اقمولا وبلىسىندا قۇقىقتىق دارىستەمە وتكىزىلدى

اقمولا. 22 قاڭتار. اقمولا وبلىستىق ادىلەت دەپارتامەنتى ماعجان جۇماباەۆ اتىنداعى وبلىستىق عىلىمي امبەباپ كىتاپحاناسىمەن بىرلەسىپ, قازاقستان رەسپۋبليكاسى پرەزيدەنتىنىڭ «قازاقستان جاڭا جاھاندىق ناقتى احۋالدا: ءوسىم, رەفورمالار, دامۋ» اتتى جولداۋى بويىنشا قۇقىقتىق دارىستەمە وتكىزدى. بۇل تۋرالى egemen.kz ءتىلشىسى حابارلادى. شارا بارىسىندا ادىلەت دەپارتامەنتىنىڭ اتقارۋ ءوندىرىسىن قامتاماسىز ەتۋ باسقارماسىنىڭ باسشىسى مانار بايعوجينا جانايدار مۋسين اتىنداعى كوكشەتاۋ قازاق پەداگوگيكالىق كوللەدجى مەن گۋمانيتارلىق تەحنيكالىق ليتسەي شاكىرتتەرىنە ەلباسى نۇرسۇلتان نازارباەۆتىڭ «ۇلت جوسپارى – 100 ناقتى قادام» ستراتەگياسى مەن 2015 جىلدىڭ 30 قاراشاسىندا حالىققا ارناعان «قازاقستان جاڭا جاھاندىق ناقتى احۋالدا: ءوسىم, رەفورمالار, دامۋ» جولداۋىن كەڭىنەن ءتۇسىندىرىپ ءوتتى. سونىمەن قاتار, ەلىمىزدە وسى جوسپاردى ىسكە اسىرۋ ماقساتىندا بىرقاتار جاڭا زاڭداردىڭ قابىلدانعانىنا, جىل اياعىنا دەيىن تاعى باسقا دا زاڭنامالىق اكتىلەرگە وزگەرىستەر ەنگىزۋ كوزدەلىپ وتىرعانىنا توقتالدى. سونداي-اق, بيىلعى جىلدىڭ باستى وقيعاسى –پارلامەنت ءماجىلىسى مەن جەرگىلىكتى ءماسليحاتتار سايلاۋىن وتكىزۋدىڭ ماڭىزدىلىعى كەڭىنەن قامتىلدى. پىكىر الماسۋ كەزىندە جانايدار مۋسين اتىنداعى كوكشەتاۋ قازاق پەداگوگيكالىق كوللەدجىنىڭ وقۋشىلارى فاريزا ەنشىلەس پەن لاشىن امانبەك 2017 جىلدان باستاپ جاستاردىڭ تەگىن كاسىپتىك ءبىلىم الاتىنىنا, جاس بۋىننىڭ جۇمىسشى ماماندىقتارىن مەڭگەرۋى قاجەتتىگىنە قولداۋ ءبىلدىرىپ, وزدەرىنىڭ بولاشاق تۋرالى ويلارىن ورتاعا سالدى. وقۋ ورنىندا سايلاۋعا دايىندىق شاراسى بارىسىندا تۇڭعىش داۋىس بەرۋشىلەر ءتىزىمى ازىرلەنگەنى, ولارعا زور جاۋاپكەرشىلىك ارتىلاتىنى دا ايتىلدى. وبلىستىق كىتاپحانا جانىنان قۇرىلعان «سەرپەر» كلۋبىنىڭ توراعاسى باقىتبەردى قۋاتحان زامانداستارىن جولداۋداعى مىندەتتەردى بىرلەسىپ جۇزەگە اسىرۋعا بەلسەنە ارالاسۋعا شاقىرسا, كىتاپحانا قىزمەتكەرلەرى دايىنداعان «قازاقستان جاڭا جاھاندىق ناقتى احۋالدا: ءوسىم, رەفورمالار, دامۋ» كورمەسىنەن دە كوپشىلك كەلەلى وي ءتۇيدى. باقبەرگەن امالبەك. دەرەك, سۋرەت: egemen.kz.