اقش پرەزيدەنتىنىڭ يتتەرىن ۇرلاماق بولعان قىلمىسكەر قولعا ءتۇستى

استانا. 11 قاڭتار. اقش پرەزيدەنتى باراك وبامانىڭ وتباسىنا تيەسىلى ەكى ءيتتى ۇرلاپ كەتەمىن دەپ قوقان-لوقى كورسەتكەن قىلمىسكەر قولعا ءتۇستى. بۇل تۋرالى Interfax.ru-عا سىلتەمە جاساعان egemen.kz ءتىلشىسى حابارلادى. The Washington Times باسىلىمىنىڭ حابارلاۋىنشا, قىلمىسكەر ۆاشينگتون قالاسىندا ۇستالعان. ءتىنتۋ كەزىندە ونىڭ كولىگىنەن قارۋ-جاراقتىڭ بىرنەشە ءتۇرى تابىلعان. اتاپ ايتقاندا, 22 كاليبرلى ۆينتوۆكا, 350-دەن استام وق-ءدارى, پوليتسيا شوقپارى جانە باسقا دا قارۋ تۇرلەرى بار. قۇپيا قىزمەتتىڭ مالىمدەمەسىنە قاراعاندا, ۇستالعان قىلمىسكەردىڭ ەسىمى – سكوتت د.ستوكەر. 49 جاستاعى سكوتت سولتۇستىك داكوتانىڭ تۇرعىنى ەكەن. جاۋاپ الۋ كەزىندە ول ءوزىن يسۋس حريستوس دەپ تانىستىرعان. سونداي-اق, دجون كەننەدي مەن مەريلين مونرونىڭ ۇلىمىن دەگەن ول اقش پرەزيدەنتتىگىنە سايلاۋعا ۇمىتكەر رەتىندە قاتىسۋدى جوسپارلاعانىن ايتقان. ايتا كەتەيىك, وباما وتباسى بو ەسىمدى ءبىرىنشى يتتەرىن وسىدان جەتى جىل بۇرىن اسىراپ الدى. ءتىپتى, سول ءيتتىڭ قۇرمەتىنە «بو, قارعىباۋى بار امەريكالىق باس قولباسشى» دەگەن كىتاپ تا جازىلدى. ال ەكى جىل بۇرىن وبامالار تاعى ءبىر ءيتتى اسىراپ الدى. وعان پرەزيدەنت وتباسى سانني دەگەن ات قويدى. ەلامان قوڭىر. دەرەك: Interfax.ru. سۋرەت: reuters.com.