قازاقستان تۋى ۆەتنام جەرىندە جەلبىرەدى

پارلامەنت ءماجىلىسىنىڭ توراعاسى قابيبوللا جاقىپوۆتىڭ ۆەتنام سوتسياليستىك رەسپۋبليكاسىنا رەسمي ساپارى بارىسىندا حانوي قالاسىندا قازاقستان رەسپۋبليكاسى ەلشىلىگىنىڭ جاڭا عيماراتىنىڭ سالتاناتتى اشىلۋ ءراسىمى ءوتتى. شاراعا قازاقستاندىق پارلامەنتاريلەر دەلەگاتسياسى, ۆەتنامنىڭ مەملەكەتتىك جانە قوعامدىق ۇيىمدارى مەن ديپلوماتيالىق كورپۋستىڭ وكىلدەرى قاتىستى. لەنتانى كەسۋ راسىمىنەن كەيىن قازاقستان رەسپۋبليكاسى ءانۇرانىنىڭ سالتاناتتى اۋەنىمەن وتانىمىزدىڭ كوك بايراعى ەلشىلىكتىڭ ۇستىنەن كوتەرىلدى. پارلامەنت ءماجىلىسىنىڭ توراعاسى قابيبوللا جاقىپوۆ ءوز سوزىندە قازاقستاننىڭ ۆەتنامداعى ەلشىلىگىنىڭ اشىلۋى تاراپتاردىڭ ەكى­جاقتى قاتىناستاردى نىعايتۋدىڭ جارقىن دالەلى بولىپ تابىلاتىنى جانە بۇل ەلدەرى­مىز­دىڭ ەرەكشە دوستىق قارىم-قاتى­ناستارىنىڭ, سەنىمى جانە سەرىك­تەستىگىنىڭ بەلگىسى دەپ اتاپ ءوتتى. ۆەتنام سىرتقى ىستەر ءمينيسترىنىڭ ورىنباسارى بۋي تحان شون ەكى ەل اراسىنداعى ءداستۇرلى دوستىق قاتىناستاردى اتاپ ءوتىپ, حانويدا قازاقستان ەلشىلىگىنىڭ اشىلۋى قازاقستان باسشىلىعىنىڭ ۆەتناممەن ىنتىماقتاستىقتى دامىتۋعا شىن نيەتىنىڭ دالەلىن راستاپ, ەكىجاقتى ىنتىماقتاستىقتى ودان ءارى كەڭەيتۋ مەن تەرەڭدەتۋگە قىزمەت ەتەتىنىن اتاپ ءوتتى. قازاقستان مەن ۆەتنام ارا­سىنداعى ديپلوماتيالىق قاتىناس­تاردىڭ ورناعانىنا 22 جىل بولدى. قازاقستان پرەزيدەنتى نۇرسۇلتان نازارباەۆتىڭ ۆەتنامدا  قازاق­ستان ەلشىلىگىن اشۋ تۋرالى جار­لىعى 2013 جىلعى قاراشا ايىندا جاريالانعان, ال ۆەتنامنىڭ استاناداعى ەلشىلىگى 2008 جىلدان بەرى ءوز قىزمەتىن اتقارىپ كەلەدى. قازاقستاننىڭ ۆەتنامداعى ەلشىسى بەكەتجان جۇماحانوۆ سەنىم گراموتاسىن ۆەتنام پرەزيدەنتى چىونگ تان شانگقا 2014 جىلعى 6 ناۋرىزدا تاپسىرعان بولاتىن. ەكى ەلدىڭ ساۋدا اينالىمى 2014 جىلى 271,9 ملن. اقش دوللارىن قۇ­راپ, سوڭعى 5 جىل ىشىندە 3 ەسە ارت­تى (2009 ج. – 88,379 ملن. اقش دولل.).