جەڭىس كۇنىن تويلاۋعا دايىندىق ويداعىداي

كەشە اقوردادا مەملەكەتتىك حاتشى گۇلشارا ابدىقالىقوۆا «ارداگەرلەر ۇيىمى» ورتالىق كەڭەسىنىڭ توراعاسى ومىرزاق وزعانباەۆ باستاعان ۇيىمنىڭ وكىل­دەرىمەن جانە مەملەكەتتىك ورگاندار باسشىلارى: قورعانىس مي­نيسترىنىڭ ءبىرىنشى ورىنباسارى – قارۋلى كۇشتەر باس شتا­بىنىڭ باستىعى ساكەن جاسۇزاقوۆ, دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى داۋلەت ارعىن­دى­قوۆپەن ۇلى وتان سوعىسىنداعى جەڭىستىڭ 70 جىلدىعىن مەرەكەلەۋگە دايىندىق ماسەلەلەرى بويىنشا كەزدەسۋ وتكىزدى. ءوزىنىڭ سوزىندە مەملەكەتتىك حاتشى ۇلى وتان سوعىسىنا 1 ملن. 800 مىڭعا جۋىق قازاق­ستان­دىقتىڭ قاتىسقانىن اتاپ ءوتتى. جاۋىنگەرلىك ەرلىگى ءۇشىن ءجۇز­دەگەن مىڭ قازاقستاندىق جاۋىن­گەرلەر مەن وفيتسەرلەر وردەن-مەدالدارمەن ماراپاتتالدى. سونىڭ ىشىندە 500-دەي ادام كەڭەس وداعىنىڭ باتىرى اتاندى, 110 جاۋىنگەر «داڭق» وردەنىنىڭ ءۇش دارەجەسىمەن ناگرادتالدى. 630 مىڭنان استام قازاقستاندىق قيان-كەسكى ۇرىستاردا قازا تاپتى نەمەسە اۋىر جاراقاتتاردىڭ سالدارىنان كوز جۇمدى. سونداي-اق, جۇزدەگەن مىڭ ادام حابار-وشارسىز كەتتى جانە تۇتقىننان ورالمادى. جالپى ايتقاندا, قولىنا قارۋ ۇستاپ مايدانعا بارعان ءاربىر ەكىنشى ادام جەڭىس جولىندا قۇربان بولدى. گ.ابدىقالىقوۆا 2015 جىلعى 1 ناۋ­رىزداعى جاعداي بويىنشا قا­زاقستاندا 4776 سوعىس ارداگە­رى مەن 192 980 تىل ەڭبەك­كەرى بار ەكەنىن حابارلادى. ول ەل پرەزيدەنتى نۇرسۇلتان نازار­باەۆتىڭ «ارداگەرلەر قاھارمان­دىقتىڭ, ىنتىماقتىڭ, بىرلىكتىڭ ۇلگىسىن كورسەتتى, سوندىقتان بۇگىنگى كۇن كوپتەگەن ۇرپاق ءۇشىن اقيقات سالتانات قۇرعان كۇن بولىپ سانالادى» دەگەن ءسوزى وزەكتى ەكەنىن اتاپ ءوتتى. ءو.وزعانباەۆ جەڭىس كۇنىن مە­رەكەلەۋگە قاتىستى ارداگەر­لەر اراسىنداعى حال-احۋالمەن تانىستىردى. ءسوزىن ارداگەر­لەر ماسەلەسىنە ءبولىنىپ وتىر­عان نازارعا جانە ولاردىڭ ماسە­لەلەرىن تالقىلاۋعا بەرىلىپ وتىرعان مۇمكىندىككە العىس ايتۋدان باستاعان ول قارتتارىمىزدىڭ اراسىنداعى جالپى احۋالدىڭ جاقسى ەكەنىن جەتكىزدى. سو­عىس اردا­گەرلەرىنە ۇلكەن قامقور­لىقتار