استانا. 11 قاڭتار. قازاقستاندا ازاماتتاردى شاقىرۋ ۋچاسكەلەرىنە تىركەۋ باستالدى. 2016 جىلدىڭ قاڭتارى مەن ناۋرىز ايى ارالىعىندا 1999 جىلى تۋىلعان 100 000-عا تارتا قازاقستاندىق اسكەري ەسەپكە الىنادى. بۇل تۋرالى egemen.kz ءتىلشىسى حابارلادى.
تىركەۋ جەرگىلىكتى اتقارۋ ورگاندارىمەن قورعانىس ىستەرى جونىندەگى باسقارمالار ارقىلى جۇزەگە اسىرىلادى. ولاردىڭ شەشىمى بويىنشا ازاماتتاردى مەديتسينالىق كۋالاندىرۋدان وتكىزۋ ءۇشىن مەديتسينالىق كوميسسيا قۇرىلادى.
قر قك باس شتابى ۇيىمداستىرۋ-جۇمىلدىرۋ جۇمىستارى دەپارتامەنتىندە تۇسىندىرگەندەي, تىركەۋگە الۋ ازاماتتاردى اسكەري ەسەپكە قويۋ, ولاردىڭ سانىن, ءبىلىم دەڭگەيى مەن دەنە دايارلىعىن, اسكەري قىزمەتكە جارامدىلىق دارەجەسىن انىقتاۋ ءۇشىن ۇيىمداستىرىلىپ, وتكىزىلەدى. مەديتسينالىق كۋالاندىرۋدان ءوتۋ بارىسىندا دەنساۋلىق جاعدايى بويىنشا شامالى شەكتەۋلەر انىقتالعان بوزبالالارعا ءتيىستى ەمدەۋ مەكەمەلەرىنە جولدامالار بەرىلەدى. ول جەردە جەتكىنشەكتەر دەنساۋلىقتارىن قالپىنا كەلتىرە الادى.
سونىمەن قاتار تىركەۋگە الۋ ۇردىسىندە قازاقستان مەن شەتەل مەملەكەتتەرى قورعانىس مينيسترلىگىنىڭ جوعارى وقۋ ورىندارىنا وقۋعا ءتۇسۋ جونىندە ۇگىت-ناسيحات جۇمىسى جۇرگىزىلەدى. بوزبالالارعا اسكەري جوعارى وقۋ ورىندارىن, كادەت كورپۋسىن تامامداعاننان كەيىنگى كەمەلدى كەلەشەك تۋرالى ايتىپ بەرەدى. اسكەري وقۋ ورىندارىندا وقۋعا نيەت بىلدىرگەندەر مەن جارامدىلار انىقتالادى.
سونىمەن بىرگە تىركەۋگە الۋ پاتريوتتىق تاربيە بەرۋ سيپاتىنا يە. بوزبالالارعا اسكەري كاسىپ پەن اسكەري قىزمەتشىلەردىڭ ارنالۋى, قازاقستاننىڭ قازىرگى زامانعى قارۋلى كۇشتەرىنىڭ جەتىستىكتەرى مەن دامۋى, اسكەري قىزمەتشىلەرىمىزدىڭ حالىقارالىق ءىرى اۋقىمدى وقۋ-جاتتىعۋلار مەن بىتىمگەرشىلىك وپەراتسيالارعا قاتىسۋى مەن ساتتىلىكتەرى تۋرالى ايتىپ بەرەدى.
داستان كەنجالين.
دەرەك, سۋرەت: قازاقستان رەسپۋبليكاسى قورعانىس مينيسترلىگى.
