ۋكراينا پرەزيدەنتى ۆيكتور يانۋكوۆيچتىڭ ايتۋىنشا, وزدەرى ەۋرووداققا اسسوتسياتسيالىق مۇشە بولىپ كىرۋگە جاقىن. بۇرىن- سوڭدى ءدال وسىنداي جاقىن بولىپ كورمەپتى. پرەزيدەنت ەلدە قالىپتاسىپ وتىرعان جالپى تۇراقتىلىقتى, ساياسي جۇيەنىڭ ورنىقتىلىعىن, ەكونوميكانىڭ قارقىندى دامۋىن العا توسا وتىرىپ, ەۋرووداققا كىرىگۋدىڭ العىشارتتارى جاسالعانىن مالىمدەدى. ءسىرا, سول ەۋروپالىق قۇرىلىممەن اڭگىمە دە جۇرگىزىلگەنگە ۇقسايدى. ايتپەسە بۇلاي مالىمدەمەس ەدى عوي.
بۋردجانادزە – ۇمىتكەر
گرۋزيانىڭ بۇرىنعى پارلامەنت سپيكەرى نينو بۋردجانادزە ەل پرەزيدەنتى قىزمەتى ءۇشىن كۇرەسكە قوسىلاتىنى جونىندە مالىمدەمە جاسادى. كەزىندە قازىرگى پرەزيدەنت ميحايل سااكاشۆيليدىڭ بيلىككە كەلۋىنە اتسالىسقان ول ەندى قازىرگى بيلىككە باستى وپپونەنت بولىپ وتىر. ونىڭ وسىناۋ كۇرەستە مۇمكىندىگى قانداي دەگەندە, بۋردجانادزەنىڭ ماسكەۋمەن جاقىنداسۋ ساياساتى ونى قولداۋشىلار سانىن كوبەيتەدى دەۋ قيىن. جۇرت وسىدان ەكى جىل بۇرىنعى سوعىستى ۇمىتا قويعان جوق. ءبىراز ادام ونىڭ رەسەي باسشىلارىمەن كەزدەسۋىن دە قۇپتاماعان.
ەكى جىلعا قام قىل
تاجىكستان پرەزيدەنتى ەمومالي راحمون حالىققا ۇندەۋ تاستاپ, ەكى جىلعا جەتەتىن ازىق-ت ۇلىك قورىن جاساۋعا شاقىردى. مۇنى ول بيىلعى قۇرعاقشىلىققا, سوعان بايلانىستى بولاتىن قىمباتشىلىققا وراي جاسادى. قور جاساعان جاقسى-اۋ, بىراق جوقتان قالاي جاسايدى؟ بۇل ەلدە ءبىر جىلعا قاجەتتىسى 1,4 ميلليون توننا استىق بولسا, وزدەرىنىڭ وندىرەتىنى – 1 ميلليون عانا. سىرتتان ساتىپ الۋعا ءماجبۇر. ال ۇكىمەتتىڭ دە, حالىقتىڭ دا قارجىسى تاپشى.
ءتىل – تۇسىنىستىك كوپىرى
يزرايل ۇكىمەتىنىڭ شەشىمى بويىنشا ەلدىڭ مەملەكەتتىك مەكتەپتەرىندە اراب ءتىلىن وقىتۋ مىندەتكە اينالدى جانە مەكتەپ بىتىرگەندە وقۋشىلار بۇل پاننەن ەمتيحان تاپسىرادى. تاعى ءبىر اتاپ ايتارلىق جاي – بۇل ەلدە اراب ءتىلى ەكىنشى رەسمي ءتىلدىڭ ءبىرى سانالادى. ساراپشىلاردىڭ پىكىرىنشە, ءبىر-ءبىرىنىڭ ءتىلىن ءبىلۋ ادامداردى جاقىنداستىرادى. اراب تىلىنەن ساباق بەرەتىندەردىڭ كوپشىلىگى ەۆرەيلەر كورىنەدى.
كارتەر – اراشاشى
سولتۇستىك كورەيا ۇكىمەتىمەن ءتىل تابىسۋ قيىن ەكەندىگى الەم جۇرتشىلىعىنا بەلگىلى. وزدەرىنىڭ وڭتۇستىك جاقتاعى قانداس باۋىرلارىمەن دۇردارازدىعى ءوز الدىنا, الەمنىڭ جەتەكشى ەلدەرىمەن دە كەلىسسوز جۇرگىزۋگە كەلىسپەي قىرسىعىپ جاتادى. سوندىقتان دا, سونداي ەلدىڭ باسشىلىعىمەن اقش-تىڭ 39-شى پرەزيدەنتى 85 جاستاعى دجيممي كارتەردىڭ ءتىل تابىسىپ, ءوز ەلىنىڭ 8 جىلعا كەسىلىپ, تۇرمەدە جاتقان ازاماتى 31 جاستاعى ايحولان مالي گومەستى الىپ قايتقانى تالاي ادامدى تاڭداندىردى. ءسىرا, وعان حالىقارالىق شيەلەنىستەردى بەيبىت جولمەن شەشۋگە قوسقان ۇلەسى ءۇشىن نوبەل سىيلىعىنىڭ بەرىلگەنى دە جايدان-جاي ەمەس-اۋ دەيسىڭ.
كاسترونىڭ سءوزى كوبەيدى
كۋبانىڭ كوسەمى, بۇرىنعى مەملەكەتتىك كەڭەستىڭ توراعاسى فيدەل كاسترو جاقىندا تەلەارنادان ءسوز سويلەپ, الەمدەگى №1 لاڭكەس سانالاتىن ۋساما بەن لادەندى اقش ورتالىق بارلاۋ باسقارماسىنىڭ (وبب) اگەنتى دەپ مالىمدەدى. اقش-تى دا, ونىڭ وبب-سىن دا سىناۋعا دا, مىنەۋگە دە بولار, بىراق جوعارىداعىداي مالىمدەمە جاساۋ ءوزىن سىيلايتىن قايراتكەرگە جاراسپايدى-اق.
قاشقىندار ۇستالماي تۇر
تاجىكستاننىڭ ۇلتتىق قاۋىپسىزدىك كوميتەتىنىڭ ەڭ مىقتى دەگەن قاماعىنان 25 اسا قاۋىپتى قىلمىسكەر قاشىپ كەتكەنىن اركىم ءارتۇرلى اڭگىمە ەتىپ جاتىر. بىرەۋلەر ەلدىڭ قۇقىق قورعاۋ ورىندارىنىڭ السىزدىگى دەسە, ەكىنشىلەرى قاشقىنداردىڭ جانكەشتىلىگى دەيدى. ولاردى ەلدىڭ جوعارعى سوتى قاشىپ كەتەردەن ءبىر-اق كۇن بۇرىن 10 جىلدان باستاپ, ومىرلىك تۇرمەگە جابۋ جازاسىنا كەسكەن ەكەن. ولارعا مەملەكەتتىك توڭكەرىس جاساۋ ارەكەتى ءۇشىن ايىپ تاعىلعان. جەدەل شارالار بەلگىلەنگەنىمەن, قاشقىندار ءالى قولعا تۇسپەگەن.
ازىرلەگەن ماماديار جاقىپ.
