شەتەلدىكتەر شارشى الاڭعا شىققان جەكپە-جەكتەر

“سولتۇستىك” ديۆيزيونىنا كىرە­تىن قاراعاندى مەن اقمولا وبلىس­تارىنىڭ اراسىندا وتكەن ايقاستا الاڭ يەلەرى 16:13 ەسەبىمەن جەڭىسكە جەتتى. كەزدەسۋدە الاڭ يەلەرى بەس رەت جەڭسە, قوناقتار ءتورت رەت ۇتتى. ال 52 كگ. سالماقتاعى ءبىر جەكپە-جەك 5:5 ەسەبىمەن تەڭ اياقتالدى. بۇل كەزدەسۋدىڭ قىزىقتى وتەتى­نىنىڭ ءجونى دە بار ەدى. كەزىندە, ياعني كەڭەس وداعى جىلدارىندا, ودان كەيىن ەلىمىز تاۋەلسىزدىگىنىڭ العاشقى كەزدەرىندە تا­لاي تالانتتى بوكسشى­لاردى تاربيەلە­گەن قاراعاندى مەن جەزقازعان ءوڭىرى ەلىمىزدىڭ بوكس ۇستاحانالارىنىڭ بىرىنە اينالعانى شىندىق. قازىرگى كۇنى دە وتپەلى كەزەڭنىڭ قيىنشىلىقتارىن باستان وتكەرگەن وبلىستىق بوكس فەدە­را­تسيا­سى جەرگىلىكتى جەردە سپورتتىڭ وسى ءتۇرىن دامىتۋ, ونى ناسيحاتتاۋ دەسە الدارىنا جان سالماي كەلەدى. ونىڭ ايقىن مىسالىن قارا­عان­دىدا قازاق­ستان بوكس فەدەراتسيا­سىنىڭ كۋبوگى جو­لىندا وتكەن كەزەكتى باسەكەدە كورە ال­دىق. مۇندا وتكەن دودانىڭ ءبىر ەرەك­شەلىگى, شىلدە ايىنان بەرى جالعاسىپ كەلە جاتقان جەكپە-جەكتەردە العاش رەت وبلىس اتىنان شەتەلدىڭ ءۇش بىردەي بوكسشىسى سىنعا ءتۇستى. وزبەك­ستان­دىق 81 كگ. سالماقتاعى اتابەك يب­راي­موۆ پەن نوزيمجان سوبيروۆ (69 كگ.) جانە رەسەيلىك زينات جان­دى­باەۆ (56 كگ.) قاراعاندى وبلىسىنىڭ اتىنان شىعىپ, سونىڭ ەكەۋىندە ءوز­بەكستاندىقتار جە­ڭىس­كە جەتسە, سوڭ­عى­سى جاندوس مومى­نوۆ­تان 0:1 ەسە­بىمەن ۇتىلىپ قالدى. وبلىستىق بوكس فەدەراتسياسىنىڭ اتقا­رۋ­شى دي­رەكتورى بەرىكبول قاسىم­حا­نوۆ­­تىڭ ايتۋىنشا, شەتەلدىكتەردىڭ سىنعا ءتۇسۋى ءۇشىن ولارمەن الدىن-الا كەلىسىم-شارت جاسالعان. ەندى جەكپە-جەكتەردىڭ وزىنە كەلەر بولساق, ەڭ جەڭىل, ياعني 49 كگ. سالماقتا تەمىرتاس ءجۇسىپوۆ العاش بولىپ اقمولا وبلىسىنا جەڭىس اكەل­دى. ول ءوز سالما­عىندا ءمىرلان ءتۇ­رىكباي ۇلىن 1:0 ەسە­بى­مەن ۇتتى. ودان كەيىن 52 كگ. سالماقتاعى كەز­دەسۋ, جوعارىدا اتاپ وتكەنىمىزدەي, 5:5 ەسەبىمەن تەڭ اياقتالدى. كوكشە­تاۋ­لىق نۇرسۇلتان قوسشىعۇلوۆ پەن قانات تۇرعانباەۆتىڭ اراسىندا ءوت­كەن باسەكە بارلىق جاعىنان العان­دا قىزىقتى دا, تارتىستى بولدى. بۇل كەزدەسۋدە ەكەۋىنىڭ دە جەڭەتىن ءجو­نى بار ەدى. الايدا, ءۇشىنشى راۋند­تىڭ سوڭىنا دەيىن ءبىر-بىرىنە ءالى كەل­مەگەن بوكسشىلار شارشى الاڭ­دى كەلەسى سالماقتاعىلارعا بوساتتى. 60 جانە 64 كگ. سالماقتاعى اقمولا وبلى­سىنىڭ وكىلدەرى داۋلەت مۇقا­نوۆ پەن دامير قانافين رينگكە ۋاقتىلى كو­تەرىلە الماعان سوڭ, جەڭىلىس بەرىلدى. ءسويتىپ, قاراعان­دى­لىق ەرجان ءمۇسا­پىروۆ پەن دۋمان سۇلەيمەنوۆ وڭاي ولجانى قالتالا­رىنا باستى. مۇنداي جاعداي 91 كگ. سالماقتا دا قايتالاندى. كوكشە ءوڭى­رىنىڭ تۋماسى سۇيىندىك قولىم­باەۆ الەكسەي سەۆوستيانوۆقا قارسى شارشى الاڭعا شىقپادى. دەگەن­مەن, باسقا سالماقتاردا كوكشەتاۋ­لىق نۇرداۋلەت جارمانوۆ (75 كگ.) پەن اندرەي پلاحوتنيۋك (91 كگ.) قار­سىلاس­تارىن وڭدىرماي جەڭدى. ەڭ سوڭعى جەكپە-جەككە شىققان قا­را­عاندىلىق اسا اۋىر ساقماقتاعى ۆيتالي بوندارەن­كونى كوپشىلىك جاقسى ءبىلۋى ءتيىس. بيىل قازاقستان چەمپيوناتىنىڭ فينالىنا دەيىن سۇرىنبەي جەتكەن بوندارەنكو بۇل جولى وزىنەن تاجىريبەسى ازداۋ قارسى­لاسىنان جەڭىلىپ قالدى. كەلەسى كەزدەسۋلەر 4 قىركۇيەك كۇنى قوس­تانايدا جەرگىلىكتى بوكس­شىلار مەن سول­تۇستىك قازاقستان وبلىسىنىڭ كو­مان­داسى اراسىندا وتەدى. قاراعاندىدا قا­زاقستان بوكس فەدە­راتسياسىنىڭ كۋبوگى جولىنداعى كەزەكتى جەكپە-جەكتەر ءوتتى. داستان كەنجالين.