زاڭ شىعارۋ قىزمەتىن اتقارۋعا كىرىستى

كەشە قاسىم-جومارت توقاەۆتىڭ توراعالىق ەتۋىمەن پارلامەنت سەناتىنىڭ وتىرىسى بولدى, دەپ حابارلادى وسى پالاتانىڭ ءباسپاسوز قىزمەتى. وتىرىستى اشا كەلىپ, سەنات توراعاسى قازاقستان رەسپۋب­لي­كاسىنىڭ بەسىنشى شاقىرىلعان پارلامەنتى ءماجىلىسىنىڭ وكىلەت­تىگىن مەرزىمىنەن بۇرىن توقتاتۋ جانە پارلامەنت ءماجىلىسىنىڭ جانە بارلىق دەڭگەيدەگى ءماسلي­حات­تارىنىڭ كەزەكتەن تىس سايلاۋىن وتكىزۋ تۋرالى ەلباسىنىڭ جارلىعى شىعۋىنا بايلانىستى جوعارعى پالاتا الدىندا تۇرعان مىندەتتەرگە سەناتورلاردىڭ نازارىن اۋداردى. «پرەزيدەنتتىڭ بۇل شەشىمى قوعام مەن مەملەكەت ءۇشىن وتە ماڭىزدى رەفورمالاردى جۇزەگە اسىرۋعا جەدەل كىرىسىپ, داعدارىسقا قارسى شارالارعا جاڭا سەرپىن بەرەتىنى ءسوزسىز», – دەپ اتاپ ءوتتى ق.توقاەۆ. كونستيتۋتسياعا سايكەس, ءما­جى­لىس ۋاقىتشا بولماعان كەزدە پار­لامەنتتىڭ زاڭ شىعارۋ قىزمەتىن سەنات اتقارادى. بۇل جاعدايدا ەلباسىنىڭ ۇلت جوسپارىن زاڭ­نا­مالىق تۇرعىدان قامتاماسىز ەتۋ ءۇشىن سەنات ۇكىمەتپەن بىرلەسىپ اۋقىمدى جۇمىستاردى ۇيلەسىمدى تۇردە جالعاستىراتىن بولادى. ق.توقاەۆ سەنات دەپۋتاتتارى قوعام مەن مەملەكەتتىڭ تۇراقتى دا­مۋى­نا اسا قاجەتتى زاڭداردى قا­بىل­­داۋدا, وزدەرىنىڭ مول ءتاجىري­بەسى مەن تەرەڭ ءبىلىمىن اياماي جۇم­­ساي­­تىنىنا كۇمان جوق ەكەنىن ايتتى. وتىرىس بارىسىندا سەنات قازاقستان مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى (ەڭبەك داعدىلارىن دامىتۋ جانە جۇمىس ورىندارىن ىنتالاندىرۋ جونىندەگى جوبا) راتيفيكاتسيالادى. كەلىسىم بىلىكتىلىكتى تاۋەلسىز باعالاۋ جانە سەرتيفيكاتتاۋ جۇيەسىن ەنگىزۋ جانە جەتىلدىرۋگە, جۇمىسپەن قامتۋ قىز­مەتىن جاقسارتۋعا, ەڭبەككە جارامدى حالىقتى وقۋعا قول جەتكىزۋىن كەڭەي­تۋگە باعىتتالعان. جوبانىڭ قۇنى – 25 345 ميلليون تەڭگە – 137 ميلليون اقش دوللارى, ونىڭ ىشىندە سىرتقى قارىزداردى رەسپۋبليكالىق بيۋدجەتتەن قوسا قارجىلاندىرۋ ەسەبىنەن 6,8 ميلليارد تەڭگە – 37 ميلليون اقش دوللارى, سىرتقى قارىز ەسەبىنەن 18,5 ميلليارد تەڭگە – 100 ميلليون اقش دوللارى. جوبانى 2020 جىلعى 30 ماۋسىمدا اياقتاۋ جوسپارلانىپ وتىر. سەناتورلار زاڭناماعا سپورتتىق جانە سپورتتىق-بۇقارالىق, ويىن-ساۋىق, مادەني-بۇقارالىق ءىس-شارالار وتكىزۋ كەزىندە قاۋىپسىزدىكتى قامتاماسىز ەتۋ ماسەلەلەرى بويىنشا تۇزەتۋلەردى قابىلدادى. قۇجات جەرگىلىكتى اتقارۋشى ورگانداردىڭ بۇقارالىق ءىس-شارالاردى وتكىزۋگە قاتىستىرىلعان ۇيىمداردىڭ قىزمەتىن ۇيلەستىرەتىن ۇيىمداستىرۋ كوميتەتتەرىن قۇرۋىن قاراستىرادى. ۇيىمداستىرۋشىلارعا ءىس-شاراعا قاتىساتىن كورەرمەندەردىڭ بولجالدى سانى تۋرالى, ساتىلعان بيلەتتەردىڭ, تۇراق ورىندارىنىڭ سانى تۋرالى جەرگىلىكتى اتقارۋشى ورگانداردى ۋاقتىلى حاباردار ەتۋ جونىندەگى مىندەتتەر جۇكتەلەدى. ازاماتتاردىڭ قاۋىپسىزدىگىن قامتاماسىز ەتۋ ماقساتىندا جەكە تۇلعالارعا ءىس-شارالارعا بارعان كەزدە تىيىم سالۋلار مەن شەكتەۋ­لەر ەنگىزىلەدى. اتاپ ايتقاندا, ستاديوندارعا الكوگول ونىمدەرىن, شىنى جانە مەتالل ىدىستاعى ونىمدەردى, پيروتەحنيكالىق ءونىم­دەر­دى الىپ كىرۋگە, ادامدار ومىرىنە قاۋىپ توندىرەتىن كەز كەلگەن زات­تاردى مىنبەلەر مەن سپورت الاڭدارى­نا لاقتىرۋعا, الەۋمەتتىك, ناسىلدىك, ۇلتتىق جانە ءدىني ارازدىق تۋعىزا­تىن پلاكاتتار مەن ەمبلەمالاردى پايدالانۋعا تىيىم سالىنادى. دەپۋتاتتار, سونىمەن قاتار, سەنا­تورلاردى حالىقارالىق پارلا­مەنتتىك ۇيىمدارعا جانە سەنات­تىڭ شەت مەملەكەتتەردىڭ پارلامەنت­تەرى­مەن ىنتىماقتاستىق جونىندەگى توپ­تارىنا جىبەرۋ تۋرالى ماسەلەنى قارادى.