سامميتكە قاتىسۋشىلار قاۋىپسىزدىگى باستى نازاردا

16 تامىزدا اقوردادا بولعان جينالىستا پرەزيدەنت نۇرسۇلتان نازارباەۆتىڭ تاپسىرماسىمەن استانا قالاسىندا الداعى 1-2 جەلتوقساندا وتەتىن ەۋروپاداعى قاۋىپسىزدىك جانە ىنتىماقتاستىق ۇيىمى سامميتىنە  دايىندىق ءۇشىن ءتۇرلى باعىتتاردا ارنايى جۇمىس توپتارى قۇرىلعان بولاتىن. كەشە استانادا ەقىۇ-نىڭ ءىس باسىنداعى توراعاسى, قر مەم­لە­كەتتىك حاتشىسى – سىرتقى ىستەر ءمينيسترى  قانات ساۋداباەۆ العاش رەت 11 جىلدىق  ۇزىلىستەن كەيىن بو­لاتىن ءىرى حالىقارالىق فورۋم قاتىسۋشىلارىنىڭ قاۋىپسىزدىگىن قامتاماسىز ەتۋ ماسەلەلەرى جايلى ارنايى جۇمىس توپتارىمەن جينالىس وتكىزدى. ەقىۇ سامميتىنە قاتىسۋشى­لاردىڭ قاۋىپسىزدىگىن قامتاماسىز ەتۋ قادامدارى جونىندە قر پرە­زيدەنتى كۇزەت قىزمەتىنىڭ باس­تى­عى م.ايۋباەۆ, ۇقك توراعاسى ن.ءابى­­قاەۆ, “سىربار” سىرتقى بار­لاۋ قىز­مەتىنىڭ ديرەكتورى ا.جان­قۇ­ليەۆ, قورعانىس مي­نيسترى ءا.جاق­سى­بەكوۆ, ىشكى ىستەر مي­نيسترى س.باي­ماعانبەتوۆ, ءتو­تەن­شە جاع­دايلار ءمينيسترى ۆ.بوج­كو جانە استانا قالا­سى­نىڭ اكىمى ي.تاس­ماعامبەتوۆ حابارلاما جاسادى. جينالىستى قورىتىندىلاي كەلە, ق.ساۋداباەۆ: “56 مۇشە مەم­لەكەتتىڭ باسشىلارىن, ەقىۇ-عا  ارىپتەس 12 مەم­لە­كەت­تىڭ جانە نە­گىزگى حالىقارالىق ۇيىمدار باسشى­لارىن قوسقاندا 5000-عا جۋىق ادامنىڭ قاتىسۋى كۇتىلىپ وتىرعان  وسىنداي  جوعا­رى دارەجەدەگى جانە اۋقىمدى باسقوسۋ قازاقستاننىڭ عانا ەمەس, پوستكەڭەستىك ەلدەردىڭ تا­ريحىندا بولعان ەمەس. ءبىزدىڭ ەلباسىمىز ايتىپ وتكەندەي, وتا­نىمىزعا دەگەن بۇل ۇلكەن قۇرمەت جانە جاۋاپكەرشىلىك. استانادا قو­ناقتاردىڭ قاۋىپسىزدىگىن, زاڭدى­لىق­تى جانە ءتارتىپتى ساقتاۋ جوعا­رى دەڭگەيدەگى تاريحي ماڭىزدى كەزدەسۋدى جەمىستى وتكىزۋدىڭ بىردەن-ءبىر تالابى بولىپ تابىلادى”, – دەدى. وتىرىستىڭ ناتيجەسى بويىنشا ءتيىستى مەملەكەتتىك ورگاندارعا تاپسىرمالار جۇكتەلدى, دەپ حابارلادى قر ءسىم-ءىنىڭ ءباسپاسوز قىزمەتى.