سولتۇستىك قازاقستاندا ءبىر ادام ءۇسىپ ءولدى

پەتروپاۆل. 20 قاڭتار. سولتۇستىك قازاقستان وبلىسىنداعى زاگرادوۆكا اۋىلى ماڭىنان ءۇسىپ ولگەن ەر كىسىنىڭ ءمايىتى تابىلدى. پوليتسەيلەردىڭ پايىمداۋىنشا, قايتىس بولعان ادام قارلى بوراندا ۇيىنە جەتە الماي, اداسىپ كەتكەن. بۇل تۋرالى وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz حابارلادى. ەسىل اۋدانىنىڭ زاگرادوۆكا اۋىلىنا بەت العان ايىرتاۋ اۋدانى تۇرعىنىنىڭ ءمايىتى جولدان 150 مەتردەي قاشىقتىقتان تابىلعان. 1953 جىلى تۋىلعان ازاماتتىڭ ۇسىك شالعان دەنەسىن اۋىل ادامدارى كورىپ, جەرگىلىكتى پوليتسياعا حابار بەرگەن. جالپى, وبلىستىق توتەنشە جاعدايلار جونىندەگى دەپارتامەنت وكىلدەرى اۋا رايىنىڭ كۇرت سۋىتىپ, جەلدىڭ كۇشەيەتىنى جايلى قانشا حابارلاسا دا, جۇرتشىلىق بۇل ەسكەرتۋلەرگە دۇرىس قۇلاق اسپاي كەلەدى. ال وسىنىڭ سالدارىنان وڭىردە قايعىلى جايتتار ورىن الۋدا. توتەنشە جاعدايلار قىزمەتىنىڭ ماماندارى تۇرعىندارعا ساقتىق شارالارىن ساقتاۋىن سۇراپ, 584 مىڭ ابونەنتكە SMS حاتتار جىبەرگەن. قۇتقارۋشىلار دەمالىس كۇندەرى جولعا شىعىپ, قيىندىقتارعا تاپ بولعان 93 جولاۋشىعا كومەك قولىن سوزسا, عابيت مۇسىرەپوۆ اتىنداعى, تايىنشا, ەسىل, شال اقىن, ايىرتاۋ, جامبىل جانە قىزىلجار اۋداندارىنىڭ تاسجولدارىن باسىپ قالعان قار قۇرساۋلارىن ارشۋعا, ادامداردى قۇتقارۋعا 45 تەحنيكا جۇمىلدىرىلعان. ايتا كەتەيىك, اۋا رايىنىڭ كۇرت تومەن تۇسۋىنە بايلانىستى «استانا-پەتروپاۆل», «جەزقازعان-پەتروپاۆل», «مامليۋتكا-قوستاناي», «ەكاتەرينبۋرگ-الماتى», «كوكشەتاۋ-رۋزاەۆكا», سونىمەن قاتار بارلىق اۋدانارالىق جولداردا كەزەكشىلىك ۇيىمداستىرىلىپ, باقىلاۋ كۇشەيتىلگەن. ءومىر ەسقالي. دەرەك: سولتۇستىك قازاقستان وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى. سۋرەت: 24.kz.