جامبىل وبلىسىندا كيللەر قاريانى ولتىرۋگە قولى بارماپتى

تاراز. 20 قاڭتار. ادام ولتىرۋگە تاپسىرىس العان كيللەر قاريانى اياعاندىقتان ولتىرۋگە قولى بارماپتى. بۇل تۋرالى جامبىل وبلىستىق ءىىد-ءنىڭ ءباسپاسوز قىزمەتى حابارلادى. جاقىندا جامبىلدىق پوليتسيا قىزمەتكەرلەرى 54 جاستاعى ايەلدى ۇستادى. وعان 84 جاستاعى زەينەتكەردى ولتىرۋگە تاپسىرىس بەردى دەگەن ايىپ تاعىلىپ وتىر. زەينەتكەر مەن ايەلدىڭ اراسىنداعى داۋ وبلىس ورتالىعىنداعى ءبىر ۇيدەن تۋىنداپتى. ۇزاق ۋاقىت داۋ بولعان بۇل ماسەلە اقىرىندا سوتتا قارالىپ, ناتيجەسىندە زەينەتكەردىڭ پايداسىنا شەشىلگەن. سوندىقتان ايەل ءۇي يەسىنەن قۇتىلۋدى ويلاپ, بۇرىن سوتتى بولعان ءبىر كىسىگە ادام ولتىرۋگە تاپسىرىس بەرگەن. بىراق قىلمىستى جاساۋعا ابدەن دايىندالعان كيللەر قاريانى اياپ, اقىرىندا بۇل تۋرالى ىشكى ىستەر ورگاندارىنا ءمالىم ەتىپتى. وسىدان كەيىن زەينەتكەردىڭ قانعا بويالىپ, ءولىپ جاتقان ءساتىن قولدان ۇيىمداستىرعان پوليتسيا قىزمەتكەرلەرى تاپسىرىس بەرۋشىنى اقشا بەرىپ جاتقان كەزىندە قولعا ءتۇسىردى. كۇدىكتى تاراز قالاسىنداعى ۋاقىتشا ۇستاۋ مەكەمەسىنە جونەلتىلدى. ورالحان ءداۋىت. دەرەك, سۋرەت: egemen.kz