ءدىني باسقارما قورىتىندىسى: وتكەن جىلى 152 907 وتباسىنا قايىرىمدىلىق جاسالدى

قازاقستان مۇسىلماندارى ءدىني باسقارماسىنىڭ (قمدب) الەۋمەتتىك جاعدايى تومەن جانە كومەككە مۇقتاج جاندارعا, مۇگەدەك بالالارعا, ارداگەرلەرگە قايىرىمدىلىق كومەك كورسەتۋ تۋرالى تاپسىرماسىنا سايكەس, 2015 جىلى ەلىمىزدىڭ ءار وڭىرىندەگى مەشىتتەر تاراپىنان تابيعات اپاتىنان جانە باسقا دا جاعدايلارعا دۋشار بولعان ازاماتتارعا قايىرىمدىلىق جاسالدى. وسى ورايدا, مەشىتتەردە «قايى­­رىم­دىلىق كەرۋەنى», «مەك­تەپكە جول», «قارتتارعا قۇرمەت», «مۇق­تاجدىڭ مۇڭىن ءبولىس», «ءبىر بالانى كيىندىر», «قايىرىم­دىلىق – قايىر­لى ءىس», «بارىڭمەن ءبولىس!» سەكىلدى اكتسيالار مەن قايى­رىم­دىلىق ءىس-شارالارى ۇيىمداس­تىرىلدى. قاراعاندى وبلىسىنداعى سۋ تاس­قى­نىنان زارداپ شەككەن ايماق­تارعا كومەك كورسەتىلىپ, «قايى­رىمدىلىق كەرۋەنى» اكتسياسىندا 110 توننا تۇرمىسقا قاجەتتى زاتتار تاراتىلدى. «مەكتەپكە جول» قايىرىم­دىلىق شاراسى بارىسىندا تۇر­مىسى تومەن, اتا-انا قامقور­لىعىنان ايىرىلعان, جەتىمدەر مەن كوپ­بالالى 5253 وتباسىنا وقۋعا قاجەتتى قۇرالدار مەن ءار وقۋشىعا 20 000 تەڭگە كولەمىندە كومەك كورسەتىلدى. «قۇربان ايت» مەرەكەسىندە مۇقتاج جاندارعا, الەۋمەتتىك جاع­دايى تومەن وتباسىلار مەن مەملە­كەتتىك مەكەمەلەرگە رەسپۋب­ليكا بوي­ىنشا 15 308 قۇرباندىق ەتى 23 419 وتباسىنا ۇلەستىرىلدى. استانا مەن الماتى قالالار­ىنداعى قارتتار ۇيلەرىنە «ءۇل­كەن قاجىلىق» جانە «كىشى قاجى­لىققا» تەگىن جولداما بەرىلدى. ءدىني باسقارمانىڭ باستاماسىمەن رەس­پۋبليكالىق دەڭگەيدە «قارتتارعا قۇرمەت» اكتسياسى بارىسىندا ماتەريالدىق جانە مورالدىق كومەك بەرۋ سياقتى قايرىمدىلىق شارالارى ۇيىمداستىرىلدى. ەلىمىز بويىنشا 2015 جىلى جالپى سانى 152 907 وتباسىنا قايىرىمدىلىق كومەك كورسەتىلدى, دەپ حابارلادى قمدب-نىڭ باس­پا­سوز قىزمەتى.