استانا. 31 تامىز. مەملەكەت باسشىسى قىتاي حالىق رەسپۋبليكاسىنا مەملەكەتتىك ساپارى اياسىندا بىرقاتار كورپوراتسيا باسشىلارىمەن كەزدەستى. بۇل تۋرالى akorda.kz حابارلادى.
ەلباسى «سيتيك گرۋپپ» كورپوراتسياسىنىڭ ديرەكتورلار كەڭەسىنىڭ توراعاسى چان چجەنمينمەن كەزدەستى. كەزدەسۋ بارىسىندا بىرلەسكەن ينۆەستيتسيالىق جوبالاردى جۇزەگە اسىرۋ, سونداي-اق قازاقستاننىڭ «نۇرلى جول» باعدارلاماسى اياسىنداعى ينفراقۇرىلىمدىق دامۋىنا كومپانيانىڭ قاتىسۋى ماسەلەلەرى تالقىلاندى.
مەملەكەت باسشىسى "سيتيك گرۋپپ" كورپوراتسياسى مەن قازاقستاننىڭ جاقسى ىنتىماقتاستىق تاريحى بار ەكەنىن اتاپ ءوتتى.
«ءبىز بىرلەسىپ جۇمىس ىستەگەن جىلدارى مول تاجىريبە جينادىق. كومپانيا قازاقستان نارىعىنداعى قىزمەتى كەزىندە وڭ ناتيجەلەرگە جەتتى. قازىر جاڭا زامان كەلە جاتىر, جاڭا جوبالار مەن مىندەتتەر تۋىنداۋدا», – دەدى نۇرسۇلتان نازارباەۆ.
چان چجەنمين كومپانياعا كوپ جىلدار قولداۋ كورسەتكەنى جانە ەلدە شەتەلدىك ينۆەستورلارعا قولايلى جاعداي جاساعانى ءۇشىن مەملەكەت باسشىسىنا العىس ايتتى.
مەملەكەت باسشىسى سونداي-اق «تسينحۋا» كورپوراتسياسى باسقارماسىنىڭ توراعاسى حو تسينحۋامەن كەزدەستى. كەزدەسۋ بارىسىندا تاراپتار ەنەرگەتيكا سەكتورىنىڭ دامۋ پەرسپەكتيۆالارىن, سونداي-اق كورپوراتسيانىڭ قازاقستاننىڭ كومىر ونەركاسىبىنە قاتىسۋىن ۇلعايتۋ ماسەلەلەرىن قاراستىردى.
نۇرسۇلتان نازارباەۆ «تسينحۋا» كورپوراتسياسىمەن بۇرىن قول جەتكىزىلگەن ۋاعدالاستىقتاردىڭ ءبىزدىڭ ەلىمىز ءۇشىن سەرپىندى ءمانى بار ەكەنىن ايتتى.
«ءسىزدىڭ كومپانيا قازاقستاندا ءبىرىنشى رەت كومىردى كەشەندى وڭدەۋدەن وتكىزەدى. ونىڭ مول قورى بار ەكەنىن ەسكەرسەك, بۇل ءبىزدىڭ ەنەرگيا تەڭگەرىمى ءۇشىن زور مانگە يە», – دەدى ەلباسى.
سونىمەن قاتار, پرەزيدەنت CNPC كورپوراتسياسىنىڭ ديرەكتورلار كەڭەسىنىڭ توراعاسى ۆان يلينمەن كەزدەستى. كەزدەسۋدە قازاقستاننىڭ مۇناي-گاز سالاسىنىڭ جاڭا ەكونوميكالىق جاعدايداعى دامۋىنا كورپوراتسيانىڭ قاتىسۋ ماسەلەلەرى تالقىلاندى.
مەملەكەت باسشىسى رەسپۋبليكامىز بەن CNPC كومپانياسىنىڭ زور ىنتىماقتاستىق تاجىريبەسى بار ەكەنىن, وسى جىلدار ىشىندە تاراپتار ءوزارا ءىس-قيمىلدىڭ قوماقتى بازاسىن قالىپتاستىرعانىن ايتتى.
«كومپانيانىڭ مۇناي-گاز نارىعىنا قاتىسۋى – ءبىزدىڭ قحر-مەن ىنتىماقتاستىعىمىزدىڭ باستى تارماقتارىنىڭ ءبىرى. ءسىزدىڭ كورپوراتسيا كومىرسۋتەگىن ءوندىرۋ, تاسىمالداۋ جانە وڭدەۋ سالاسىندا جۇمىس ىستەيدى. بيىلدان باستاپ CNPC-ءدىڭ قازاقستان پرەزيدەنتى جانىنداعى شەتەلدىك ينۆەستورلار كەڭەسىنىڭ قۇرامىنا كىرۋىنىڭ دە ماڭىزى بار», – دەدى نۇرسۇلتان نازارباەۆ.
ەلباسى كورپوراتسيانىڭ قاتىسۋىمەن ەلىمىزدە جۇزەگە اسىرىلىپ جاتقان ماڭىزدى جوبالارعا توقتالدى.
«قاشاعان كەنىشى يگەرىلىپ, شىمكەنت مۇناي وڭدەۋ زاۋىتى جاڭعىرتىلۋدا. ماڭعىستاۋ وبلىسىندا مۇناي-گاز جابدىقتارى كەشەنى, «بەينەۋ-بوزوي» گاز قۇبىرى سالىنۋدا. بۇل جوبالار زور ماڭىزعا يە جانە بۇگىن قحر توراعاسى سي تسزينپينمەن كەلىسسوزدەرىمىزدىڭ ارقاۋى بولادى», – دەدى پرەزيدەنت.
نۇرسۇلتان نازارباەۆ كورپوراتسيانىڭ شيكىزات سەكتورىنان باسقا سالادا دا باي تاجىريبەسى بار ەكەنىن ايتتى. وسىعان بايلانىستى مەملەكەت باسشىسى CNPC-ءدى استانادا قۇرىلۋى جوسپارلانىپ وتىرعان حالىقارالىق قارجى ورتالىعىنىڭ جۇمىسىنا دا بەلسەنە قاتىسۋعا شاقىردى.
سوڭىندا قازاقستان پرەزيدەنتى CNPC-ءدىڭ وزىق تەحنولوگيالار ازىرلەۋدەگى قىزمەتىنە جوعارى باعا بەردى جانە وسى باعىتتا بىرلەسە جۇمىس ىستەۋگە مۇددەلىلىك ءبىلدىردى.
ۆان يلين قازاقستان نارىعىندا 20 جىل بويى جۇمىس ىستەگەن كومپانياعا قولداۋ كورسەتكەنى ءۇشىن نۇرسۇلتان نازارباەۆقا العىس ايتتى.
ايدار ورىسباەۆ.
دەرەك, سۋرەت: akorda.kz.
