اقىنمەن ديدارلاستى

مەملەكەت تاريحى ينستيتۋتى قۇرىلعان ۋاقىتتان بەرى الىس-جاقىن شەتەلدىك عالىمداردىڭ قاتىسۋىمەن, اتاپ ايتقاندا اقش, فرانتسيا, رەسەي, تۇركيا, سونداي-اق ءوز وتانىمىزدىڭ تانىمال عالىمدارىمەن, بەلگىلى قوعام قايراتكەرلەرىمەن كەزدەسۋلەر وتكىزىپ تۇرۋدى يگى داستۇرگە اينالدىرىپ كەلەدى. جاقىندا اتا زاڭىمىزدىڭ 15 جىلدىعىنا وراي ينستيتۋت عالىمدارى كورنەكتى اقىن, قازاقستاننىڭ يۋنەسكو-داعى تۇراقتى وكىلى, حالىقارالىق انتيادرولىق “نەۆادا-سەمەي” قوزعالىسىنىڭ پرەزيدەنتى ولجاس سۇلەيمەنوۆپەن كەزدەستى. كەزدەسۋ بارىسىندا ولجاس ومار­ ۇلى ينستيتۋت قىزمەتكەرلەرىنىڭ جۇمىس ورنىمەن, عىلىمي ىزدەنىستەرىمەن تانىستى. كىتاپحانادا ۇيىمداستىرعان “و.سۇلەيمەنوۆ جانە ونىڭ زامانداس­تارى” اتتى كورمەنى تاماشالادى. ينستيتۋت ديرەكتورى, تاريح عىلىم­دارى­نىڭ دوكتورى, پروفەسسور بۇركىتباي اياعان 40 جىلدان استام ۋاقىت بويى ادامزات بالاسىنا قاسىرەت ءتوندىرىپ كەلگەن سەمەي يادرولىق سىناق پوليگونىنىڭ جا­بىلۋىنداعى ولجاس سۇلەيمەنوۆتىڭ زور ۇلەسىن ەرەكشە اتاي وتىرىپ, ەل تا­ريحى بەلسەندى تۇردە زەرتتەلىپ جاتقان­دى­عىن تىلگە تيەك ەتتى. بيىل عالىمدار قازاقستان تاريحىنىڭ جاڭا وقۋلىعى مەن حرەستوماتياسىن جانە ونعا جۋىق عىلىمي جانە قوعامدىق-ساياسي باسىلىم­داردىڭ باسپادان شىققانىن جەتكىزدى. ديدارلاسۋ ساتىندە اقىن قازاق­ستاننىڭ يۋنەسكو-داعى قىزمەتى, قازاق حالقىنىڭ الەمدىك وركەنيەتكە قوسقان ۇلەسى مەن جەتىستىكتەرى, اتقارعان ءىس-شارالارى جايىن قوزعاپ, تالاي جىلدار بويى قالام تەربەپ جۇرگەن “1001 ءسوز” اتتى كىتابىن دايىنداپ جاتقانىن تىلگە تيەك ەتتى. ول سونىمەن قاتار, ەل بىرلىگى دوك­تري­ناسى, جاڭا ءتىل ءبىلىمى, جاڭا وقۋ­لىق­تار, تاعى باسقا وزەكتى پروبلەمالارعا توقتالدى. ا.ابەنوۆا, مەملەكەت تاريحى ينستيتۋتىنىڭ عىلىمي قىزمەتكەرى.