قۋات امەريكانىڭ ماسساچۋسەتس ۋنيۆەرسيتەتىن ءبىتىرىپ, قازىر سول جاقتا وقۋىن ءارى قاراي جالعاستىرۋدا. ال, وسى “التىن بالانىڭ” ۇستازى دەگەنىمىز ول – داۆيد گانەلين, فيزيكا-ماتەماتيكاعا قابىلەتى جوعارى بالالاردى وقىتىپ, دايىنداپ شىعاراتىن اتاقتى مۇعالىم.
2003 جىلى ەلباسىنىڭ جارلىعىمەن ۇزاق جىلعى ۇستازدىق ەڭبەگى ەسكەرىلىپ, “ەرەن ەڭبەگى ءۇشىن” مەدالىمەن ماراپاتتالدى. بۇل مەكتەپكە وقۋعا كەلەتىن وقۋشىلار ۇلكەن تاڭداۋدان, سىناقتان وتەدى. كوپشىلىگى قۋات سياقتى گانەليننىڭ اتاقتى شاكىرتتەرىنىڭ ءبىرى بولعىلارى كەلەدى. ليتسەيدە وقىپ جۇرگەن كەزىندە قۋات جاپونيادا وتكەن حالىقارالىق وليمپيادادان التىن مەدالمەن, ال نيۋ-يورك پەن شوتلانديادا وتكەن جارىستاردان كۇمىس مەدالمەن ورالدى.
دارىندى بالالارعا ارنالعان مەكتەپ-ليتسەيدە وقۋشىلارعا ماتەماتيكا-فيزيكا پاندەرىنەن ساباق بەرە ءجۇرىپ, گانەلين قولى ءسال بوساي قالعاندا وقۋلىقتار جازۋمەن دە اينالىسىپ ءجۇر. بار ارمان-ماقساتى – ماتەماتيكاعا, فيزيكاعا اسا قابىلەتتى وقۋشىلاردىڭ دارىندارىن شىڭداپ, حالىقارالىق وليمپيادالىق جارىستاردا ەلىمىزدىڭ اتىن الەمگە تانىتۋ.
بۇل كۇندەرى شاكىرتتەرى امەريكادا وقيتىن, ماتەماتيكا ءپانى بويىنشا ەلىمىزدەگى ۇزدىك وليمپيادالىق مەكتەپ بولىپ تابىلاتىن №8 ليتسەيدىڭ مۇعالىمى داۆيد گانەلين ءۇشىن بيىلعى جاڭا وقۋ جىلى ءارى قۋانىشتى, ءارى تابىستى باستالدى دەۋگە بولادى. ۇستاز ەڭبەگى اقتالدى. جۋىردا بولىپ وتكەن ءداستۇرلى تامىز ءماسليحاتىندا داۆيد گانەلينگە, وبلىس ورتالىعىنداعى اباي اتىنداعى مەكتەپ-ليتسەيدىڭ مۇعالىمى روزا قاسىمجانوۆاعا جانە شارباقتى اۋدانى جىلىبۇلاق جالپى ءبىلىم بەرەتىن ورتا مەكتەپ مۇعالىمى سۇلۋشاش قالدىباەۆالارعا وبلىس اكىمى باقىتجان ساعىنتاەۆ “جيگۋلي” جەڭىل اۆتوكولىگىنىڭ كىلتتەرىن تاپسىردى.
فاريدا بىقاي, پاۆلودار وبلىسى.
