گەولوگتار مەرەكەسى اتالىپ ءوتتى

ءساۋىر ايىنىڭ العاشقى جەكسەنبىسى – قازاقستان گەولوگتارىنىڭ كاسىبي مەرەكەسى. وسىعان وراي كەشە استانادا ارنايى مەرەكەلىك جيىن ءوتتى. وعان ينۆەستيتسيالار جانە دامۋ ءمينيسترى اسەت يسەكەشەۆ قاتىسىپ, گەولوگتاردى ءتول مەرەكەلەرىمەن قۇتتىقتادى.  «وزدەرىڭىز بىلەتىندەي, ەلى­مىزدە يندۋستريالاندىرۋ باعدار­لاماسى ىسكە قوسىلعاننان بەرى  گەو­لوگيا سالاسىنا ايرىقشا كوڭىل ءبولىنىپ وتىر. وتكەن بەسجىل­دىقتا ايتارلىقتاي كوپ جۇ­مىستار اتقارىلدى. بۇل ءسىز­دەر­دىڭ ەڭبەكتەرىڭىزدىڭ ارقاسىندا.  سوندىقتان سىزدەرگە, بارلىق گەو­لوگتار قاۋىمىنا العىس ءبىلدى­رەمىن. الدىمىزدا ءالى دە ءبىراز مىندەتتەر تۇر. ءبىز وسى مىندەتت­ەردى ورىنداۋعا بارلىق كۇش-ءجى­گەرىمىزدى جۇمساپ, ماقسات­تارىمىزعا جەتەمىز دەپ سەنەمىن, دەگەن اسەت يسەكەشەۆ,  گەولوگتارعا زور دەنساۋلىق, ەڭبەكتەرىنە جەمىس, وتباسىلارىنا اماندىق تىلەدى. مينيستر ودان ءارى بۇل سالانىڭ مەملەكەتتىڭ ەكونوميكالىق سايا­ساتىندا باسىمدىققا يە بولىپ وتىرعاندىعىن ەرەكشە اتاپ ءوتتى. بۇل رەتتە وسى جىلى ۇلت­تىق كوم­پانيالاردىڭ, ءىرى جەر قوي­ناۋىن پايدالانۋشىلاردىڭ جانە ينۆەستورلاردىڭ قاتىسۋى­مەن گەولوگيالىق بارلاۋ جۇمىس­تارى­نىڭ 5 جىلدىق باعدارلاماسىن ىسكە اسىرۋ باستالعانىن تىلگە تيەك ەتتى. ءمينيستردىڭ ايتۋىنشا, بيىلعى جىلدان باس­تاپ 2015-2019 جىلدارعا ارنال­عان گەولوگيالىق بارلاۋ جۇمىستارىنىڭ مەم­لە­كەتتىك باعدارلاماسى جۇزەگە اسا باس­تايدى. «وسىعان وراي, بۇل باعىتتا ارنايى قاراجاتتار قام­تىلىپ وتىر. الەمدىك كۇردەلى احۋال­دىڭ ورىن العانىنا قاراماس­تان, اتالعان باعدارلامانى ءجۇ­زەگە اسىرۋعا رەسپۋبليكالىق بيۋدجەتتەن 7 ملرد. تەڭگە, ال «نۇر­لى جول» باعدارلاماسى اياسىن­دا ۇلتتىق قوردان قوسىمشا 6 ملرد. تەڭگە ءبولىنىپ وتىر»,  دەدى ءا.يسەكەشەۆ. ونىڭ ايتۋىن­شا, وسىنىڭ ءوزى باعدارلاما اياسىنداعى جۇمىستاردى بيىلدىڭ وزىندە جالعاستىرۋعا مۇمكىندىك بەرەدى. بۇدان بولەك, قازىرگى تاڭدا گەولوگيالىق بارلاۋ سەكتورىنا شەتەلدىك ينۆەستورلار تارتۋ دا وزەكتى ماسەلە بولىپ تابىلادى. ءمينيستردىڭ سوزىنە قاراعاندا, گەولوگيا مەن تاۋ-كەن ءوندىرۋ سالاسىنا ينۆەستيتسيالار تارتۋ باعىتىندا قازاقستان كانادا, اۆستراليا, برازيليا, وڭتۇستىك افريكا رەسپۋبليكاسى سەكىلدى ەلدەردەن ايتارلىقتاي ارتتا قالىپ وتىر. «سوندىقتان دا, ەلباسىنىڭ تاپسىرماسىنا سايكەس, بۇگىنگى كۇنى اۋقىمدى جۇمىستار اتقارىلۋدا. زاڭنامالارعا وزگەرىستەر ەنگىزىلىپ, پروتسەدۋرالار جاقسارىپ جاتىر», دەدى ءا.