ەقىۇ-بۇۇ: قاۋىپسىزدىك جولىنداعى ءوزارا ءىس-قيمىل

31 تامىزدا ەقىۇ-نىڭ ءىس باسىن­دا­عى توراعاسى, قازاقستان رەسپۋبلي­كا­سىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ بۇۇ باس حاتشىسى  پان گي مۋنمەن تەلەفون ارقىلى ءسوي­لەس­تى, دەپ حابارلادى ەلىمىز سىرتقى ىستەر مينيسترلىگىنىڭ ءباسپاسوز قىزمەتى. ق.ساۋداباەۆ بۇۇ باسشىسىنىڭ قازاقستان مەن پرەزيدەنت نۇرسۇل­تان نازارباەۆتىڭ يادرولىق قارۋ­سىز­دانۋ سالاسىنداعى باستاما­لا­رى­نا, ونىڭ ىشىندە بۇۇ باس اسسام­بلەياسىنىڭ 29 تامىزدى  يادرولىق سىناقتارعا قارسى حالىقارالىق ءىس-قيمىل كۇنى دەپ جاريالاۋ تۋرالى قارار قابىلداعانىنا بەرىك قولداۋ  كورسەتكەنى ءۇشىن ريزاشىلىعىن ءبىل­دىردى.  پان گي مۋننىڭ وتكەن اپتا­دا استانادا “سەمەي: وڭالتۋدان دا­مۋعا” دەگەن تاقىرىپتا وتكەن  كون­فەرەنتسياعا قاتىسۋشىلارعا جولداۋ جولداعانى بەلگىلى. وندا  بۇۇ باس حاتشىسى قازاقستاننىڭ يادرولىق قارۋسىزدانۋعا قوسقان ۇلەسىن جو­عارى باعالاعان بولاتىن. قانات ساۋداباەۆ پەن پان گي مۋن ۇستىمىزدەگى جىلدىڭ 9 قىر­كۇيەگىندە نيۋ-يوركتە يادرولىق سىناقتارعا قارسى حالىقارالىق ءىس-قيمىل كۇنىنە ارنالعان بۇۇ باس اسسامبلەياسىنىڭ ارنايى ءماجىلىسىن وتكىزۋ حالىقارالىق قوعامداستىقتى يادرولىق قارۋسىز الەم قۇرۋ قا­جەتتىگىنە شاقىرۋدا ماڭىزدى قادام بولاتىنىن اتاپ كورسەتتى. مۇنداي قادامنىڭ ۇتىمدىلىعىن قازاقستان ءوزىنىڭ ۇلگىسىمەن دالەلدەگەن ەدى. ودان ءارى سۇحباتتاستار قىرعىز­ستانداعى احۋالدى تالقىلادى. ولار اتالعان ەلدە تۇراقتىلىقتى قامتا­ما­سىز ەتىپ, دامىتۋ ءۇشىن الەمدىك قو­عامداستىقتىڭ ودان ءارى كۇش-ءجى­گەر جۇمساۋى قاجەتتىگىنە نازار اۋدار­­دى. بۇعان الداعى پارلامەنت سايلاۋى ماڭىزدى فاكتور بولا الار ەدى. تاراپتار ەقىۇ مەن بۇۇ-نىڭ ودان ءارى تىعىز ۇيلەسىمدى قىزمەتىن كۇشەيتۋگە, قىرعىزستانعا ارناۋلى وكىلدەر – قازاقستان پارلامەنتى ءماجىلىسىنىڭ  ۆيتسە-سپيكەرى جانىبەك كارىبجانوۆ پەن بۇۇ-نىڭ ورتالىق ازياداعى الدىن الۋ ديپلوماتياسى ورتالىعىنىڭ باسشىسى ميروسلاۆ ەنچانى جىبەرۋگە ۋاعدالاستى.