مۇحيت دەڭگەيى عالىمدار ويلاعاننان دا كوتەرىلىپ بارادى

استانا. 20 قاڭتار. گرەنلانديا مۇزدىقتارىنىڭ ەرۋىنە بايلانىستى مۇحيت دەڭگەيى عالىمدار ويلاعاننان دا كوتەرىلىپ بارادى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. ماماندار 2009 جانە 2010 جىلدارى جاز ماۋسىمىنىڭ ىستىق بولۋىنا بايلانىستى مۇزدىڭ بەتكى قاباتتارى ەرىپ كەتۋىنەن مۇحيتقا قۇيىلاتىن سۋدىڭ ارتقانىن انىقتادى. وسىعان بايلانىستى جاھاندىق جىلىنۋدىڭ اسەرى ۋاقىتىنان بۇرىن سەزىلۋى مۇمكىن. پروفەسسور دجەيسون بوكس دانيانىڭ عىلىمي ينتەرنەت-پورتالىنا بەرگەن سۇحباتىندا, قاردىڭ جوعارعى قاباتىنا جينالعان سۋ قاتتى مۇز قابىرشاعىنا اينالاتىنىن, بۇل ءوز كەزەگىندە الداعى جىلدارى سۋدىڭ تەرەڭىرەك ءسىڭىپ, مۇزدىققا اينالۋىنا جول بەرمەيتىنىن ايتتى. وسىعان دەيىن سىرەسىپ جاتقان مۇزدىڭ بيىكتىگى كەيبىر جەرلەرىندە 40 مەتردى قۇراعان بولسا, بۇگىندە ايتارلىقتاي ازايدى. «ەرىگەن قار سۋى مۇحيتقا مولشەردەن تىس قۇيىلۋدا. بۇل ءبارىمىز ءۇشىن كۇتپەگەن جايت بولدى. الداعى ون جىل كولەمىندە مۇحيت دەڭگەيى قانشالىقتى كوتەرىلەتىنىن انىقتاۋىمىز قاجەت», – دەيدى دجەيسون بوكس. ال مۇزتانۋشى ديرك ۆان است گرەنلاندياداعى مۇزدىقتاردىڭ ەرۋى جاھاندىق جىلىنۋدىڭ اسەرىنەن بولۋدا دەيدى. ايتا كەتەيىك, گرەنلانديا – سولتۇستىك امەريكانىڭ سولتۇستىك-باتىسىندا ورنالاسقان الەمدەگى ەڭ ۇلكەن ارال. جەر كولەمى 2 130 800 شارشى كيلومەتردى قۇرايدى. اۋماعىنىڭ باسىم بولىگىن مۇز الىپ جاتىر. شىلدەنىڭ ىستىق كۇندەرى اۋا تەمپەراتۋراسى +21 تسەلسي گرادۋسقا دەيىن بارسا, قىستا ورتاشا كورسەتكىش -25 تسەلسي گرادۋستى كورسەتەدى. ايان ءابدۋالي. دەرەك: تاسس. سۋرەت: tonkosti.ru.