ويۋمەن ايتقان قىز سىرى

وبلىس ورتالىعىنداعى دوستىق ءۇيىنىڭ زالىندا ەرەكشە كورمە اشىل­دى. ونداعى شىعارمالاردىڭ بارلىعى دا تەك ويۋدان تۇرادى. جاس تالاپ سۋرەتشى قارلىعاش شوڭوۆا ءوزىنىڭ ايتار ويىن دا, سىرىن دا تەك ويۋ تىلىمەن جەتكىزىپتى. حالقى­مىز­دىڭ ەجەلگى ونەرىن قارلىعاش شىعارماشىلىقپەن جاڭعىرتا وتىرىپ, ويۋمەن وبرازدار جاسايدى, وي ايتادى. سۋرەتشى-شەبەر ءار شىعارماسىنا ات قويعان, ول “اققۋ-ارمان”, “جىلدىڭ ءتورت مەزگىلى”, “قۇس­مۇرىن”, “شايانباس”, “قۋا­نىش”, “جاڭا سىرماق” بولىپ جالعاسا بەرەدى. قارلىعاش شوڭوۆا قوستاناي وڭىرىندە ونەرگە كەلگەن ەڭ جاڭا ەسىم بولىپ سانالادى. وبلىستىق تەلەرا­ديو كومپانياسىندا رەجيسسەر بو­لىپ ىستەيتىن قارلىعاشتىڭ مۇنداي ونەرىنەن ارىپتەستەرى دە حابارسىز بولىپ شىقتى. ۇلكەن ءىستى ۇندەمەي ءجۇرىپ بىتىرگەن بويجەتكەن ارىپتەس­تەرىن كورمەسىنە شاقىرعاندا ءبىر-اق ءبىلدى. مەكتەپ قابىرعاسىندا سۋرەت سالۋدى, تىگىن تىگۋدى ۇناتسا دا قار­لىعاش بۋحگالتەر ماماندىعىن العان بولاتىن. كەيىنىرەك تەلەجۋرنا­ليس­تيكاعا ىقىلاسى اۋىپتى. بىراق بالا كەزدەگى ادەتىمەن ول جۇمىستان بوس كەزىندە قولىنا قالام الىپ سۋرەت سالۋدى, تىگىن تىگۋدى تاستاماعان ەكەن. وسىنىڭ بارلىعى دا ونەرگە دەگەن ىنتىزارلىق ەكەنىن قارلىعاش اۋ­ىلداس اعاسى, قولونەر شەبەرى, سۋ­رەت­شى مۇحامەتقالي راحاليەۆتىڭ شاعىن شەبەرحاناسىنا بارعاندا ءبىر-اق ءتۇ­سىندى. مۇحامەتقاليدىڭ دومبىراعا, قوبىزعا, ساندىققا ويىپ سالعان ويۋى ونى ەرەكشە قىزىقتىردى. – قارلىعاش مەنىڭ شەبەرحا­نا­ما وسىدان ءۇش جىل بۇرىن كەلگەن ەدى. ءبىراز ۋاقىت وتكەننەن كەيىن ما­عان كەلىپ, ءوزىنىڭ سالعان, ويعان ويۋىن كورسەتتى. ونىڭ بويىنداعى تا­لانت ۇشقىنىن بىردەن بايقادىم دا, مۇنى تاستاماۋعا, دامىتۋعا كەڭەس بەردىم. قارلىعاش شەبەرلىگىنىڭ ءار شىعارما سايىن ءوسىپ وتىرعانى قۋانتادى. ول ارنايى كاسىپتىك ءبىلىم الماسا دا, بوياۋلاردىڭ سايكەستىگىن, گامماسىن ساقتاپ وتىرۋدى جاقسى بىلەدى, – دەيدى مۇحامەتقالي راحاليەۆ. وسى كورمەنىڭ اشىلۋىندا ءسوز العان بەلگىلى اقىن سەرىكباي وس­پا­نوۆ جانە تاعى باسقالار قارلىعاش­تىڭ ۇلتتىق ونەر ارقىلى وي ايتا بىلگەنىن جوعارى باعالاپ, ونىڭ شىعارماشىلىعىنا تابىس تىلەدى. – قارلىعاش ويۋلارىن اكەپ كور­سەتكەندە ءبىز وعان بىردەن كونستي­تۋتسيا كۇنىنە ارناپ كورمە ۇيىمداس­ت­ىرۋعا ۇسىنىس جاسادىق, – دەيدى وبلىستىق كوركەمسۋرەت گالەرەياسى­نىڭ مەڭگەرۋشىسى سايا نۇرلىباەۆا. – ويتكەنى, ويۋ حالقىمىزبەن بىرگە جاساپ كەلە جاتقان, قازاقتىڭ دارقان دالاسىن, مىنەزىن, تۇرمىس-تىرشىلىگىن كورسەتەتىن ەجەلگى ونەر. ال قارلىعاش وسى ەجەلگى ونەر ارقىلى تاۋەلسىز ەلىمىزدىڭ بۇگىنىن جىرلايدى. ونىڭ ويعان ويۋىنان اسقار تاۋدىڭ, دالانىڭ, كوك تۋى­مىز­داي اسپاننىڭ, كول مەن وزەننىڭ, التىن استىقتىڭ, جايناعان گۇلدىڭ بەينەسىن, بوياۋىن كورەمىز. العاشقى كورەرمەندەرى الدىندا ءسوز العان جاس سۋرەتشى-شەبەر بۇل ونەردى الداعى ۋاقىتتا جاڭا قى­رىنان دامىتا بەرەتىندىگىن ايتتى. كور­مەگە قارلىعاشتىڭ قىرىقتان اس­تام شىعارماسى قويىلعان. نازىك­تىك پەن سالماقتى ويدى ويۋدا تو­قاي­لاستىرعان كورمەنى قوستانايلىقتار ءبىر اي بويى تاماشالايتىن بولادى. ءنازيرا جارىمبەتوۆا, قوستاناي.