دۇنيەجۇزى قازاقتارى قاۋىمداستىعىنىڭ «پارلامەنت ءماجىلىسىن تاراتۋ جانە قر پارلامەنتى ءماجىلىسى دەپۋتاتتارىنىڭ
سايلاۋىن كەزەكتەن تىس وتكىزۋ تۋرالى» جارلىققا بايلانىستى
مالىمدەمەسى
دۇنيەجۇزى قازاقتارىنىڭ قاۋىمداستىعى دەپۋتاتتاردىڭ ماڭىزدى باستاماسىنا قاتىستى پرەزيدەنتىمىزدىڭ وڭ شەشىم قابىلداعانىن اسا زور ىقىلاسپەن قابىل الدى. ءماجىلىس جانە بارلىق دەڭگەيدەگى ءماسليحاتتار دەپۋتاتتارىنىڭ سايلاۋلارىن كەزەكتەن تىس وتكىزۋ ۇلتتىڭ ماڭگىلىك ەلگە اينالۋ مۇراتىنا جەتۋدە اسا ماڭىزدى ءارى تاعدىرلى قادام دەپ سانايمىز. سايلاۋدى الەمدىك داعدارىستىڭ كەزەكتى تولقىنىنا دەيىن وتكىزىپ ۇلگەرسەك, سىرتقى سىن-قاتەردىڭ سالماعى جەڭىل بولارى ءسوزسىز. 5 ينستيتۋتتىق رەفورمانى جۇزەگە اسىرۋدا ەشنارسەگە الاڭداماي, بيلىك, مەملەكەتتىك قۇرىلىم جانە ازاماتتىق قوعام بولىپ ۇيىمداسىپ جۇمىس ىستەۋ اسا ماڭىزدى. وسى ورايدا, جاڭادان جاساقتالاتىن پارلامەنت وسىناۋ مەملەكەت قۇراۋشى ءۇش قۋاتتى ءبىر ماقساتقا جۇمىلدىرا الادى دەگەن ويدامىز. تاۋەلسىزدىگىمىزدىڭ اق تاڭى اتقان تۇستا قۇشاق جايىپ, توردەن ورىن ۇسىنعان ەلباسىنىڭ جاناشىرلىعى جىراقتا جۇرگەن ميلليونداعان قانداسىمىزدىڭ تاريحي وتانىنا ورالۋىنا مۇمكىندىك بەردى. بۇگىندە ولار قوعامنىڭ ءتۇرلى سالالارىندا جەمىستى ەڭبەك ەتىپ, قاستەرلى قازاقستانىمىزدىڭ دامۋىنا سۇبەلى ۇلەس قوسىپ ءجۇر. سونىمەن بىرگە, ۇلى دالا ەلىنەن تىسقارى جەردەگى ءاربىر باۋىرلاسىمىزبەن تىعىز رۋحاني بايلانىس ورناتىلىپ, تۋعان ولكەنىڭ قامقورىن سىرتتا جۇرگەن ءاربىر قازاق سەزىنۋدە. وسىعان وراي, جاھان قازاقتارىنىڭ ۇيىتقىسى بولعان ۇيىم رەتىندە دۇنيەجۇزى قازاقتارىنىڭ قاۋىمداستىعى ەلباسىنىڭ دەپۋتاتتار ۇسىنعان باستاماعا وڭ شەشىم ءبىلدىرىپ, ءتيىستى جارلىققا قول قويعانىن جوعارى باعالايدى جانە وسى ىستە ۇزەڭگىلەس بولۋعا ءازىر ەكەنىن مالىمدەيدى.
