اتىراۋدا جۇرگىزۋشى شارتتى جازا الدى

اتىراۋ. 20 قاڭتار. اتىراۋ وبلىسىنداعى يساتاي اۋداندىق سوتىنىڭ ۇكىمىمەن جۇرگىزۋشى بوتەننىڭ كولىگىن رۇقساتسىز جۇرگىزىپ, قاسىنداعى جولاۋشىنىڭ ءبىرىنىڭ ولىمىنە, ەكىنشىسىنىڭ دەنساۋلىعىنا قاتەرلى زيان كەلتىرۋگە سەبەپشى بولسا دا 5 جىل مەرزىمگە شارتتى تۇردە سوتتالدى. بۇل تۋرالى وبلىستىق سوتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. «سوتتالۋشى الكوگولدىك ماساڭ كۇيدە «ءۇش كوپىر» ەلدى مەكەنىندەگى تۇرعىننىڭ يەلىگىندەگى «گاز 33021 212» ماركالى اۆتوكولىگىنە جولاۋشى رەتىندە ءۇش ادامدى وتىرعىزىپ الىپ, كولىك يەسىنىڭ رۇقساتىنسىز كولىكتى ايداپ كەتەدى. ح.ەرعاليەۆ سەلوسى باعىتىنا قاراي قارا جولمەن كەتىپ بارا جاتىپ, باسقارۋ جۇيەسىن يگەرە الماي, جول اپاتى وقيعاسىنا ۇشىرايدى. وسىنىڭ سالدارىنان اۆتوكولىكتە وتىرعان جولاۋشىلاردىڭ ۇشەۋى دە اۆتوكولىكتىڭ سالونىنان سىرتقا قۇلاپ, ونىڭ ءبىرى العان اۋىر دەنە جاراقاتىنان وقيعا بولعان جەردە قازا تاپتى. ال تاعى ءبىر جولاۋشىنىڭ دەنساۋلىعىنا قاتەرلى زيان كەلگەن. باستى سوت تالقىلاۋىندا سوتتالۋشى وزىنە تاعىلعان ايىپتى تولىق مويىنداعان», – دەپ حابارلادى اتىراۋ وبلىستىق سوتىنىڭ ءباسپاسوز حاتشىسى بورانباي عاليەۆ. يساتاي اۋداندىق سوتىنىڭ ۇكىمىمەن سوتتالۋشى قىلمىستىق كودەكستىڭ 200-بابىنىڭ 1-بولىگىمەن جانە 346-بابىنىڭ 4-بولىگىمەن كىنالى دەپ تانىلدى. الايدا, وعان قىلمىستىق كودەكستىڭ 63-بابىن قولدانىپ, تاعايىندالعان جازا كولىك قۇرالىن باسقارۋ قۇقىعىنان 7 جىل مەرزىم جانە 5 جىل مەرزىمگە باس بوستاندىعىنان ايىرۋ شارتتى دەپ ەسەپتەلىپ, پروباتسيالىق باقىلاۋ بەلگiلەندى. جولداسبەك شوپەعۇل. دەرەك: اتىراۋ وبلىستىق سوتىنىڭ ءباسپاسوز قىزمەتى. سۋرەت: rod-pravo.org.