دەپۋتاتتاردىڭ دۋماعا ساپارى

ءماجىلىس توراعاسىنىڭ ورىنباسارى داريعا نازارباەۆا باستاعان پارلامەنتتىك دەلەگاتسيا رەسەي فەدەراتسياسىنا ساپارمەن باردى, دەپ حابارلادى پارلامەنت ءماجىلىسىنىڭ ءباسپاسوز قىزمەتى. ساپار بارىسىندا رف مەملەكەتتىك دۋماسىنىڭ توراعاسى س.نارىشكينمەن, رف مەملەكەتتىك دۋماسى توراعاسىنىڭ ءبىرىنشى ورىنباسارى ا.جۋكوۆپەن, بيۋدجەت جانە سالىق جونىندەگى كوميتەت توراعاسى ا. ماكاروۆپەن, جەمقورلىققا قارسى ءىس-قيمىل جانە قاۋىپسىزدىك جونىندەگى كوميتەت توراعاسى ي.ياروۆپەن, سونداي-اق, وتانداستارمەن بايلانىس جانە ەۋرازيالىق ينتەگراتسيا, تمد ىستەرى جونىندەگى كوميتەت توراعاسى ل.سلۋتسكيمەن كەزدەستى. كەزدەسۋ ماقساتى قارجى, سالىق, بيۋدجەت سالالارىنداعى جاڭا قاۋىپ-قاتەرلەرگە قارسى تاجىريبە الماسۋ, سونداي-اق, پارلامەنتارالىق بايلانىستىڭ بارىنشا ماڭىزدى باعىتتارى بويىنشا ءوزارا ءىس-قيمىلدى ودان ءارى تەرەڭدەتۋ بولدى. سونىمەن قاتار, جۇزدەسۋدە سالىقتىق زاڭنامالاردى جەتىلدىرۋ, پارلامەنتتىڭ ۇكىمەتپەن, باسقا دا مەملەكەتتىك ورگاندارمەن بىرلەسكەن ءىس-قيمىل تاجىريبەسى, قارجى سالاسىنداعى قاۋىپتەرگە قارسى كۇش بىرىكتىرۋ ماسەلەلەرىنە ايرىقشا نازار اۋدارىلدى. قوس تاراپ ەكى ەلدىڭ زاڭنامالىق ورگاندارى اراسىندا اقپاراتتار الماسۋ مەن زاڭ شىعارماشىلىق قىزمەتىن ۇيلەستىرۋ, اسىرەسە, ەۋرازيالىق ەكونوميكالىق وداق قىزمەتىنە كەڭىنەن توقتالدى. رف مەملەكەتتىك دۋماسىندا قازاق­ستان­دىق دەلەگاتسيا بيۋدجەت جانە سالىق جونىندەگى كوميتەت جينالىسىنا قاتىستى. كەلىسسوزدەر ناتيجەسىندە پارلا­مەنتارالىق ىنتىماقتاستىقتى نىعايتۋ تۋرالى كەلىسىمدەرگە قول جەتكىزىلدى. سونداي-اق, بۇگىن ۆيتسە-سپيكەر داريعا نازارباەۆا باستاعان پارلامەنتتىك دەلەگاتسيا رەسەي فەدەراتسياسى ەسەپ پالاتاسىنىڭ ءتورايىمى تاتيانا گوليكوۆامەن كەزدەسەدى.