سالۆادوردا تۇرعىندارعا بالا تۋدان باس تارتۋعا كەڭەس بەرىلدى

استانا. 23 قاڭتار. ورتالىق امەريكادا ورنالاسقان سالۆادور مەملەكەتىندە تۇرعىندارعا الداعى ەكى جىلدا بالا تۋدان باس تارتۋعا كەڭەس بەرىلدى. وعان ەل اۋماعىندا زيكا ىندەتىنىڭ تارالۋى سەبەپ بولىپ وتىر. بۇل تۋرالى euronews تەلەارناسىنا سىلتەمە جاساعان egemen.kz ءتىلشىسى حابارلادى. مامانداردىڭ ايتۋىنشا, اتالعان ۆيرۋس انادان بالاعا بەرىلەدى ەكەن. سالدارىنان بالانىڭ بويىندا ءارتۇرلى اۋرۋلاردى قوزدىرىپ, ميكروتسەفالياعا (باس سۇيەك پەن ميدىڭ جەتىلمەۋى, اقىل-ويدىڭ دامىماۋى جانە نەۆرولوگيالىق اۋىتقۋشىلىق) جانە كورۋ مۇمكىندىگىنىڭ ناشارلاۋىنا اكەلەدى. قازىردىڭ وزىندە ۆيرۋستان ساقتانعان اقش ءوز ازاماتتارىنا الەمنىڭ 22 ەلىنە بارماۋعا كەڭەس بەرۋدە. بۇل جونىدە وسى ەلدىڭ اۋرۋلارعا باقىلاۋ جۇرگىزۋ جانە الدىن الۋ ورتالىعىنىڭ مامانى بەت بەلل: «زيكا ىندەتى اياعى اۋىر ايەلدەردىڭ اعزاسىنا ەرەكشە اسەر ەتەدى. سوندىقتان ازىرگە كەسەل تاراعان ايماقتارعا بارماعان دۇرىس», – دەيدى. ايتا كەتەيىك, وتكەن جىلدىڭ جەلتوقسان ايىندا دۇنيەجۇزىلىك دەنساۋلىق ساقتاۋ ۇيىمى لاتىن امەريكاسىنىڭ بىرقاتار ەلىندە زيكا ۆيرۋسىنىڭ تاراعانىن حابارلاعان بولاتىن. ىندەت سالدارىنان برازيليا ەڭ كوپ زارداپ شەگىپ وتىر. قازىرگى تاڭدا بۇل ەلدە ميكروتسەفاليا بەلگىسى بار 3,5 مىڭ جاڭا تۋعان نارەستە تىركەۋگە الىنعان. نەگىزىنەن ماسا ارقىلى تارالاتىن بۇل ۆيرۋس ادام ءومىرى ءۇشىن اسا قاۋىپتى ەمەس. كوبىنە جەڭىل اسەر ەتەدى جانە بىرنەشە كۇندە وزدىگىنەن جويىلىپ كەتەدى. الايدا, اياعى اۋىر ايەلدەر ءۇشىن ۇلكەن قاۋىپ ءتوندىرىپ تۇر. ماماندار ازىرگە كەسەلدىڭ الدىن الاتىن ءدارى-دارمەكتى تاپقان جوق. ەلامان قوڭىر. دەرەك: euronews. سۋرەت: materlife.ru.