بەسىنشى شاقىرىلعان پارلامەنت ءماجىلىسىن تاراتۋ جانە پارلامەنت ءماجىلىسى دەپۋتاتتارىنىڭ كەزەكتەن تىس سايلاۋىن وتكىزۋ تۋرالى جارلىعىنىڭ ءمان-ماڭىزى ءسوز بولدى. ءبىرىنشى كەزەكتە عاني نىعمەتوۆ دەپۋتات­تاردىڭ بەسىنشى شاقىرىلعان پارلامەنت ءما­جىلىسىن تاراتىپ, ءماجىلىس پەن بارلىق دەڭگەيدەگى ءماسليحاتتار دەپۋتاتتارىنىڭ سايلاۋلارىن وتكىزۋ تۋرالى باستاماسىنا ەلباسىنىڭ قولداۋ بىلدىرگەنى مەملەكەتىمىزدىڭ ورنىقتى دامۋى­نا جول اشاتىنىن اتاپ ءوتتى. «مەن بۇعان دەيىن پارلامەنتتىك جانە بارلىق دەڭگەيدەگى ءماسليحاتتار دەپۋتاتتارىنىڭ سايلاۋلارىن كەزەكتەن تىس وتكىزۋ جونىندەگى دەپۋتاتتاردىڭ ۇندەۋىن قولداپ, ءوز پىكىرىمدى بىلدىرگەن بولا­تىن­مىن. سول ۋاقىتتان بەرى پرەزيدەنت نۇرسۇلتان نازارباەۆ اتالعان ماسەلەگە قاتىستى ءوز جارلى­عىنا قول قويدى. شىن مانىندە, بۇل ەل يگىلىگى ءۇشىن جاسالعان وڭدى شەشىم بولدى. سەبەبى, قازىرگى تاڭدا, ەلباسى ايتقانداي, قيىن كەزەڭدە, داعدارىس كەزىندە ءبىزدىڭ حالقىمىز بىرلەسە وتىرىپ, سايلاۋدى ءبىر جىلعا سوزباي وتكىزىپ, ودان كەيىن داعدارىستى ەڭسەرۋگە باعىتتالعان پرەزيدەنت ۇسىنعان رەفورمالاردى جۇزەگە اسىرۋىمىز قاجەت», – دەدى ع.نىعمەتوۆ. ونىڭ سوزىنە قاراعاندا, مۇناي باعاسىنىڭ كوتەرىلگەنىن كۇتپەي, يندۋستريالاندىرۋعا, شاعىن جانە ورتا كاسىپكەرلىك سالالارىن دامىتۋعا كۇش سالۋ كەرەك. «قازىرگى ۋاقىتتا الدىمىزعا قويىلعان ماقسات-مىندەتتەردى, سونىڭ ىشىندە پرەزيدەنتىمىزدىڭ بەس رەفورماسى مەن «100 ناقتى قادام» ۇلت جوسپارى اياسىندا كوزدەلىپ وتىرعان شارالاردى ىنتىماقتاسا وتىرىپ جۇزەگە اسىرۋ ماڭىزدى. «100 ناقتى قادامدا» بۇگىنگى سىن-قاتەرلەرگە جاۋاپ بار. ونىڭ ۇستىنە, «نۇرلى جول» باعدارلاماسىن جۇزەگە اسىرۋ, ءتۇرلى ينفراقۇرىلىمدىق جوبالاردى ىسكە اسى­رۋ, ەكونوميكانى يندۋستريالاندىرۋدىڭ كەڭ اۋقىمدى باعدارلاماسىن ورىنداۋ, شاعىن جانە ورتا بيزنەستى دامىتۋ مىندەتتەرى ناقتى كورسەتىلگەن», – دەدى ول. سونداي-اق, سپيكەر ءماجىلىس پەن بارلىق دەڭگەيدەگى ءماسليحاتتار دەپۋتاتتارىنىڭ سايلاۋلارىن بىرگە وتكىزۋ بيۋدجەت قارجىسىن ۇنەمدەۋگە مۇمكىندىك بەرەتىنىن جەتكىزدى. «ءبىز ەلباسىنىڭ كەزەكتەن تىس سايلاۋ وتكىزۋ تۋرالى جارلىعى ارقىلى بۇل ەلەكتورالدى ناۋقاندا 5 ملرد. تەڭگەگە جۋىق بيۋدجەت قاراجاتىن ۇنەمدەي الامىز. سونىمەن بىرگە, ەلەكتورالدى جىلدى ۇنەمدەي الامىز. ءبىز كونستيتۋتسيالىق جانە ازاماتتىق قۇقىقتارىمىزدى پايدالانا وتىرىپ, سايلاۋعا قاتىسىپ جاتقان ساياسي پارتيالارعا داۋىس بەرۋگە بەلسەندى قاتىسۋىمىز كەرەك دەپ ەسەپتەيمىن», – دەپ تۇيىندەدى ءسوزىن ع.نىعمەتوۆ. جولدىباي بازار, «ەگەمەن قازاقستان».