يسەكەشەۆ. اتالمىش مەرەكە بيىل ءتور­تىنشى رەت رەسمي تۇردە اتا­لىپ وتىلۋدە. بۇل 2011 جىلدىڭ قازانىندا قازاقستان رەس­پۋب­ليكاسىنىڭ پرەزيدەنتى ن.نا­زار­باەۆتىڭ جارلىعىمەن ەلىمىزدەگى كاسىبي جانە باسقا دا مەرەكەلەر ءتىزىمىنىڭ جاڭا رەداكتسياسىمەن بەكىتىلگەن بولاتىن. مىنە, سودان بەرى ءساۋىر ايىنىڭ العاشقى اپتاسى دا گەولوگتار ءۇشىن ايرىقشا كەزەڭ. سوڭعى بىرنەشە جىلدا گەو­لوگيا جانە جەر قويناۋىن پاي­دالانۋ سالاسىندا ەلەۋلى وزگەرىستەر بايقالادى. ايتالىق, مينەرالدى-شيكىزات كەشەنىن باسقارۋ جۇيەسىن وزگەرتۋ, سالادا ينۆەستيتسيالىق احۋالدى جاقسارتۋ ءۇشىن جاعدايلار جاساۋ, وزىق تەحنولوگيالار ترانسفەرتى, ينفراقۇرىلىمداردى دامىتۋ جانە سالا جۇمىستارىنىڭ كاسىبي دەڭگەيىن كوتەرۋ بويىنشا رەفورمالار باستالدى. ال بۇل جاڭعىرۋ, جاڭارۋ, دامۋ داڭعىلىندا  ارقاشان ادام ەڭبەگىنىڭ ۇلەسى, ادام ەڭبەگىنىڭ كۇشى وراسان ماڭىزدى ءرول اتقاراتىنى انىق. قاي سالا بولماسىن قاجىرلى ادام ەڭبەگىنىڭ ارقاسىندا عانا ىلگەرىلەي تۇسپەك. ادامزات كەز كەلگەن جۇمىستىڭ, ءار ماماندىقتىڭ ابىرويلى ەكەندىگىن جانە دە ادامنىڭ ءوز جۇمىسىنا قانشالىقتى جاۋاپكەرشىلىكپەن قاراپ, قانشالىقتى ىنتا-جىگەر­مەن جۇمىس ىستەيتىنىنە بايلانىس­تى بولاتىنىن ارقاشان مويىنداپ وتىرعان. ال ەڭبەك, اسىرە­سە, ءار ماماندىقتىڭ ءتول مەرەكە­لەرى تۇسىندا ايرىقشا اتالىپ, ەڭبەكتەرى ەلەنە تۇسەدى. ءيا, بارلىق كاسىپ وزدىگىنشە ەرەكشە جانە ماڭىزدى. ءار كاسىپتىڭ ءوزىنىڭ جۇمىس ەرەكشەلىگى, ءوزىنىڭ قايتالانباس تاريحى, ءوز قۇندىلىعى جانە ءوز با­تىر­لارى بار. وسى رەتتە كەشەگى سال­تاناتتى جيىندا دا سالانىڭ بىرقاتار ۇزدىكتەرى ءتۇرلى نومينا­تسيالار بويىنشا ماراپاتتال­دى. ماسەلەن, 182 گەولوگقا ال­عىس حات, گراموتالار مەن ماراپات­تار تابىس ەتىلدى. 77 مامان «قازاق­ستان رەسپۋبليكاسىنىڭ قۇرمەت­تى كەن بارلاۋشىسى», «قازاق­ستان رەسپۋبليكاسىنىڭ كەن بار­لاۋ ۇزدىگى» مەن «قازاقستان رەسپۋب­ليكاسىنىڭ كەن ورىندارىن العاش اشۋشى» نوميناتسيالارى بويىنشا ماراپاتتالدى. دينارا بىتىكوۆا, «ەگەمەن قازاقستان».