انگليادا سۋ تاسقىنىنان زارداپ شەككەندەرگە 1,9 ملرد. دوللار تولەنەدى

استانا. 11 قاڭتار. انگليادا جاڭا جىل قارساڭىندا بولعان سۋ تاسقىنى مەن داۋىل جەلدەن كەلگەن شىعىن كولەمى 1,3 ميلليارد فۋنت ستەرلينگتى (1,9 ميلليارد دوللار) قۇرادى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. جەلتوقسان ايىنىڭ ورتاسىنان قاڭتار ايىنىڭ باسىنا دەيىن بولعان تابيعات اپاتىنان تۇرعىن ۇيلەر, قالالىق كوممۋنيكاتسيا ورتالىعى مەن جەكە كاسىپورىن عيماراتتارى زارداپ شەكتى. وسى ۋاقىت ارالىعىندا قۇتقارۋ جۇمىستارىنا 500 اسكەري قىزمەتكەر جۇمىلدىرىلدى. سونداي-اق, قوسالقى قۇرامدا ءبىر مىڭنان استام سارباز بولدى. تابيعات اپاتى اسىرەسە, لانكاشير مەن باتىس يوركشير گرافتىقتارىنا زيانىن تيگىزدى. پوليتسيا قىزمەتكەرلەرى سۋ تاسقىنىنان تۇرعىنداردى قاۋىپسىز ايماققا كوشىرۋگە ءماجبۇر بولدى. ال مىڭداعان وتباسى بىرنەشە كۇن جارىقسىز قالدى. ايتا كەتەيىك, ۇلىبريتانيا پرەمەر-ءمينيسترى دەۆيد كەمەرون وسىعان بايلانىستى بيلىكتىڭ ارنايى 2,3 ميلليارد فۋنت ستەرلينگ  (3,4 ميلليارد دوللار) بولەتىنىن مالىمدەگەن. قازىرگى كەزدە 3 مىڭنان استام ادام ۇيلەرىن كۇردەلى جوندەۋدەن وتكىزۋ قاجەتتىلىگىنە بايلانىستى ۋاقىتشا باسپانا ىزدەۋدە. ايان ءابدۋالي. دەرەك: تاسس. سۋرەت: metro.co.uk.