كوممۋنيستىك پارتيا سايلاۋعا تۇسەدى

قازاقستاننىڭ كوممۋنيستىك حالىق پارتياسى مەملەكەت باس­شىسىنىڭ كەزەكتەن تىس پارلامەنت سايلاۋىن وتكىزۋ تۋرالى جارلىعىن قول­دايتىنىن جانە پارتيانىڭ سايلاۋعا تۇسەتىنىن مالىمدەدى. «دامۋدىڭ قازىرگى كەزەڭى جاھاندىق داعدارىسقا تاپ بولىپ وتىر. قيىن-قىستاۋ كەزەڭدە مەملەكەت قانداي جولدى تاڭداۋى قاجەتتىگىن جانە قانداي پارتيا سايلاۋشىلاردىڭ سەنىمىن اقتاي الاتىنىن انىقتاپ الۋ كەرەك, دەدى پارتيانىڭ رەسمي مالىمدەمەسىن وقىعان قكحپ وك ساياسي بيۋروسىنىڭ مۇشەسى ايقىن قوڭىروۆ. ال قازاقستاننىڭ كوممۋنيستىك حالىق پارتياسىنىڭ حاتشىسى تۇرعىن سىزدىقوۆ سايلاۋعا تۇسۋگە پارتيانىڭ دايىندىعىن, ال ەلباسى قابىلداعان شەشىمدى ۋاقتىلى ءارى نەگىزدى دەپ سانايتىندىقتارىن جەتكىزدى. «بۇگىن ساياسي بيۋرونىڭ وتىرىسى بولدى. وندا ءبىزدىڭ كوپتەگەن جەرگىلىكتى كوممۋنيستەردىڭ حاتتارى بويىنشا, ولاردىڭ جىبەرگەن, تەلەفونمەن حابارلاسقان جولداۋ-ۇسىنىستارى بويىنشا ءبىز پارتيامىزدىڭ الداعى سايلاۋعا شىعۋ جاعدايىن قاراستىردىق. ناتيجەسىندە, پارتيامىز سايلاۋعا تۇسەدى دەگەن شەشىم قابىلدادىق. پارتيامىز سايلاۋعا دايىن. ءبىز ۇگىت-ناسيحات جۇمىستارى بارىسىندا ءوزىمىزدىڭ ۇستانىم, وي-پىكىرلەرىمىزدى حالىققا جەتكىزەتىن بولامىز. ال ەندى ساياسات تۋرالى ايتار بولساق, پرەزيدەنتىمىزدىڭ جارلىعىن كوممۋنيستەر قولدايدى. نەگىزى وتانىمىزدى جاقسى كورگەن سوڭ, وتانىمىزعا سەنىم بەرىك بولعان سوڭ ءبىز مىناۋ داعدارىس جاقسىلىققا اپارمايتىنىن سەزىنەمىز. سوندىقتان, وسى داعدارىستان شىعۋ جولىندا باسىمىزدى بىرىكتىرىپ, ءبارىمىز ەل بولىپ جۇمىلۋىمىز كەرەك. تاريحتا دا سولاي بولعان, ءبىزدىڭ حالىق باسىن بىرىكتىرگەندە ىلعي جەڭىسكە جەتكەن. سوعان ساي, ءبىز پرەزيدەنتىمىزدىڭ ماڭىنا توپتاسىپ, وسى داعدارىستان شىعۋىمىز كەرەك. جاڭا پارلامەنتتى قۇرۋ – بۇل ءبىر سەبەپ, سونداي-اق, حالىق وسى قيىن جاعدايدا قاي پارتيانىڭ ۇستانىمى ورىندى, قايسىسىنا سەنىم ارتادى دەگەن ويمەن وسى سايلاۋعا شىعايىن دەپ جاتىرمىز. ءبىز 26 اقپاندا القالى جيىن وتكىزەمىز. سوندا سەزگە شاقىراتىن ماسەلەنى قارايمىز», دەدى ت.سىزدىقوۆ. دينارا بىتىكوۆا, «ەگەمەن قازاقستان».