جاسالىپ وتىر. ولارعا تۇرعىن ۇيلەر بەرىلۋدە, كوممۋ­نالدىق تولەمدەردەن بوساتىلعان, مەديتسينالىق كومەكتەر ۇيلەرىندە جاسالىپ تۇرادى. «ءومىر بەلدەۋى» اكتسياسى ءۇشىن ارداگەرلەردەن العىستار جاۋدا. وسى كۇندەرى بارلىق مايدانگەرلەرگە «جەدەل جاردەمدى» تۋرا شاقىرا الاتىن «توتەنشە تۇيمەشەسى» بار ۇتقىر جابدىقتار تاراتىلىپ بولىپ قالدى. بۇل ءبىزدىڭ مايدانگەرلەرىمىزدىڭ ءومىرىن ۇزارتا تۇسۋگە سەپتىگىن تيگىزۋدە. جۋىردا عانا ارداگەرلەر اراسىندا وتكەن «قايران ەرلەر, قاھارمان ارداگەرلەر!» رەسپۋبليكالىق كور­كەمونەرپازدار شىعار­ما­شى­لىعىنىڭ فەستيۆالى اياقتالدى. وعان ەلىمىزدىڭ بارلىق تۇكپىرىنەن 50 مىڭنان ارتىق ارداگەر تارتىلىپ, وزدەرىنىڭ ونەرلەرىن ورتاعا سالىپ سەرپىلىپ قالدى. ەندى, 22 ساۋىردە فەستيۆال لاۋرەاتتارىنىڭ استانا قالاسىندا گالا-كونتسەرتى بولماقشى, دەدى قازاقستان ارداگەرلەرى ورتالىق كەڭەسىنىڭ توراعاسى. ودان ءارى ءو.وزعانباەۆ ارداگەرلەر ۇيىمى «نۇر وتان» پارتياسى, قورعانىس, دەنساۋلىق ساقتاۋ جانە الەۋمەتتىك دامۋ, ءبىلىم جانە عىلىم, مادەنيەت جانە سپورت مينيسترلىكتەرى مەن «سامۇرىق-قازىنا» ۇاق-پەن بىرلەسە وتىرىپ, ماڭىزدى قوعامدىق شارالاردىڭ بارىنە بەلسەنە قاتىساتىنىن ايتتى. ساكەن جاسۇزاقوۆ پەن داۋلەت ارعىندىقوۆ جەڭىس كۇنىن مەرەكەلەۋگە دايىندىقتىڭ بارىسى تۋرالى حاباردار ەتتى. سونىڭ ىشىندە اسكەري شەرۋگە دايىندىق پەن سوعىس ارداگەرلەرى مەن تىل ەڭبەككەرلەرىنە الەۋمەتتىك, ماتەريالدىق جانە مەديتسينالىق كومەك جۇمىستارىنىڭ بارىسى تۋرالى ايتىلدى. كەزدەسۋ سوڭىندا مەملەكەتتىك حاتشى جەڭىستىڭ 70 جىلدىعىنا وراي وتەتىن سالتاناتتار – قازاقستاندىق ءپاتريوتيزمنىڭ دامۋىنا قۋاتتى سەرپىن بەرەتىن ادامزات تاريحىنداعى ەڭ سۇراپىل سوعىستاعى ءبىزدىڭ اتالارىمىز بەن اكەلەرىمىزدىڭ عاسىرلار بويى وشپەيتىن ەرلىگىنە تاعزىم ەتۋ ەكەنىن اتاپ ءوتتى. كەزدەسۋ قورىتىندىسى بويىنشا, مەملەكەتتىك حاتشى گ.ابدىقالىقوۆا ۇلى جەڭىستىڭ 70 جىلدىعىن مەرەكەلەۋگە دايىندىق ماسەلەلەرى بويىنشا كەيبىر مەملەكەتتىك ورگاندارعا بىرقاتار تاپسىرما بەردى. جاقسىباي سامرات, «ەگەمەن قازاقستان».