انگليادا ءورت سالدارىنان ەكى وتانداسىمىز زارداپ شەكتى

استانا. 4 ءساۋىر. انگليانىڭ سولتۇستىك-شىعىسىنداعى نوتتينگەم قالاسىندا ستۋدەنتتەر جاتاقحاناسىنان ءورت شىقتى. سالدارىنان بىرنەشە ستۋدەنت زارداپ شەكتى. ولاردىڭ اراسىندا قازاقستاندىقتار دا بار. بۇل تۋرالى khabar.kz حابارلادى. ءتىلسىز جاۋ عيماراتقا ايتارلىقتاي زاقىم كەلتىردى. سونداي-اق, ستۋدەنتتەردىڭ كيىم-كەشەكتەرى مەن دۇنيە-م ۇلىكتەرى دە وتقا وراندى. ءورت ءسوندىرۋ كەزىندە ونداعان ادام قاۋىپسىز جەرگە كوشىرىلدى. «قازاليانس» شەت ەلدەردەگى قازاقستاندىق ستۋدەنتتەر بىرلەستىگىنىڭ پرەزيدەنتى راشيد ايۋپوۆتىڭ ايتۋىنشا, زارداپ شەككەندەردىڭ اراسىندا ەكى وتانداسىمىز بار. «ەكەۋى دە سول جاقتا ءبىلىم الۋدا. ءبىز اپاتتان كەيىن ولارمەن حابارلاسىپ, العاشقى كومەگىمىزدى كورسەتتىك. ارقايسىسىنا ۋاقىتشا جاتاتىن ورىن تاۋىپ, كيىم-كەشەك الۋ ءۇشىن 500 فۋنت ستەرلينگتەن ءبىر مەزەتتىك قارجى اۋدارىلدى. سونداي-اق, ۇلىبريتانياداعى «بولاشاق» ستيپەندياسىنىڭ وكىلدەرى دە كومەك قولىن سوزۋدا», – دەيدى ر.ايۋپوۆ. ايتا كەتەيىك, جاتاقحانا بۇرىن تەمەكى فابريكاسىنىڭ عيماراتى بولعان. ءبىلىم جانە عىلىم مينيسترلىگىنىڭ دەرەكتەرىنە سۇيەنسەك, 2014 جىلى شەت ەلدەردە وقيتىن وتانداستارىمىزدىڭ سانى 45 مىڭدى قۇراعان. سونىڭ ىشىندە ۇلىبريتانيادا 4 000 قازاقستاندىق ءبىلىم الۋدا. ەلامان قوڭىر. دەرەك, سۋرەت: khabar.kz.