ءۇمىتىمىز – جاڭاشا ويلايتىن جاڭا پارلامەنتتە

بۇكىل الەمدەگى, سون­داي-اق, تمد مەن ءوز ەلىمىزدىڭ ىشىندەگى سوڭعى داعدارىس مەم­لەكەتىمىزدىڭ الدىندا مۇلدەم توسىن ماسەلەلەر تۋىن­داتتى. بۇگىنگى قا­­لىپ­تاسقان وسىناۋ سايا­­­سي-ەكونوميكالىق اح­­ۋالدىڭ ازاماتتاردى مۇلدەم باسقاشا, جاڭاشا ويلاۋعا يتەرمەلەۋى زاڭدى قۇبىلىس. بار جايتقا جاڭاشا كوزقاراسپەن قاراۋعا تۋرا كەلەدى. سول سەبەپتەن دە قازىرگى پارلامەنت ءماجىلىسىنىڭ زامان كوشىنە ىلەسە الۋى ەكىتالاي. ولاردىڭ ءوز تاراپىنان ۇسىنىس دەر كەزىندە ءتۇستى, پرەزيدەنت دەر كەزىندە ونى قابىل الدى دەپ ويلايمىن. ەندىگى ماسەلە, مەنىڭ ءوز ويىم – جاڭا سايلاناتىن ماجىلىسكە ەڭ الدىمەن ەلدىڭ قامىن قازىرگى ۋاقىت تۇرعىسىنان ويلايتىن, نامىسىن جىرتاتىن ازاماتتار سايلانۋى ءتيىس. ودان حالىق تا, ۇكىمەتىمىز دە ۇتادى. ال ەندى ون­داي بولماعان جاعدايدا جاڭا ساي­­لانعان پارلامەنتتىڭ ءوزى تىعىرىققا تىرەلىپ قالارى داۋسىز. قازىرگى الەمدىك داعدارىستىڭ ەلىمىزگە تيگىزىپ وتىرعان بەس باتپان سالماعى, ونىڭ قيىندىقتارى قازاقستاننىڭ قاراپايىم تۇر­عىندارىنان باستاپ تانىمال سايا­ساتكەرلەر مەن قوعام قايرات­كەرلەرىنە دەيىن بەلگىلى بولىپ قال­دى. دەمەك, قازاقستاندىق ار­مانعا باستايتىن ۇلت جوسپارىن جەدەلدەتىپ جۇزەگە اسىراتىن ۇلتتىق ساياسي رەفورمالار قازىرگى كۇردەلى كەزەڭدە ءوز جولىن تابۋى ءۇشىن جاڭادان سايلانعان حالىق قا­لاۋ­لىلارىنا – پار­لامەنت ءمۇ­شەلەرىنە ار­قا سۇيەيدى. ەكو­نو­ميكالىق رەفورمالار جوباسى دا بۇرىنعىدان بەتەر شيراي تۇسەدى. جاڭا پارلامەنتتە جاڭا باعىتتى تۋ ەتىپ ۇستايتىن, جوعارىدا ايتىلعان مۇددەلەردى ءوز مۇددەسىنەن جوعارى ۇستاپ, العا قويعان 15 ازامات بولسا جەتىپ جاتىر. ودان كوپ بولسا, ءبارى بىردەي سولاي ويلاسا, ءتىپتى – يگى. سوندا پارلامەنتىمىزدىڭ اتقاراتىن قىز­مەتى دە باسقاشا بولادى, ۋاقىت كوشىنەن ءبىر قادام دا قالمايدى. قازىر بۇدان 20-25 جىلداعىداي ەمەس, قازاقستاننىڭ ەڭسەسى كو­تەرىلدى, كوزدەگەن مارتەبەسى دە بيىك. دۇنيەجۇزىنىڭ الپاۋىت مەملەكەتتەرىمەن ارالاسىمىز كۇشەيدى, بايلانىسىمىز نى­عايدى. سوندىقتان دا الداعى ۋا­قىتتا مەملەكەتىمىز الەمدىك ءتا­جىريبەنىڭ ەڭ دۇرىسىن تاڭداپ, ەڭ وزىعىنا عانا مويىن بۇرۋى كەرەك. تاۋەلسىز قازاقستان حالقىنىڭ – ءبارىمىزدىڭ ارمانىمىزدىڭ ءوزى سول ەمەس پە؟  سەيداحمەت قۇتتىقادام, «مىسل» جۋرنالىنىڭ باس رەداكتورى, ساياساتتانۋشى.  الماتى.