ەلباسى قابىلدادى

مەملەكەت باسشىسى نۇرسۇلتان نازارباەۆ پرەمەر-مينيستر كارىم ءماسىموۆتى, ۇلتتىق بانك توراعاسى گريگوري مارچەنكونى جانە “سامۇرىق-قازىنا” ۇلتتىق ءال-اۋقات قورى” اق باسقارما توراعاسى قايرات كەلىمبەتوۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. كەزدەسۋ بارىسىندا پرەزيدەنت اعىمداعى جىلدىڭ 31 تامىزىندا قارجى نارىعى مەن قارجى ۇيىم­دارىن رەتتەۋ جانە قاداعالاۋ ءجو­نىن­دەگى اگەنتتىك باسقارماسىندا “بتا بانك” اق-تى قايتا قۇرى­لىمداۋ جوسپارى بەكىتىلگەنى تۋرالى حاباردار بولدى. پرەزيدەنت بارىنە اتقارىلعان جۇمىستار ءۇشىن العىس ايتتى جانە مەم­لەكەت دۇرىس ستراتەگيانىڭ ءناتي­جەسىندە ەلىمىزدىڭ بانك جۇيەسىن تۇراق­تاندىرعانىن اتاپ ءوتتى, ول  بۇگىندە قالىپتى رەجىمدە جۇمىس ىستەۋدە. جۋرناليستەرگە ارنالعان بري­فينگ­تە ۇلتتىق بانك توراعاسى گري­گوري مارچەنكو بۇدان بۇرىن, اعىمداعى جىلدىڭ 1 ساۋىرىندەگى جاع­داي بويىنشا – “اليانس-بانكتىڭ”, ال اعىمداعى جىلدىڭ 1 شىلدەسىندەگى جاعداي بويىنشا “تەمىربانكتىڭ” قارىزدارىن قايتا قۇرىلىمداۋ اياقتالعانىن اتاپ ءوتتى. وسىلايشا, بارلىق ءۇش بانك وتكەن جىلى كوكتەمدە باستاعان قايتا قۇرىلىمداۋ ۇدەرىسىن تابىستى اياقتادى. جالپى جيىنتىعىندا 11 ميلليارد دوللارعا جۋىق قارىز ەسەپتەن شىعارىلدى. قارىزدىڭ قالعان بولىگى قايتا قۇرىلىمدالدى – ءىشىنارا وبليگاتسياعا, ءىشىنارا وسى بانكتەر اكتسياسىنا كونۆەر­سيالاندى. اتالعان ءۇش بانكتىڭ سىرتقى كرەديتورلارىنا سىندارلى ۇستانىمدارى ءۇشىن العىس ايتۋىمىز كەرەك. ەڭ باستىسى, تۇتاستاي العاندا سىرتقى قارىز ماسەلەسى رەتتەلدى, – دەدى گ.مارچەنكو.